Read Nova_Vulgata DC Iosue 3 Bible Online

Iosue 3 - Nova_Vulgata DC bible

Iosue 3

¹Igitur Iosue de nocte consur gens movit castra. Egredientes que de Settim venerunt ad Iordanem, ipse et omnes filii Israel; et morati sunt ibi, antequam transirent.

²Tribus diebus evolutis, transierunt praefecti per castrorum medium

³et praeceperunt populo: "Quando videritis arcam foederis Domini Dei vestri et sacerdotes stirpis leviticae portantes eam, vos quoque consurgite et sequimini eam

⁴- sitque inter vos et arcam spatium cubitorum duum fere milium, et cavete, ne appropinquetis ad eam - ut sciatis per quam viam ingrediamini, quia prius non ambulastis per eam".

⁵Dixitque Iosue ad populum: "Sanctificamini; cras enim faciet Dominus inter vos mirabilia".

⁶Et ait ad sacerdotes: "Tollite arcam foederis et praecedite populum". Qui tulerunt et ambulaverunt ante eos.

⁷Dixitque Dominus ad Iosue: "Hodie incipiam exaltare te coram omni Israel, ut sciant quod, sicut cum Moyse fui, ita et tecum sim.

⁸Tu autem praecipe sacerdotibus, qui portant arcam foederis, et dic eis: Cum veneritis ad oram aquae Iordanis, state in Iordane".

⁹Dixitque Iosue ad filios Israel: "Accedite huc et audite verba Domini Dei vestri".

¹⁰Et rursum: "In hoc, inquit, scietis quod Deus vivens in medio vestri est et disperdet in conspectu vestro Chananaeum et Hetthaeum, Hevaeum et Pherezaeum, Gergesaeum quoque et Amorraeum et Iebusaeum.

¹¹Ecce arca foederis Domini omnis terrae antecedet vos per Iordanem.

¹²Parate duodecim viros de tribubus Israel, singulos per singulas tribus;

¹³et cum posuerint vestigia pedum suorum sacerdotes, qui portant arcam Domini Dei universae terrae, in aquis Iordanis, aquae, quae inferiores sunt, decurrent, quae autem desuper veniunt, in una mole consistent".

¹⁴Igitur egressus est populus de tabernaculis suis, ut transiret Iordanem; et sacerdotes, qui portabant arcam foederis, pergebant ante eum.

¹⁵Veneruntque usque ad Iordanem et, pedibus eorum in ora aquae tinctis - Iordanis autem omnes ripas alvei sui toto tempore messis impleverat -

¹⁶steterunt aquae desuper descendentes in loco uno instar molis procul valde apud urbem, quae vocatur Adam, ex latere Sarthan; quae autem inferiores erant, in mare Arabae, quod est mare Salsissimum, descenderunt, usquequo omnino deficerent.

¹⁷Populus autem incedebat contra Iericho, et sacerdotes, qui portabant arcam foederis Domini, stabant super siccam humum in medio Iordanis firmiter, donec omnis Israel compleret per arentem alveum transitum Iordanis.