Read Nova_Vulgata DC Epistula ad Galatas 6 Bible Online

Epistula ad Galatas 6 - Nova_Vulgata DC bible

Epistula ad Galatas 6

¹Fratres, et si praeoccupatus fuerit homo in aliquo delicto, vos, qui spiritales estis, huiusmodi instruite in spiritu lenitatis, considerans teipsum, ne et tu tenteris.

²Alter alterius onera portate et sic adimplebitis legem Christi.

³Nam si quis existimat se aliquid esse, cum sit nihil, ipse se seducit;

⁴opus autem suum probet unusquisque et sic in semetipso tantum gloriationem habebit et non in altero.

⁵Unusquisque enim onus suum portabit.

⁶Communicet autem is, qui catechizatur verbum, ei qui se catechizat, in omnibus bonis.

⁷Nolite errare: Deus non irridetur. Quae enim seminaverit homo, haec et metet;

⁸quoniam, qui seminat in carne sua, de carne metet corruptionem; qui autem seminat in Spiritu, de Spiritu metet vitam aeternam.

⁹Bonum autem facientes infatigabiles, tempore enim suo metemus non deficientes.

¹⁰Ergo dum tempus habemus, operemur bonum ad omnes, maxime autem ad domesticos fidei.

¹¹Videte qualibus litteris scripsi vobis mea manu.

¹²Quicumque volunt placere in carne, hi cogunt vos circumcidi, tantum ut crucis Christi persecutionem non patiantur;

¹³neque enim, qui circumciduntur, legem custodiunt, sed volunt vos circumcidi, ut in carne vestra glorientur.

¹⁴Mihi autem absit gloriari, nisi in cruce Domini nostri Iesu Christi, per quem mihi mundus crucifixus est, et ego mundo.

¹⁵Neque enim circumcisio aliquid est neque praeputium sed nova creatura.

¹⁶Et quicumque hanc regulam secuti fuerint, pax super illos et misericordia et super Israel Dei.

¹⁷De cetero nemo mihi molestus sit; ego enim stigmata Iesu in super corpore meo porto.

¹⁸Gratia Domini nostri Iesu Christi cum spiritu vestro, fratres. Amen.