Read Nova_Vulgata DC Iudicum 21 Bible Online

Iudicum 21 - Nova_Vulgata DC bible

Iudicum 21

¹Iuraverunt autem filii Israel in Maspha et dixerunt: "Nullus nostrum dabit filiis Beniamin de filiabus suis uxorem".

²Venitque populus in Bethel, et in conspectu Dei sedentes usque ad vesperam levaverunt vocem et magno ululatu coeperunt flere dicentes:

³" Quare, Domine, Deus Israel, factum est hoc in populo tuo, ut hodie una tribus auferretur de Israel?".

⁴Altera autem die diluculo consurgentes exstruxerunt altare obtuleruntque ibi holocausta et pacificas victimas

⁵et dixerunt: "Quis non ascendit in congregationem ad Dominum de universis tribubus Israel?". Grandi enim se iuramento constrinxerant interfici eos, qui non ascendissent ad Dominum in Maspha.

⁶Ductique paenitentia filii Israel super fratre suo Beniamin coeperunt dicere: "Ablata est hodie una tribus de Israel.

⁷Quid faciemus, ut, qui remanserunt, uxores accipiant? Omnes enim in commune iuravimus per Dominum non daturos nos his filias nostras".

⁸Idcirco dixerunt: "Quis est de universis tribubus Israel, qui non ascendit ad Dominum in Maspha?". Et ecce nemo de Iabes Galaad in castra venerat ad congregationem,

⁹et, cum populus recenseretur, nullus ex eis repertus est.

¹⁰Misit itaque coetus decem milia viros robustissimos et praeceperunt eis: "Ite et percutite habitatores Iabes Galaad in ore gladii tam uxores quam parvulos eorum.

¹¹Et hoc erit, quod observare debetis: Omne generis masculini et mulieres, quae cognoverunt viros, interficite; virgines autem reservate".

¹²Inventaeque sunt de Iabes Galaad quadringentae virgines, quae nescierunt viri torum, et adduxerunt eas in castra in Silo in terra Chanaan.

¹³Misitque coetus nuntios ad filios Beniamin, qui erant in petra Remmon, et dederunt eis pacem.

¹⁴Veneruntque filii Beniamin in illo tempore, et datae sunt eis uxores de filiabus Iabes Galaad; alias autem non reppererunt, quas simili modo traderent.

¹⁵Populusque valde doluit de Beniamin, quia fecerat Dominus confractionem in tribubus Israel.

¹⁶Dixeruntque seniores coetus: "Quid faciemus reliquis, qui non acceperunt uxores? Omnes in Beniamin feminae conciderunt".

¹⁷Et dixerunt: "Possessio eorum, qui effugerunt, erit Beniamin, ne una tribus deleatur ex Israel.

¹⁸Filias autem nostras eis dare non possumus, constricti hoc iuramento: Maledictus, qui dederit de filiabus suis uxorem Beniamin!".

¹⁹Ceperuntque consilium atque dixerunt: "Ecce sollemnitas Domini est in Silo anniversaria, quae sita est ad septentrionem urbis Bethel et ad orientalem plagam viae, quae de Bethel tendit ad Sichimam et ad meridiem oppidi Lebona".

²⁰Praeceperuntque filiis Beniamin atque dixerunt: "Ite et latitate in vineis;

²¹cumque videritis filias Silo ad ducendos choros ex more procedere, exite repente de vineis et rapite ex eis singuli uxores singulas et pergite in terram Beniamin".

²²Cumque venerint patres earum ac fratres et apud nos queri coeperint, dicemus eis: "Miseremini nostri et eorum; non enim acceperunt unusquisque uxorem in bello, et vos, si dedissetis eis, deliquissetis".

²³Feceruntque filii Beniamin, ut sibi fuerat imperatum, et iuxta numerum suum rapuerunt sibi de his, quae ducebant choros, uxores singulas; abieruntque in possessionem suam aedificantes urbes et habitantes in eis.

²⁴Filii quoque Israel reversi sunt inde illo tempore unusquisque ad tribum et familiam suam in possessionem suam.

²⁵In diebus illis non erat rex in Israel, sed unusquisque, quod sibi rectum videbatur, hoc faciebat.