Read Nova_Vulgata DC Epistula II ad Timotheum 2 Bible Online

Epistula II ad Timotheum 2 - Nova_Vulgata DC bible

Epistula II ad Timotheum 2

¹Tu ergo, fili mi, confortare in gratia, quae est in Christo Iesu;

²et quae audisti a me per multos testes, haec commenda fidelibus hominibus, qui idonei erunt et alios docere.

³Collabora sicut bonus miles Christi Iesu.

⁴Nemo militans implicat se saeculi negotiis, ut ei placeat, qui eum elegit;

⁵si autem certat quis agone, non coronatur nisi legitime certaverit.

⁶Laborantem agricolam oportet primum de fructibus accipere.

⁷Intellege, quae dico; dabit enim tibi Dominus in omnibus intellectum.

⁸Memor esto Iesum Christum resuscitatum esse a mortuis, ex semine David, secundum evangelium meum,

⁹in quo laboro usque ad vincula quasi male operans; sed verbum Dei non est alligatum!

¹⁰Ideo omnia sustineo propter electos, ut et ipsi salutem consequantur, quae est in Christo Iesu cum gloria aeterna.

¹¹Fidelis sermo, Nam, si commortui sumus, et convivemus;

¹²si sustinemus, et conregnabimus; si negabimus, et ille negabit nos;

¹³si non credimus, ille fidelis manet, negare enim seipsum non potest.

¹⁴Haec commone testificans coram Deo verbis non contendere: in nihil utile est, nisi ad subversionem audientium.

¹⁵Sollicite cura teipsum probabilem exhibere Deo, operarium inconfusibilem, recte tractantem verbum veritatis.

¹⁶Profana autem inaniloquia devita, magis enim proficient ad impietatem,

¹⁷et sermo eorum ut cancer serpit; ex quibus est Hymenaeus et Philetus,

¹⁸qui circa veritatem aberraverunt dicentes resurrectionem iam factam, et subvertunt quorundam fidem.

¹⁹Sed firmum fundamentum Dei stat habens signaculum hoc: Cognovit Dominus, qui sunt eius, et: Discedat ab iniquitate omnis, qui nominat nomen Domini.

²⁰In magna autem domo non solum sunt vasa aurea et argentea sed et lignea et fictilia, et quaedam quidem in honorem, quaedam autem in ignominiam;

²¹si quis ergo emundaverit se ab istis, erit vas in honorem, sanctificatum, utile Domino, ad omne opus bonum paratum.

²²Iuvenilia autem desideria fuge, sectare vero iustitiam, fidem, caritatem, pacem cum his, qui invocant Dominum de corde puro.

²³Stultas autem et sine disciplina quaestiones devita, sciens quia generant lites;

²⁴servum autem Domini non oportet litigare, sed mansuetum esse ad omnes, aptum ad docendum, patientem,

²⁵cum mansuetudine corripientem eos, qui resistunt, si quando det illis Deus paenitentiam ad cognoscendam veritatem,

²⁶et resipiscant a Diaboli laqueo, a quo capti tenentur ad ipsius voluntatem.