Read Nova_Vulgata DC Epistula I ad Corinthios 6 Bible Online

Epistula I ad Corinthios 6 - Nova_Vulgata DC bible

Epistula I ad Corinthios 6

¹Audet aliquis vestrum habens negotium adversus alterum iu dicari apud iniquos et non apud sanctos?

²An nescitis quoniam sancti de mundo iudicabunt? Et si in vobis iudicabitur mundus, indigni estis minimis iudiciis?

³Nescitis quoniam angelos iudicabimus, quanto magis saecularia?

⁴Saecularia igitur iudicia si habueritis, contemptibiles, qui sunt in ecclesia, illos constituite ad iudicandum?

⁵Ad verecundiam vestram dico! Sic non est inter vos sapiens quisquam, qui possit iudicare inter fratrem suum?

⁶Sed frater cum fratre iudicio contendit, et hoc apud infideles?

⁷Iam quidem omnino defectio est vobis, quod iudicia habetis inter vosmetipsos! Quare non magis iniuriam accipitis, quare non magis fraudem patimini?

⁸Sed vos iniuriam facitis et fraudatis, et hoc fratribus!

⁹An nescitis quia iniqui regnum Dei non possidebunt? Nolite errare: neque fornicarii neque idolis servientes neque adulteri neque molles neque masculorum concubitores

¹⁰neque fures neque avari, non ebriosi, non maledici, non rapaces regnum Dei possidebunt.

¹¹Et haec quidam fuistis. Sed abluti estis, sed sanctificati estis, sed iustificati estis in nomine Domini Iesu Christi et in Spiritu Dei nostri!

¹²" Omnia mihi licent!". Sed non omnia expediunt. " Omnia mihi licent!. Sed ego sub nullius redigar potestate.

¹³" Esca ventri, et venter escis!". Deus autem et hunc et has destruet. Corpus autem non fornicationi sed Domino, et Dominus corpori;

¹⁴Deus vero et Dominum suscitavit et nos suscitabit per virtutem suam.

¹⁵Nescitis quoniam corpora vestra membra Christi sunt? Tollens ergo membra Christi faciam membra meretricis? Absit!

¹⁶An nescitis quoniam, qui adhaeret meretrici, unum corpus est? " Erunt enim, inquit, duo in carne una".

¹⁷Qui autem adhaeret Domino, unus Spiritus est.

¹⁸Fugite fornicationem! Omne peccatum, quodcumque fecerit homo, extra corpus est; qui autem fornicatur, in corpus suum peccat.

¹⁹An nescitis quoniam corpus vestrum templum est Spiritus Sancti, qui in vobis est, quem habetis a Deo, et non estis vestri?

²⁰Empti enim estis pretio! Glorificate ergo Deum in corpore vestro.