Read Nova_Vulgata DC Epistula I ad Thessalonicenses 5 Bible Online

Epistula I ad Thessalonicenses 5 - Nova_Vulgata DC bible

Epistula I ad Thessalonicenses 5

¹De temporibus autem et mo mentis, fratres, non indigetis, ut scribatur vobis;

²ipsi enim diligenter scitis quia dies Domini, sicut fur in nocte, ita veniet.

³Cum enim dixerint: "Pax et securitas ", tunc repentinus eis superveniet interitus, sicut dolor in utero habenti, et non effugient.

⁴Vos autem, fratres, non estis in tenebris, ut vos dies ille tamquam fur comprehendat;

⁵omnes enim vos filii lucis estis et filii diei. Non sumus noctis neque tenebrarum;

⁶igitur non dormiamus sicut ceteri, sed vigilemus et sobrii simus.

⁷Qui enim dormiunt, nocte dormiunt; et, qui ebrii sunt, nocte inebriantur.

⁸Nos autem, qui diei sumus, sobrii simus, induti loricam fidei et caritatis et galeam spem salutis;

⁹quoniam non posuit nos Deus in iram sed in acquisitionem salutis per Dominum nostrum Iesum Christum,

¹⁰qui mortuus est pro nobis, ut sive vigilemus sive dormiamus, simul cum illo vivamus.

¹¹Propter quod consolamini invicem et aedificate alterutrum, sicut et facitis.

¹²Rogamus autem vos, fratres, ut noveritis eos, qui laborant inter vos et praesunt vobis in Domino et monent vos,

¹³ut habeatis illos superabundanter in caritate propter opus illorum. Pacem habete inter vos.

¹⁴Hortamur autem vos, fratres: corripite inquietos, consolamini pusillanimes, suscipite infirmos, longanimes estote ad omnes.

¹⁵Videte, ne quis malum pro malo alicui reddat, sed semper, quod bonum est, sectamini et in invicem et in omnes.

¹⁶Semper gaudete,

¹⁷sine intermissione orate,

¹⁸in omnibus gratias agite; haec enim voluntas Dei est in Christo Iesu erga vos.

¹⁹Spiritum nolite exstinguere,

²⁰prophetias nolite spernere;

²¹omnia autem probate, quod bonum est tenete,

²²ab omni specie mala abstinete vos.

²³Ipse autem Deus pacis sanctificet vos per omnia, et integer spiritus vester et anima et corpus sine querela in adventu Domini nostri Iesu Christi servetur.

²⁴Fidelis est, qui vocat vos, qui etiam faciet.

²⁵Fratres, orate etiam pro nobis.

²⁶Salutate fratres omnes in osculo sancto.

²⁷Adiuro vos per Dominum, ut legatur epistula omnibus fratribus.

²⁸Gratia Domini nostri Iesu Christi vobiscum.