Read Nova_Vulgata DC Epistula I Ioannis 4 Bible Online

Epistula I Ioannis 4 - Nova_Vulgata DC bible

Epistula I Ioannis 4

¹Carissimi, nolite omni spiritui credere, sed probate spiritus si ex Deo sint, quoniam multi pseudoprophetae prodierunt in mundum.

²In hoc cognoscitis Spiritum Dei: omnis spiritus, qui confitetur Iesum Christum in carne venisse, ex Deo est.

³Et omnis spiritus, qui non confitetur Iesum, ex Deo non est; et hoc est antichristi, quod audistis quoniam venit, et nunc iam in mundo est.

⁴Vos ex Deo estis, filioli, et vicistis eos, quoniam maior est, qui in vobis est, quam qui in mundo.

⁵Ipsi ex mundo sunt; ideo ex mundo loquuntur, et mundus eos audit.

⁶Nos ex Deo sumus. Qui cognoscit Deum, audit nos; qui non est ex Deo, non audit nos. Ex hoc cognoscimus Spiritum veritatis et spiritum erroris.

⁷Carissimi, diligamus invicem, quoniam caritas ex Deo est; et omnis, qui diligit, ex Deo natus est et cognoscit Deum.

⁸Qui non diligit, non cognovit Deum, quoniam Deus caritas est.

⁹In hoc apparuit caritas Dei in nobis, quoniam Filium suum unigenitum misit Deus in mundum, ut vivamus per eum.

¹⁰In hoc est caritas, non quasi nos dilexerimus Deum, sed quoniam ipse dilexit nos et misit Filium suum propitiationem pro peccatis nostris.

¹¹Carissimi, si sic Deus dilexit nos, et nos debemus alterutrum diligere.

¹²Deum nemo vidit umquam; si diligamus invicem, Deus in nobis manet, et caritas eius in nobis consummata est.

¹³In hoc cognoscimus quoniam in ipso manemus, et ipse in nobis, quoniam de Spiritu suo dedit nobis.

¹⁴Et nos vidimus et testificamur quoniam Pater misit Filium salvatorem mundi.

¹⁵Quisque confessus fuerit: "Iesus est Filius Dei ", Deus in ipso manet, et ipse in Deo.

¹⁶Et nos, qui credidimus, novimus caritatem, quam habet Deus in nobis. Deus caritas est; et, qui manet in caritate, in Deo manet, et Deus in eo manet.

¹⁷In hoc consummata est caritas nobiscum, ut fiduciam habeamus in die iudicii; quia sicut ille est, et nos sumus in hoc mundo.

¹⁸Timor non est in caritate, sed perfecta caritas foras mittit timorem, quoniam timor poenam habet; qui autem timet, non est consummatus in caritate.

¹⁹Nos diligimus, quoniam ipse prior dilexit nos.

²⁰Si quis dixerit: "Diligo Deum ", et fratrem suum oderit, mendax est; qui enim non diligit fratrem suum, quem videt, Deum, quem non videt, non potest diligere.

²¹Et hoc mandatum habemus ab eo, ut, qui diligit Deum, diligat et fratrem suum.