Read Nova_Vulgata DC Apocalypsis Ioannis 6 Bible Online

Apocalypsis Ioannis 6 - Nova_Vulgata DC bible

Apocalypsis Ioannis 6

¹Et vidi, cum aperuisset Agnus unum de septem sigillis, et audi vi unum de quattuor animalibus dicens tamquam voce tonitrui: "Veni".

²Et vidi: et ecce equus albus; et, qui sedebat super illum, habebat arcum, et data est ei corona, et exivit vincens et ut vinceret.

³Et cum aperuisset sigillum secundum, audivi secundum animal dicens: "Veni".

⁴Et exivit alius equus rufus; et, qui sedebat super illum, datum est ei, ut sumeret pacem de terra, et ut invicem se interficiant; et datus est illi gladius magnus.

⁵Et cum aperuisset sigillum tertium, audivi tertium animal dicens: "Veni. Et vidi: et ecce equus niger; et, qui sedebat super eum, habebat stateram in manu sua.

⁶Et audivi tamquam vocem in medio quattuor animalium dicentem: "Bilibris tritici denario, et tres bilibres hordei denario; et oleum et vinum ne laeseris".

⁷Et cum aperuisset sigillum quartum, audivi vocem quarti animalis dicentis: "Veni".

⁸Et vidi: et ecce equus pallidus; et, qui sedebat desuper, nomen illi Mors, et Infernus sequebatur eum; et data est illis potestas super quartam partem terrae interficere gladio et fame et morte et a bestiis terrae.

⁹Et cum aperuisset quintum sigillum, vidi subtus altare animas interfectorum propter verbum Dei et propter testimonium, quod habebant.

¹⁰Et clamaverunt voce magna dicentes: "Usquequo, Domine, sanctus et verus, non iudicas et vindicas sanguinem nostrum de his, qui habitant in terra?".

¹¹Et datae sunt illis singulae stolae albae; et dictum est illis, ut requiescant tempus adhuc modicum, donec impleantur et conservi eorum et fratres eorum, qui interficiendi sunt sicut et illi.

¹²Et vidi, cum aperuisset sigillum sextum, et terraemotus factus est magnus, et sol factus est niger tamquam saccus cilicinus, et luna tota facta est sicut sanguis,

¹³et stellae caeli ceciderunt in terram, sicut ficus mittit grossos suos, cum vento magno movetur,

¹⁴et caelum recessit sicut liber involutus, et omnis mons et insula de locis suis motae sunt.

¹⁵Et reges terrae et magnates et tribuni et divites et fortes et omnis servus et liber absconderunt se in speluncis et in petris montium;

¹⁶et dicunt montibus et petris: "Cadite super nos et abscondite nos a facie sedentis super thronum et ab ira Agni,

¹⁷quoniam venit dies magnus irae ipsorum, et quis poterit stare?".