Read Nova_Vulgata DC Epistula ad Philemonem 1 Bible Online

Epistula ad Philemonem 1 - Nova_Vulgata DC bible

Epistula ad Philemonem 1

¹Paulus vinctus Christi Iesu et Timotheus frater Philemoni dilecto et adiutori nostro

²et Apphiae sorori et Archippo commilitoni nostro et ecclesiae, quae in domo tua est:

³gratia vobis et pax a Deo Patre nostro et Domino Iesu Christo.

⁴Gratias ago Deo meo semper memoriam tui faciens in orationibus meis,

⁵audiens caritatem tuam et fidem, quam habes in Dominum Iesum et in omnes sanctos,

⁶ut communio fidei tuae evidens fiat in agnitione omnis boni, quod est in nobis in Christum;

⁷gaudium enim magnum habui et consolationem in caritate tua, quia viscera sanctorum requieverunt per te, frater.

⁸Propter quod multam fiduciam habens in Christo imperandi tibi, quod ad rem pertinet,

⁹propter caritatem magis obsecro, cum sim talis ut Paulus senex, nunc autem et vinctus Christi Iesu;

¹⁰obsecro te de meo filio, quem genui in vinculis, Onesimo,

¹¹qui tibi aliquando inutilis fuit, nunc autem et tibi et mihi utilis,

¹²quem remisi tibi: eum, hoc est viscera mea;

¹³quem ego volueram mecum detinere, ut pro te mihi ministraret in vinculis evangelii.

¹⁴Sine consilio autem tuo nihil volui facere, uti ne velut ex necessitate bonum tuum esset sed voluntarium.

¹⁵Forsitan enim ideo discessit ad horam, ut aeternum illum reciperes,

¹⁶iam non ut servum sed plus servo, carissimum fratrem, maxime mihi, quanto autem magis tibi et in carne et in Domino.

¹⁷Si ergo habes me socium, suscipe illum sicut me.

¹⁸Si autem aliquid nocuit tibi aut debet, hoc mihi imputa.

¹⁹Ego Paulus scripsi mea manu, ego reddam; ut non dicam tibi quod et teipsum mihi debes.

²⁰Ita, frater! Ego te fruar in Domino; refice viscera mea in Christo!

²¹Confidens oboedientia tua scripsi tibi, sciens quoniam et super id, quod dico, facies.

²²Simul autem et para mihi hospitium, nam spero per orationes vestras donari me vobis.

²³Salutat te Epaphras, concaptivus meus in Christo Iesu,

²⁴Marcus, Aristarchus, Demas, Lucas, adiutores mei.

²⁵Gratia Domini Iesu Christi cum spiritu vestro.