Read Nova_Vulgata DC I Samuelis 14 Bible Online

I Samuelis 14 - Nova_Vulgata DC bible

I Samuelis 14

¹Et accidit quadam die, ut diceret Ionathan filius Saul ad adulescentem armigerum suum: "Veni, et transeamus ad stationem Philisthim, quae est ibi ex adverso". Patri autem suo hoc ipsum non indicavit.

²Porro Saul morabatur in extrema parte Gabaa sub malogranato, quae erat in Magron; et erat populus cum eo quasi sescentorum virorum.

³Et Ahias filius Achitob fratris Ichabod filii Phinees, qui ortus fuerat ex Heli sacerdote Domini in Silo, portabat ephod. Sed et populus ignorabat quod isset Ionathan.

⁴Erant autem inter ascensus, per quos nitebatur Ionathan transire ad stationem Philisthinorum, dens rupis hinc ex una parte et dens rupis illinc ex altera parte: nomen uni Boses et nomen alteri Sene;

⁵unus scopulus prominens ad aquilonem ex adverso Machmas et alter a meridie contra Gabaa.

⁶Dixit autem Ionathan ad adulescentem armigerum suum: "Veni, transeamus ad stationem incircumcisorum horum, si forte faciat Dominus pro nobis; quia non est Domino difficile salvare vel in multitudine vel in paucis".

⁷Dixitque ei armiger suus: "Fac omnia, quae placent animo tuo. Perge quo cupis; ego ero tecum ubicumque volueris".

⁸Et ait Ionathan: "Ecce nos transimus ad viros istos. Cumque apparuerimus eis,

⁹si taliter locuti fuerint ad nos: "Manete, donec veniamus ad vos", stemus in loco nostro nec ascendamus ad eos.

¹⁰Si autem dixerint: "Ascendite ad nos", ascendamus, quia tradidit eos Dominus in manibus nostris; hoc erit nobis signum".

¹¹Apparuit igitur uterque stationi Philisthinorum. Dixeruntque Philisthim: "En Hebraei egrediuntur de cavernis, in quibus absconditi fuerant".

¹²Et locuti sunt viri de statione ad Ionathan et ad armigerum eius dixeruntque: "Ascendite ad nos, et ostendimus vobis rem". Et ait Ionathan ad armigerum suum: "Ascendamus; sequere me, tradidit enim eos Dominus in manu Israel".

¹³Ascendit autem Ionathan reptans manibus et pedibus et armiger eius post eum; Philisthim cadebant ante Ionathan, et eos armiger eius interficiebat sequens eum.

¹⁴Et facta est plaga prima, qua percussit Ionathan et armiger eius quasi viginti viros in media fere parte iugeri.

¹⁵Et factus est terror in castris per agros; sed et omnis populus stationis eorum et, qui ierant ad praedandum, obstupuerunt; et conturbata est terra, et factus est terror a Deo.

¹⁶Et respexerunt speculatores Saul, qui erant in Gabaa Beniamin; et ecce multitudo fluctuabat huc illucque diffugiens.

¹⁷Et ait Saul populo, qui erat cum eo: "Requirite et videte quis abierit ex nobis". Cumque requisissent, repertum est non adesse Ionathan et armigerum eius.

¹⁸Et ait Saul ad Ahiam: "Applica ephod". Ipse enim portabat ephod in die illa in conspectu filiorum Israel.

¹⁹Cumque loqueretur Saul ad sacerdotem, tumultus maior fiebat in castris Philisthinorum, crescebatque paulatim et clarius reboabat. Et ait Saul ad sacerdotem: "Contrahe manum tuam".

²⁰Congregati ergo sunt Saul et omnis populus, qui erat cum eo, et venerunt usque ad locum certaminis. Et ecce versus fuerat gladius uniuscuiusque ad proximum suum: perturbatio magna nimis.

²¹Sed et Hebraei, qui fuerant cum Philisthim heri et nudiustertius ascenderantque cum eis in castris, reversi sunt et ipsi, ut essent cum Israel, qui erant cum Saul et Ionathan.

²²Omnes quoque Israelitae, qui se absconderant in monte Ephraim, audientes quod fugissent Philisthim, sociaverunt se et ipsi cum suis in proelio.

²³Et salvavit Dominus in die illa Israel; pugna autem pervenit ultra Bethaven.

²⁴Et viri Israel comprimebant se in die illa. Adiuravit autem Saul populum dicens: "Maledictus vir, qui comederit panem usque ad vesperam, donec ulciscar de inimicis meis!". Et non manducavit universus populus panem.

²⁵Omneque terrae vulgus venit in saltum, in quo erat mel super faciem agri.

²⁶Ingressus est itaque populus saltum, et apparuit fluens mel. Nullusque applicuit manum ad os suum; timebat enim populus iuramentum.

