Read Nova_Vulgata DC Epistula I ad Timotheum 6 Bible Online

Epistula I ad Timotheum 6 - Nova_Vulgata DC bible

Epistula I ad Timotheum 6

¹Quicumque sunt sub iugo, servi dominos suos omni honore di gnos arbitrentur, ne nomen Dei et doctrina blasphemetur.

²Qui autem fideles habent dominos, non contemnant, quia fratres sunt, sed magis serviant, quia fideles sunt et dilecti, qui beneficii participes sunt. Haec doce et exhortare.

³Si quis aliter docet et non accedit sanis sermonibus Domini nostri Iesu Christi et ei, quae secundum pietatem est, doctrinae,

⁴superbus est, nihil sciens, sed languens circa quaestiones et pugnas verborum, ex quibus oriuntur invidiae, contentiones, blasphemiae, suspiciones malae,

⁵conflictationes hominum mente corruptorum et qui veritate privati sunt, existimantium quaestum esse pietatem.

⁶Est autem quaestus magnus pietas cum sufficientia.

⁷Nihil enim intulimus in mundum, quia nec auferre quid possumus;

⁸habentes autem alimenta et quibus tegamur, his contenti erimus.

⁹Nam qui volunt divites fieri, incidunt in tentationem et laqueum et desideria multa stulta et nociva, quae mergunt homines in interitum et perditionem;

¹⁰radix enim omnium malorum est cupiditas, quam quidam appetentes erraverunt a fide et inseruerunt se doloribus multis.

¹¹Tu autem, o homo Dei, haec fuge; sectare vero iustitiam, pietatem, fidem, caritatem, patientiam, mansuetudinem.

¹²Certa bonum certamen fidei, apprehende vitam aeternam, ad quam vocatus es, et confessus es bonam confessionem coram multis testibus.

¹³Praecipio tibi coram Deo, qui vivificat omnia, et Christo Iesu, qui testimonium reddidit sub Pontio Pilato bonam confessionem,

¹⁴ut serves mandatum sine macula irreprehensibile usque in adventum Domini nostri Iesu Christi,

¹⁵quem suis temporibus ostendet beatus et solus potens, Rex regnantium et Dominus dominantium,

¹⁶qui solus habet immortalitatem, lucem habitans inaccessibilem, quem vidit nullus hominum nec videre potest; cui honor et imperium sempiternum. Amen.

¹⁷Divitibus huius saeculi praecipe non superbe sapere neque sperare in incerto divitiarum sed in Deo, qui praestat nobis omnia abunde ad fruendum,

¹⁸bene agere, divites fieri in operibus bonis, facile tribuere, communicare,

¹⁹thesaurizare sibi fundamentum bonum in futurum, ut apprehendant veram vitam.

²⁰O Timothee, depositum custodi, devitans profanas vocum novitates et oppositiones falsi nominis scientiae,

²¹quam quidam profitentes circa fidem aberraverunt.Gratia vobiscum.