Read Nova_Vulgata DC Epistula ad Galatas 3 Bible Online

Epistula ad Galatas 3 - Nova_Vulgata DC bible

Epistula ad Galatas 3

¹O insensati Galatae, quis vos fascinavit, ante quorum oculos Iesus Christus descriptus est crucifixus?

²Hoc solum volo a vobis discere: Ex operibus legis Spiritum accepistis an ex auditu fidei?

³Sic stulti estis? Cum Spiritu coeperitis, nunc carne consummamini?

⁴Tanta passi estis sine causa? Si tamen et sine causa!

⁵Qui ergo tribuit vobis Spiritum et operatur virtutes in vobis, ex operibus legis an ex auditu fidei?

⁶Sicut Abraham credidit Deo, et reputatum est ei ad iustitiam.

⁷Cognoscitis ergo quia qui ex fide sunt, hi sunt filii Abrahae.

⁸Providens autem Scriptura, quia ex fide iustificat gentes Deus, praenuntiavit Abrahae: "Benedicentur in te omnes gentes".

⁹Igitur, qui ex fide sunt, benedi cuntur cum fideli Abraham.

¹⁰Quicumque enim ex operibus legis sunt, sub maledicto sunt; scriptum est enim: "Maledictus omnis, qui non permanserit in omnibus, quae scripta sunt in libro legis, ut faciat ea".

¹¹Quoniam autem in lege nemo iustificatur apud Deum manifestum est, quia iustus ex fide vivet;

¹²lex autem non est ex fide; sed, qui fecerit ea, vivet in illis.

¹³Christus nos redemit de maledicto legis factus pro nobis maledictum, quia scriptum est: "Maledictus omnis, qui pendet in ligno ",

¹⁴ut in gentes benedictio Abrahae fieret in Christo Iesu, ut promissionem Spiritus accipiamus per fidem.

¹⁵Fratres, secundum hominem dico, tamen hominis confirmatum testamentum nemo irritum facit aut superordinat.

¹⁶Abrahae autem dictae sunt promissiones et semini eius. Non dicit: "Et seminibus ", quasi in multis, sed quasi in uno: "Et semini tuo", qui est Christus.

¹⁷Hoc autem dico: Testamentum confirmatum a Deo, quae post quadringentos et triginta annos facta est lex, non irritum facit ad evacuandam promissionem.

¹⁸Nam si ex lege hereditas, iam non ex promissione; Abrahae autem per promissionem donavit Deus.

¹⁹Quid igitur lex? Propter transgressiones apposita est, donec veniret semen, cui promissum est, ordinata per angelos in manu mediatoris.

²⁰Mediator autem unius non est, Deus autem unus est.

²¹Lex ergo adversus promissa Dei? Absit. Si enim data esset lex, quae posset vivificare, vere ex lege esset iustitia.

²²Sed conclusit Scriptura omnia sub peccato, ut promissio ex fide Iesu Christi daretur credentibus.

²³Prius autem quam veniret fides, sub lege custodiebamur conclusi in eam fidem, quae revelanda erat.

²⁴Itaque lex paedagogus noster fuit in Christum, ut ex fide iustificemur;

²⁵at ubi venit fides, iam non sumus sub paedagogo.

²⁶Omnes enim filii Dei estis per fidem in Christo Iesu.

²⁷Quicumque enim in Christum baptizati estis, Christum induistis:

²⁸non est Iudaeus neque Graecus, non est servus neque liber, non est masculus et femina; omnes enim vos unus estis in Christo Iesu.

²⁹Si autem vos Christi, ergo Abrahae semen estis, secundum promissionem heredes.