Read Nova_Vulgata DC Epistula I ad Corinthios 8 Bible Online

Epistula I ad Corinthios 8 - Nova_Vulgata DC bible

Epistula I ad Corinthios 8

¹De idolothytis autem, scimus quia omnes scientiam habemus. Scientia inflat, caritas vero aedificat.

²Si quis se existimat scire aliquid, nondum cognovit, quemadmodum oporteat eum scire;

³si quis autem diligit Deum, hic cognitus est ab eo.

⁴De esu igitur idolothytorum, scimus quia nullum idolum est in mundo, et quod nullus deus nisi Unus.

⁵Nam et si sunt, qui dicantur dii sive in caelo sive in terra, si quidem sunt dii multi et domini multi,

⁶nobis tamen unus Deus Pater, ex quo omnia et nos in illum, et unus Dominus Iesus Christus, per quem omnia et nos per ipsum.

⁷Sed non in omnibus est scientia; quidam autem consuetudine usque nunc idoli quasi idolothytum manducant, et conscientia ipsorum, cum sit infirma, polluitur.

⁸Esca autem nos non commendat Deo; neque si non manducaverimus, deficiemus, neque si manducaverimus, abundabimus.

⁹Videte autem, ne forte haec licentia vestra offendiculum fiat infirmis.

¹⁰Si enim quis viderit eum, qui habet scientiam, in idolio recumbentem, nonne conscientia eius, cum sit infirma, aedificabitur ad manducandum idolothyta?

¹¹Peribit enim infirmus in tua scientia, frater, propter quem Christus mortuus est!

¹²Sic autem peccantes in fratres et percutientes conscientiam eorum infirmam, in Christum peccatis.

¹³Quapropter si esca scandalizat fratrem meum, non manducabo carnem in aeternum, ne fratrem meum scandalizem.