Read Nova_Vulgata DC Epistula ad Galatas 4 Bible Online

Epistula ad Galatas 4 - Nova_Vulgata DC bible

Epistula ad Galatas 4

¹Dico autem: Quanto tempore heres parvulus est, nihil differt a servo, cum sit dominus omnium,

²sed sub tutoribus est et actoribus usque ad praefinitum tempus a patre.

³Ita et nos, cum essemus parvuli, sub elementis mundi eramus servientes;

⁴at ubi venit plenitudo temporis, misit Deus Filium suum, factum ex muliere, factum sub lege,

⁵ut eos, qui sub lege erant, redimeret, ut adoptionem filiorum reciperemus.

⁶Quoniam autem estis filii, misit Deus Spiritum Filii sui in corda nostra clamantem: "Abba, Pater!".

⁷Itaque iam non es servus sed filius; quod si filius, et heres per Deum.

⁸Sed tunc quidem ignorantes Deum, his, qui natura non sunt dii, servistis;

⁹nunc autem, cum cognoveritis Deum, immo cogniti sitis a Deo, quomodo convertimini iterum ad infirma et egena elementa, quibus rursus ut antea servire vultis?

¹⁰Dies observatis et menses et tempora et annos!

¹¹Timeo vos, ne forte sine causa laboraverim in vobis.

¹²Estote sicut ego, quia et ego sicut vos; fratres, obsecro vos. Nihil me laesistis;

¹³scitis autem quia per infirmitatem carnis pridem vobis evangelizavi,

¹⁴et tentationem vestram in carne mea non sprevistis neque respuistis, sed sicut angelum Dei excepistis me, sicut Christum Iesum.

¹⁵Ubi est ergo beatitudo vestra? Testimonium enim perhibeo vobis, quia, si fieri posset, oculos vestros eruissetis et dedissetis mihi.

¹⁶Ergo inimicus vobis factus sum, verum dicens vobis?

¹⁷Aemulantur vos non bene, sed excludere vos volunt, ut illos aemulemini.

¹⁸Bonum est autem aemulari in bono semper, et non tantum cum praesens sum apud vos,

¹⁹filioli mei, quos iterum parturio, donec formetur Christus in vobis!

²⁰Vellem autem esse apud vos modo et mutare vocem meam, quoniam incertus sum in vobis.

²¹Dicite mihi, qui sub lege vultis esse: Legem non auditis?

²²Scriptum est enim quoniam Abraham duos filios habuit, unum de ancilla et unum de libera.

²³Sed qui de ancilla, secundum carnem natus est; qui autem de libera, per promissionem.

²⁴Quae sunt per allegoriam dicta; ipsae enim sunt duo Testamenta, unum quidem a monte Sinai, in servitutem generans, quod est Agar.

²⁵Illud vero Agar mons est Sinai in Arabia, respondet autem Ierusalem, quae nunc est; servit enim cum filiis suis.

²⁶Illa autem, quae sursum est Ierusalem, libera est, quae est mater nostra;

²⁷scriptum est enim: Laetare, sterilis, quae non paris,erumpe et exclama, quae non parturis,quia multi filii desertaemagis quam eius, quae habet virum".

²⁸Vos autem, fratres, secundum Isaac promissionis filii estis.

²⁹Sed quomodo tunc, qui secundum carnem natus fuerat, persequebatur eum, qui secundum spiritum, ita et nunc.

³⁰Sed quid dicit Scriptura? " Eice ancillam et filium eius; non enim heres erit filius ancillae cum filio liberae".

³¹Itaque, fratres, non sumus ancillae filii sed liberae.