Read Nova_Vulgata DC Epistula ad Titum 1 Bible Online

Epistula ad Titum 1 - Nova_Vulgata DC bible

Epistula ad Titum 1

¹Paulus servus Dei, apostolus autem Iesu Christi secundum fi dem electorum Dei et agnitionem veritatis, quae secundum pietatem est

²in spem vitae aeternae, quam promisit, qui non mentitur, Deus ante tempora saecularia;

³manifestavit autem temporibus suis verbum suum in praedicatione, quae credita est mihi secundum praeceptum salvatoris nostri Dei,

⁴Tito germano filio secundum communem fidem: gratia et pax a Deo Patre et Christo Iesu salvatore nostro.

⁵Huius rei gratia reliqui te Cretae, ut ea, quae desunt, corrigas et constituas per civitates presbyteros, sicut ego tibi disposui,

⁶si quis sine crimine est, unius uxoris vir, filios habens fideles, non in accusatione luxuriae aut non subiectos.

⁷Oportet enim episcopum sine crimine esse sicut Dei dispensatorem, non superbum, non iracundum, non vinolentum, non percussorem, non turpis lucri cupidum,

⁸sed hospitalem, benignum, sobrium, iustum, sanctum, continentem,

⁹amplectentem eum, qui secundum doctrinam est, fidelem sermonem, ut potens sit et exhortari in doctrina sana et eos, qui contradicunt, arguere.

¹⁰Sunt enim multi et non subiecti, vaniloqui et seductores, maxime qui de circumcisione sunt,

¹¹quibus oportet silentium imponere, quia universas domos subvertunt docentes, quae non oportet, turpis lucri gratia.

¹²Dixit quidam ex illis, proprius ipsorum propheta: "Cretenses semper mendaces, malae bestiae, ventres pigri".

¹³Testimonium hoc verum est. Quam ob causam increpa illos dure, ut sani sint in fide,

¹⁴non intendentes Iudaicis fabulis et mandatis hominum aversantium veritatem.

¹⁵Omnia munda mundis; coinquinatis autem et infidelibus nihil mundum, sed inquinatae sunt eorum et mens et conscientia.

¹⁶Confitentur se nosse Deum, factis autem negant, cum sunt abominati et inoboedientes et ad omne opus bonum reprobi.