Read Nova_Vulgata DC Iosue 4 Bible Online

Iosue 4 - Nova_Vulgata DC bible

Iosue 4

¹Quibus transgressis, dixit Dominus ad Iosue:

²" Sumite vobis de populo duodecim viros singulos per singulas tribus

³et praecipite eis, ut tollant de medio Iordanis alveo, ubi firmiter steterunt sacerdotum pedes, duodecim lapides; quos portabitis vobiscum et ponetis in loco castrorum, ubi fixeritis hac nocte tentoria".

⁴Vocavitque Iosue duodecim viros, quos elegerat de filiis Israel, singulos de tribubus singulis,

⁵et ait ad eos: "Ite ante arcam Domini Dei vestri ad Iordanis medium et portate singuli singulos lapides in umeris vestris, iuxta numerum tribuum filiorum Israel,

⁶ut sit hoc signum inter vos. Quando interrogaverint vos filii vestri cras dicentes: "Quid sibi volunt isti lapides?",

⁷respondebitis eis: Defecerunt aquae Iordanis ante arcam foederis Domini, cum transiret eum; idcirco positi sunt lapides isti in monumentum filiis Israel usque in aeternum".

⁸Fecerunt ergo filii Israel, sicut eis praecepit Iosue, portantes de medio Iordanis alveo duodecim lapides, ut ei Dominus imperarat, iuxta numerum tribuum filiorum Israel, usque ad locum, in quo castrametati sunt; ibique posuerunt eos.

⁹Alios quoque duodecim lapides posuit Iosue in medio Iordanis alveo, ubi steterunt sacerdotes, qui portabant arcam foederis; et sunt ibi usque in praesentem diem.

¹⁰Sacerdotes autem, qui portabant arcam, stabant in Iordanis medio, donec omnia complerentur, quae Iosue ut loqueretur ad populum praeceperat Dominus secundum omnia, quae dixerat ei Moyses. Festinavitque populus et transiit.

¹¹Cumque transissent omnes, transivit et arca Domini; sacerdotesque pergebant ante populum.

¹²Filii quoque Ruben et Gad et dimidia tribus Manasse armati praecedebant filios Israel, sicut eis praeceperat Moyses;

¹³quadraginta fere milia expeditorum ad pugnam incedebant coram Domino in campestria Iericho.

¹⁴In illo die magnificavit Dominus Iosue coram omni Israel, ut timerent eum, sicut timuerant Moysen, omnibus diebus vitae suae.

¹⁵Dixitque ad eum:

¹⁶" Praecipe sacerdotibus, qui portant arcam testimonii, ut ascendant de Iordane".

¹⁷Qui praecepit eis dicens: "Ascendite de Iordane".

¹⁸Cumque ascendissent portantes arcam foederis Domini et siccam humum calcare coepissent, reversae sunt aquae in alveum suum et fluebant sicut ante super omnes ripas suas.

¹⁹Populus autem ascendit de Iordane decimo die mensis primi, et castrametati sunt in Galgalis, in termino orientali Iericho.

²⁰Duodecim quoque lapides, quos de Iordanis alveo sumpserant, posuit Iosue in Galgalis.

²¹Et dixit ad filios Israel: "Quando interrogaverint filii vestri cras patres suos et dixerint eis: "Quid sibi volunt isti lapides?",

²²docebitis eos atque dicetis: Per arentem alveum transivit Israel Iordanem istum,

²³siccante Domino Deo vestro aquas eius in conspectu vestro, donec transiretis,

²⁴sicut fecerat prius in mari Rubro, quod siccavit coram nobis, donec transiremus,

²⁵ut cognoscant omnes terrarum populi fortissimam Domini manum, et ut vos timeatis Dominum Deum vestrum omni tempore".