Read Nova_Vulgata DC Epistula II ad Corinthios 2 Bible Online

Epistula II ad Corinthios 2 - Nova_Vulgata DC bible

Epistula II ad Corinthios 2

¹Statui autem hoc ipse apud me, ne iterum in tristitia venirem ad vos;

²si enim ego contristo vos, et quis est qui me laetificet, nisi qui contristatur ex me?

³Et hoc ipsum scripsi, ut non, cum venero, tristitiam habeam de quibus oportebat me gaudere, confidens in omnibus vobis, quia meum gaudium omnium vestrum est.

⁴Nam ex multa tribulatione et angustia cordis scripsi vobis per multas lacrimas, non ut contristemini, sed ut sciatis quam carita tem habeo abundantius in vos.

⁵Si quis autem contristavit, non me contristavit, sed ex parte, ut non onerem, omnes vos.

⁶Sufficit illi, qui eiusmodi est, obiurgatio haec, quae fit a pluribus,

⁷ita ut e contra magis donetis et consolemini, ne forte abundantiore tristitia absorbeatur, qui eiusmodi est.

⁸Propter quod obsecro vos, ut confirmetis in illum caritatem;

⁹ideo enim et scripsi, ut cognoscam probationem vestram, an in omnibus oboedientes sitis.

¹⁰Cui autem aliquid donatis, et ego; nam et ego, quod donavi, si quid donavi, propter vos in persona Christi,

¹¹ut non circumveniamur a Satana; non enim ignoramus cogitationes eius.

¹²Cum venissem autem Troadem ob evangelium Christi, et ostium mihi apertum esset in Domino,

¹³non habui requiem spiritui meo, eo quod non invenerim Titum fratrem meum, sed valefaciens eis profectus sum in Macedoniam.

¹⁴Deo autem gratias, qui semper triumphat nos in Christo et odorem notitiae suae manifestat per nos in omni loco.

¹⁵Quia Christi bonus odor sumus Deo in his, qui salvi fiunt, et in his, qui pereunt:

¹⁶aliis quidem odor ex morte in mortem, aliis autem odor ex vita in vitam. Et ad haec quis idoneus?

¹⁷Non enim sumus sicut plurimi adulterantes verbum Dei, sed sicut ex sinceritate, sed sicut ex Deo coram Deo in Christo loquimur.