²⁷Porro Ionathan non audierat, cum adiuraret pater eius populum; extenditque summitatem virgae, quam habebat in manu, et intinxit in favo mellis et convertit manum suam ad os suum, et illuminati sunt oculi eius.

²⁸Respondensque unus de populo ait: "Iureiurando constrinxit pater tuus populum dicens: "Maledictus, qui comederit panem hodie!". Defecit autem populus".

²⁹Dixitque Ionathan: "Turbavit pater meus terram! Videte quia illuminati sunt oculi mei, eo quod gustaverim paululum de melle isto;

³⁰quanto magis si comedisset hodie populus de praeda inimicorum suorum, quam repperit? Nonne nunc maior facta fuisset plaga in Philisthim?".

³¹Percusserunt ergo in die illa Philisthaeos a Machmis usque in Aialon; defatigatus est autem populus nimis.

³²Et versus ad praedam tulit oves et boves et vitulos; et mactaverunt in terra, comeditque populus cum sanguine.

³³Nuntiaverunt autem Saul dicentes: "Ecce populus peccat Domino comedens cum sanguine". Qui ait: "Praevaricati estis! Volvite ad me huc saxum grande".

³⁴Et dixit Saul: "Dispergimini in vulgus et dicite eis, ut adducat ad me unusquisque bovem suum et arietem, et occidite super istud et vescimini; et non peccabitis Domino comedentes cum sanguine". Adduxit itaque omnis populus, unusquisque quod erat in manu sua illa nocte, et occiderunt ibi.

³⁵Aedificavit autem Saul altare Domino. Tuncque primum coepit aedificare altare Domino.

³⁶Et dixit Saul: "Irruamus super Philisthim nocte et vastemus eos, usquedum illucescat mane; nec relinquamus de eis virum". Dixitque populus: "Omne, quod bonum videtur in oculis tuis, fac". Et ait sacerdos: "Accedamus huc ad Deum".

³⁷Et consuluit Saul Deum: "Num persequar Philisthim? Numquid trades eos in manu Israel?". Et non respondit ei in die illa.

³⁸Dixitque Saul: "Accedite huc, universi duces populi, et scitote et videte per quem acciderit peccatum hoc hodie.

³⁹Vivit Dominus, salvator Israel, quia si per Ionathan filium meum factum est, absque retractatione morietur". Ad quod nullus contradixit ei de omni populo.

⁴⁰Et ait ad universum Israel: "Separamini vos in partem unam, et ego cum Ionathan filio meo ero in parte altera". Respondit populus ad Saul: "Quod bonum videtur in oculis tuis, fac".

⁴¹Et dixit Saul ad Dominum, Deum Israel: "Quid est quod non responderis servo tuo hodie? Si est in me aut in Ionathan filio meo iniquitas ista, Domine, Deus Israel, da Urim; sed, si est haec iniquitas in populo tuo Israel, da Tummim". Et deprehensus est Ionathan et Saul; populus autem salvus evasit.

⁴²Et ait Saul: "Mittite sortem inter me et inter Ionathan filium meum". Et captus est Ionathan.

⁴³Dixit autem Saul ad Ionathan: "Indica mihi quid feceris". Et indicavit ei Ionathan et ait: "Gustans gustavi in summitate virgae, quae erat in manu mea, paululum mellis et ecce ego morior".

⁴⁴Et ait Saul: "Haec faciat mihi Deus et haec addat, nisi morte morieris, Ionathan".

⁴⁵Dixitque populus ad Saul: "Ergone Ionathan morietur, qui fecit salutem hanc magnam in Israel? Hoc nefas est; vivit Dominus, quia non cadet capillus de capite eius in terram, quia cum Deo operatus est hodie". Liberavit ergo populus Ionathan, ut non moreretur.

⁴⁶Recessitque Saul nec persecutus est Philisthim; porro Philisthim abierunt in loca sua.

⁴⁷At Saul, confirmato regno super Israel, pugnabat per circuitum adversum omnes inimicos eius: contra Moab et filios Ammon et Edom et reges Soba et Philisthaeos; et, quocumque se verterat, superabat.

⁴⁸Fortiter egit et percussit Amalec et eruit Israel de manu vastatorum eius.

⁴⁹Fuerunt autem filii Saul Ionathan et Isui et Melchisua. Nomina duarum filiarum eius: nomen primogenitae Merob et nomen minoris Michol.

⁵⁰Et nomen uxoris Saul Achinoam filia Achimaas, et nomen principis militiae eius Abner filius Ner patrui Saul.

⁵¹Porro Cis pater Saul et Ner pater Abner fuerunt filii Abiel.

⁵²Erat autem bellum potens adversum Philisthaeos omnibus diebus Saul; nam, quemcumque viderat Saul virum fortem et aptum ad proelium, sociabat eum sibi.