Read Nova_Vulgata DC Epistula ad Colossenses 3 Bible Online

Epistula ad Colossenses 3 - Nova_Vulgata DC bible

Epistula ad Colossenses 3

¹Igitur, si conresurrexistis Chri sto, quae sursum sunt quaerite, ubi Christus est in dextera Dei sedens;

²quae sursum sunt sapite, non quae supra terram.

³Mortui enim estis, et vita vestra abscondita est cum Christo in Deo!

⁴Cum Christus apparuerit, vita vestra, tunc et vos apparebitis cum ipso in gloria.

⁵Mortificate ergo membra, quae sunt super terram: fornicationem, immunditiam, libidinem, concupiscentiam malam et avaritiam, quae est simulacrorum servitus,

⁶propter quae venit ira Dei super filios incredulitatis;

⁷in quibus et vos ambulastis aliquando, cum viveretis in illis.

⁸Nunc autem deponite et vos omnia: iram, indignationem, malitiam, blasphemiam, turpem sermonem de ore vestro;

⁹nolite mentiri invicem, qui exuistis vos veterem hominem cum actibus eius

¹⁰et induistis novum, eum, qui renovatur in agnitionem secundum imaginem eius, qui creavit eum,

¹¹ubi non est Graecus et Iudaeus, circumcisio et praeputium, barbarus, Scytha, servus, liber, sed omnia et in omnibus Christus.

¹²Induite vos ergo, sicut electi Dei, sancti et dilecti, viscera misericordiae, benignitatem, humilitatem, mansuetudinem, longanimitatem,

¹³supportantes invicem et donantes vobis ipsis, si quis adversus aliquem habet querelam; sicut et Dominus donavit vobis, ita et vos;

¹⁴super omnia autem haec: caritatem, quod est vinculum perfectionis.

¹⁵Et pax Christi dominetur in cordibus vestris, ad quam et vocati estis in uno corpore. Et grati estote.

¹⁶Verbum Christi habitet in vobis abundanter, in omni sapientia docentes et commonentes vosmetipsos psalmis, hymnis, canticis spiritalibus, in gratia cantantes in cordibus vestris Deo;

¹⁷et omne, quodcumque facitis in verbo aut in opere, omnia in nomine Domini Iesu gratias agentes Deo Patri per ipsum.

¹⁸Mulieres, subditae estote viris, sicut oportet in Domino.

¹⁹Viri, diligite uxores et nolite amari esse ad illas.

²⁰Filii, oboedite parentibus per omnia; hoc enim placitum est in Domino.

²¹Patres, nolite ad indignationem provocare filios vestros, ut non pusillo animo fiant.

²²Servi, oboedite per omnia dominis carnalibus, non ad oculum servientes, quasi hominibus placentes, sed in simplicitate cordis, timentes Dominum.

²³Quodcumque facitis, ex animo operamini sicut Domino et non hominibus,

²⁴scientes quod a Domino accipietis retributionem hereditatis. Domino Christo servite;

²⁵qui enim iniuriam facit, recipiet id quod inique gessit, et non est personarum acceptio.