Read Nova_Vulgata DC Epistula ad Ephesios 1 Bible Online

Epistula ad Ephesios 1 - Nova_Vulgata DC bible

Epistula ad Ephesios 1

¹Paulus, apostolus Christi Iesu per voluntatem Dei, sanctis, qui sunt Ephesi, et fidelibus in Christo Iesu:

²gratia vobis et pax a Deo Patre nostro et Domino Iesu Christo.

³Benedictus Deus et Pater Domini nostri Iesu Christi,qui benedixit nos in omni benedictione spiritali in caelestibus in Christo,

⁴sicut elegit nos in ipso ante mundi constitutionem,ut essemus sancti et immaculati in conspectu eius in caritate;

⁵qui praedestinavit nos in adoptionem filiorumper Iesum Christum in ipsum,secundum beneplacitum voluntatis suae,

⁶in laudem gloriae gratiae suae,in qua gratificavit nos in Dilecto,

⁷in quo habemus redemptionem per sanguinem eius,remissionem peccatorum,secundum divitias gratiae eius,

⁸quam superabundare fecit in nobisin omni sapientia et prudentia,

⁹notum faciens nobis mysterium voluntatis suae,secundum beneplacitum eius, quod proposuit in eo,

¹⁰in dispensationem plenitudinis temporum:recapitulare omnia in Christo,quae in caelis et quae in terra, in ipso;

¹¹in quo etiam sorte vocati sumus, praedestinati secundum propositum eius, qui omnia operatur secundum consilium voluntatis suae,

¹²ut simus in laudem gloriae eius, qui ante speravimus in Christo;

¹³in quo et vos cum audissetis verbum veritatis, evangelium salutis vestrae, in quo et credentes signati estis Spiritu promissionis Sancto,

¹⁴qui est arrabo hereditatis nostrae in redemptionem acquisitionis, in laudem gloriae ipsius.

¹⁵Propterea et ego audiens fidem vestram, quae est in Domino Iesu, et dilectionem in omnes sanctos,

¹⁶non cesso gratias agens pro vobis memoriam faciens in orationibus meis,

¹⁷ut Deus Domini nostri Iesu Christi, Pater gloriae, det vobis Spiritum sapientiae et revelationis in agnitione eius,

¹⁸illuminatos oculos cordis vestri, ut sciatis quae sit spes vocationis eius, quae divitiae gloriae hereditatis eius in sanctis,

¹⁹et quae sit supereminens magnitudo virtutis eius in nos, qui credimus, secundum operationem potentiae virtutis eius,

²⁰quam operatus est in Christo, suscitans illum a mortuis et constituens ad dexteram suam in caelestibus

²¹supra omnem principatum et potestatem et virtutem et dominationem et omne nomen, quod nominatur non solum in hoc saeculo sed et in futuro;

²²et omnia subiecit sub pedibus eius et ipsum dedit caput supra omnia ecclesiae,

²³quae est corpus ipsius, plenitudo eius, qui omnia in omnibus adimpletur.