Read Nova_Vulgata DC Ruth 4 Bible Online

Ruth 4 - Nova_Vulgata DC bible

Ruth 4

¹Ascendit ergo Booz ad portam et sedit ibi. Cumque vidisset propinquum praeterire, de quo locutus erat, dixit ad eum: "Declina paulisper et sede hic ", vocans eum nomine suo. Qui divertit et sedit.

²Tollens autem Booz decem viros de senioribus civitatis dixit ad eos: "Sedete hic".

³Quibus sedentibus, locutus est ad propinquum: "Partem agri fratris nostri Elimelech vendit Noemi, quae reversa est de regione Moabitide.

⁴Quod audire te volui et tibi dicere: Coram cunctis sedentibus et maioribus natu de populo meo, si vis possidere iure propinquitatis, eme et posside; sin autem tibi displicet, hoc ipsum indica mihi, ut sciam quid facere debeam. Nullus est enim propinquus, excepto te, qui prior es, et me, qui secundus sum". At ille respondit: "Ego agrum emam".

⁵Cui dixit Booz: "Quando emeris agrum de manu Noemi, Ruth quoque Moabitidem, quae uxor defuncti fuit, debes accipere, ut suscites nomen defuncti propinqui tui in hereditate sua".

⁶Qui respondit: "Cedo iure propinquitatis; neque enim possessionem familiae meae delere debeo. Tu meo utere privilegio, quo me libenter carere profiteor".

⁷Hic autem erat mos antiquitus in Israel pro redemptione et commutatione: ut esset firma concessio, solvebat homo calceamentum suum et dabat proximo suo. Hoc erat testimonium cessionis in Israel.

⁸Dixit ergo propinquus ad Booz: "Eme tibi". Et solvit calceamentum suum de pede suo.

⁹Et Booz maioribus natu et universo populo: "Testes, inquit, vos estis hodie quod acquisierim omnia, quae fuerunt Elimelech et Chelion et Mahalon, tradente Noemi,

¹⁰et etiam Ruth Moabitidem uxorem Mahalon in coniugium sumpserim, ut suscitem nomen defuncti in hereditate sua, ne vocabulum eius de fratribus suis et de porta loci sui deleatur. Vos, inquam, huius rei hodie testes estis".

¹¹Respondit omnis populus, qui erat in porta, et maiores natu: "Nos testes sumus; faciat Dominus hanc mulierem, quae ingreditur domum tuam, sicut Rachel et Liam, quae aedificaverunt ambae domum Israel.Fortiter age in Ephrathaet fac tibi celebre nomen in Bethlehem!

¹²Fiatque domus tua sicut domus Phares, quem Thamar peperit Iudae, de semine, quod dederit Dominus tibi ex hac puella!".

¹³Tulit itaque Booz Ruth et accepit uxorem; ingressusque est ad eam, et dedit illi Dominus, ut conciperet et pareret filium.

¹⁴Dixeruntque mulieres ad Noemi: "Benedictus Dominus, qui non est passus, ut deficeret tibi hodie, qui redimit familiam tuam, et vocetur nomen eius in Israel

¹⁵et consoletur animam tuam et enutriat senectutem; de nuru enim tua natus est, quae te diligit et multo tibi est melior quam septem filii".

¹⁶Susceptumque Noemi puerum posuit in sinu suo et gerulae officio fungebatur.

¹⁷Vicinae autem mulieres congratulantes ei et dicentes: "Natus est filius Noemi! ", vocaverunt nomen eius Obed. Hic est pater Isai patris David.

¹⁸Hae sunt generationes Phares: Phares genuit Esrom,

¹⁹Esrom genuit Aram, Aram genuit Aminadab,

²⁰Aminadab genuit Naasson, Naasson genuit Salmon,

²¹Salmon genuit Booz, Booz genuit Obed,

²²Obed genuit Iesse, Iesse genuit David.