Read Nova_Vulgata DC Iudicum 8 Bible Online

Iudicum 8 - Nova_Vulgata DC bible

Iudicum 8

¹Dixeruntque ad eum viri Ephraim: "Quid est hoc quod nobis facere voluisti, ut non nos vocares, cum ad pugnam pergeres contra Madian? ", iurgantes fortiter et prope vim inferentes.

²Quibus ille respondit: "Quid enim tale facere potui, quale vos fecistis? Nonne melior est racemus Ephraim vindemiis Abiezer?

³In manus vestras Deus tradidit principes Madian Oreb et Zeb. Quid tale facere potui, quale vos fecistis?". Quod cum locutus esset, requievit spiritus eorum, quo tumebant contra eum.

⁴Cumque venisset Gedeon ad Iordanem, transivit eum cum trecentis viris, qui secum erant et prae lassitudine fugientes persequi vix poterant.

⁵Dixitque ad viros Succoth: "Date, obsecro, panes populo, qui mecum est, quia valde defecerunt, et ego persequor Zebee et Salmana reges Madian".

⁶Responderunt principes Succoth: "Forsitan palmae manuum Zebee et Salmana in manu tua sunt, ut demus exercitui tuo panes?".

⁷Quibus ille ait: "Cum ergo tradiderit Dominus Zebee et Salmana in manus meas, triturabo carnes vestras cum spinis deserti et tribulis".

⁸Et inde conscendens venit in Phanuel locutusque est ad viros eius loci similia. Cui et illi responderunt, sicut responderant viri Succoth.

⁹Dixit itaque et eis: "Cum reversus fuero in pace, destruam turrim hanc".

¹⁰Zebee autem et Salmana requiescebant in Carcar cum omni exercitu suo, quasi quindecim milia viri, qui remanserant ex omnibus turmis orientalium populorum, caesis centum viginti milibus bellatorum educentium gladium.

¹¹Ascendensque Gedeon per viam eorum, qui in tabernaculis morabantur ad orientalem partem Nobe et Iegbaa, percussit castra hostium, qui securi erant et nihil adversi suspicabantur.

¹²Fugeruntque Zebee et Salmana. Persequens Gedeon comprehendit duos reges Madian Zebee et Salmana, turbato omni exercitu eorum.

¹³Revertensque Gedeon filius Ioas de bello per ascensum Hares,

¹⁴apprehendit puerum de viris Succoth interrogavitque eum nomina principum et seniorum Succoth, qui scripsit ei septuaginta septem viros.

¹⁵Venitque ad viros Succoth et dixit eis: "En Zebee et Salmana, super quibus exprobrastis mihi dicentes: "Forsitan manus Zebee et Salmana in manibus tuis sunt, ut demus viris tuis, qui lassi sunt, panes?".

¹⁶Tulit ergo seniores civitatis et spinas deserti ac tribulos; et trituravit cum eis viros Succoth.

¹⁷Turrim quoque Phanuel subvertit, occisis habitatoribus civitatis.

¹⁸Dixitque ad Zebee et Salmana: "Quales fuerunt viri, quos occidistis in Thabor?". Qui responderunt: "Similes tui, et unusquisque ex eis quasi filius regis".

¹⁹Quibus ille ait: "Fratres mei fuerunt, filii matris meae. Vivit Dominus, si servassetis eos, non vos occiderem!".

²⁰Dixitque Iether primogenito suo: "Surge et interfice eos!". Qui non eduxit gladium; timebat enim, quia adhuc puer erat.

²¹Dixeruntque Zebee et Salmana: "Tu surge et irrue in nos, quia iuxta aetatem robur est hominis". Surrexit Gedeon et interfecit Zebee et Salmana et tulit lunulas, quibus colla camelorum eorum decorata erant.

²²Dixeruntque viri Israel ad Gedeon: "Dominare nostri, tu et filius tuus et filius filii tui, quia liberasti nos de manu Madian".

²³Quibus ille ait: "Non dominabor vestri, nec dominabitur in vos filius meus, sed dominabitur Dominus".

²⁴Dixitque ad eos: "Unam petitionem postulo a vobis: date mihi unusquisque anulum ex praeda sua". Anulos enim aureos Ismaelitae habere consuerant.

²⁵Qui responderunt: "Libentissime dabimus". Expandentesque super terram pallium proiecerunt in eo unusquisque anulum de praeda sua.

²⁶Et fuit pondus postulatorum anulorum mille septingenti auri sicli absque lunulis et inauribus et vestibus purpureis, quibus Madian reges uti soliti erant, et praeter torques camelorum.

²⁷Fecitque ex eo Gedeon ephod et posuit illud in civitate sua Ephra. Fornicatusque est omnis Israel in eo, et factum est Gedeoni et omni domui eius in ruinam.

²⁸Humiliatus est autem Madian coram filiis Israel, nec potuerunt ultra elevare cervices, sed quievit terra per quadraginta annos, quibus Gedeon vivebat.

²⁹Abiit itaque Ierobbaal filius Ioas et habitavit in domo sua;

³⁰habuitque Gedeon septuaginta filios, qui egressi sunt de femore eius, eo quod multas haberet uxores.

³¹Concubina quoque illius, quam habebat in Sichem, genuit ei filium, cui ipse nomen imposuit Abimelech.

³²Mortuusque est Gedeon filius Ioas in senectute bona et sepultus est in sepulcro Ioas patris sui in Ephra filiorum Abiezer.

³³Postquam autem mortuus est Gedeon, aversi sunt filii Israel et fornicati cum Baalim posuerunt sibi Baalberith in deum.

³⁴Nec recordati sunt Domini Dei sui, qui eruit eos de manu omnium inimicorum suorum per circuitum,

³⁵nec fecerunt misericordiam cum domo Ierobbaal Gedeon iuxta omnia bona, quae fecerat Israeli.