Read Nova_Vulgata DC Iudicum 3 Bible Online

Iudicum 3 - Nova_Vulgata DC bible

Iudicum 3

¹Hae sunt gentes, quas Dominus dereliquit, ut erudiret in eis Is raelem, omnes, qui non noverant bella Chananaeorum,

²ut discerent certare cum hostibus generationes filiorum Israel, quae non habebant consuetudinem proeliandi:

³quinque satrapae Philisthinorum omnisque Chananaeus et Sidonius atque Hevaeus, qui habitabat in monte Libano de monte Baalhermon usque ad introitum Emath.

⁴Dimisitque eos, ut in ipsis experiretur Israelem, utrum audiret mandata Domini, quae praeceperat patribus eorum per manum Moysi, an non.

⁵Itaque filii Israel habitaverunt in medio Chananaei et Hetthaei et Amorraei et Pherezaei et Hevaei et Iebusaei

⁶et duxerunt uxores filias eorum, ipsique filias suas eorum filiis tradiderunt, et servierunt diis eorum.

⁷Feceruntque filii Israel malum in conspectu Domini et obliti sunt Domini Dei sui servientes Baalim et Astharoth.

⁸Iratusque Dominus contra Israel tradidit eos in manus Chusanrasathaim regis Mesopotamiae, servieruntque ei octo annis.

⁹Et clamaverunt ad Dominum, qui suscitavit eis salvatorem et liberavit eos, Othoniel videlicet filium Cenez fratrem Chaleb minorem.

¹⁰Fuitque in eo spiritus Domini, et iudicavit Israelem egressusque est ad pugnam; et tradidit Dominus in manu eius Chusanrasathaim regem Mesopotamiae, et praevaluit adversus eum.

¹¹Quievitque terra quadraginta annis, et mortuus est Othoniel filius Cenez.

¹²Addiderunt autem filii Israel facere malum in conspectu Domini, qui confortavit adversum eos Eglon regem Moab, quia fecerunt malum in conspectu Domini.

¹³Et copulavit sibi Eglon filios Ammon et Amalec abiitque et percussit Israel atque possedit urbem Palmarum.

¹⁴Servieruntque filii Israel Eglon regi Moab decem et octo annis.

¹⁵Et clamaverunt filii Israel ad Dominum, qui suscitavit eis salvatorem Aod filium Gera de Beniamin, qui sinistra manu utebatur pro dextera. Miseruntque filii Israel per illum munera Eglon regi Moab.

¹⁶Fecitque Aod sibi gladium ancipitem longitudinis palmae manus et accinctus est eo subter vestem in dextro femore

¹⁷obtulitque munera Eglon regi Moab. Erat autem Eglon crassus nimis.

¹⁸Cumque obtulisset ei munera, dimisit socios, qui illa portaverant;

¹⁹et reversus de Galgalis, ubi erant idola, dixit ad regem: "Verbum secretum habeo ad te, o rex". Et ille imperavit silentium; egressique sunt omnes, qui circa eum erant.

²⁰Aod autem ingressus erat ad eum, cum sederet in aestivo cenaculo, quod ipsi soli erat, dixitque: "Verbum Dei habeo ad te". Qui statim surrexit de throno.

²¹Extenditque Aod manum sinistram et tulit sicam de dextro femore suo infixitque eam in ventre eius

²²tam valide, ut capulus ferrum sequeretur in vulnere ac pinguissimo adipe stringeretur. Nec eduxit gladium, sed ita, ut percusserat, reliquit in corpore; statimque per secreta naturae alvi stercora proruperunt.

²³Aod autem egressus in atrium clausit ostium cenaculi post se et obfirmavit sera.

²⁴Egresso illo, servi regis venerunt et, cum viderent clausas fores cenaculi, dixerunt: "Certe purgat alvum in aestivo cubiculo".

²⁵Exspectantesque diu, donec erubescerent, et videntes quod nullus aperiret, tulerunt clavem et aperientes invenerunt dominum suum iacentem in terra mortuum.

²⁶Aod autem, dum illi cunctarentur, effugerat et pertransiit locum idolorum, unde reversus fuerat, venitque in Seira.

²⁷Et statim insonuit bucina in monte Ephraim; descenderuntque cum eo filii Israel, ipso in fronte gradiente.

²⁸Qui dixit ad eos: "Sequimini me; tradidit enim Dominus inimicos vestros Moabitas in manus vestras". Descenderuntque post eum et occupaverunt vada Iordanis, quae transmittunt in Moab, et non dimiserunt transire quemquam,

²⁹sed percusserunt Moabitas in tempore illo circiter decem milia, omnes robustos et fortes viros. Nullus eorum evadere potuit.

³⁰Humiliatusque est Moab die illo sub manu Israel; et quievit terra octoginta annis.

³¹Post hunc fuit Samgar filius Anath, qui percussit de Philisthim sescentos viros stimulo boum; et ipse quoque salvum fecit Israel.