Read Nova_Vulgata DC I Samuelis 15 Bible Online

I Samuelis 15 - Nova_Vulgata DC bible

I Samuelis 15

¹Et dixit Samuel ad Saul: "Me misit Dominus, ut unge rem te in regem super populum eius Israel. Nunc ergo audi vocem Domini.

²Haec dicit Dominus exercituum: "Recensui, quaecumque fecit Amalec Israeli, quomodo restitit ei in via, cum ascenderet de Aegypto.

³Nunc igitur vade et demolire Amalec et percute anathemate universa eius; non parcas ei, sed interfice a viro usque ad mulierem et parvulum atque lactantem, bovem et ovem, camelum et asinum".

⁴Convocavit itaque Saul populum et recensuit eos in Telem: ducenta milia peditum et decem milia virorum Iudae.

⁵Cumque venisset Saul usque ad civitatem Amalec, tetendit insidias in torrente

⁶dixitque Saul Cinaeo: "Abite, recedite atque descendite ab Amalec, ne forte perdam te cum eo; tu enim fecisti misericordiam cum omnibus filiis Israel, cum ascenderent de Aegypto". Et recessit Cinaeus de medio Amalec.

⁷Percussitque Saul Amalec ab Hevila usque ad Sur, quae est e regione Aegypti.

⁸Et apprehendit Agag regem Amalec vivum; omne autem vulgus interfecit in ore gladii.

⁹Et pepercit Saul et populus Agag et optimis gregibus ovium et armentorum, pinguibus scilicet pecoribus et agnis et universis, quae pulchra erant, nec voluerunt disperdere ea; quidquid vero vile fuit et reprobum, hoc demoliti sunt.

¹⁰Factum est autem verbum Domini ad Samuel dicens:

¹¹" Paenitet me quod constituerim Saul regem, quia dereliquit me et verba mea opere non implevit". Contristatusque est Samuel et clamavit ad Dominum tota nocte.

¹²Cumque de nocte surrexisset Samuel, ut iret ad Saul mane, nuntiatum est Samueli quod venisset Saul in Carmel et erexisset sibi trophaeum et reversus transisset descendissetque in Galgala.

¹³Et cum venisset Samuel ad Saul, dixit ei Saul: "Benedictus tu Domino; implevi verbum Domini".

¹⁴Dixitque Samuel: "Et quae est haec vox gregum, quae resonat in auribus meis, et armentorum, quam ego audio?".

¹⁵Et ait Saul: "De Amalec adduxerunt ea; pepercit enim populus melioribus ovibus et armentis, ut immolarentur Domino Deo tuo; reliqua vero occidimus".

¹⁶Dixit autem Samuel ad Saul: "Sine me, et indicabo tibi, quae locutus sit Dominus ad me nocte". Dixitque ei: "Loquere".

¹⁷Et ait Samuel: "Nonne, cum parvulus esses in oculis tuis, caput in tribubus Israel factus es? Unxitque te Dominus regem super Israel

¹⁸et misit te Dominus in viam et ait: "Vade et interfice peccatores Amalec et pugnabis contra eos usque ad internecionem eorum".

¹⁹Quare ergo non audisti vocem Domini, sed versus ad praedam es et fecisti malum in oculis Domini?".

²⁰Et ait Saul ad Samuelem: "Immo audivi vocem Domini et ambulavi in via, per quam misit me Dominus; et adduxi Agag regem Amalec et Amalec interfeci.

²¹Tulit autem populus de praeda oves et boves, primitias eorum, quae caesa sunt, ut immolet Domino Deo tuo in Galgalis".

²²Et ait Samuel: "Numquid vult Dominus holocausta aut victimas et non potius ut oboediatur voci Domini? Melior est enim oboedientia quam victimae, et auscultare magis quam offerre adipem arietum.

²³Vere peccatum hariolandi est repugnare, et scelus idololatriae nolle acquiescere: pro eo ergo quod abiecisti sermonem Domini, abiecit te, ne sis rex".

²⁴Dixitque Saul ad Samuelem: "Peccavi, quia praevaricatus sum sermonem Domini et verba tua timens populum et oboediens voci eorum;

²⁵sed nunc tolle, quaeso, peccatum meum et revertere mecum, ut adorem Dominum".

²⁶Et ait Samuel ad Saul: "Non revertar tecum, quia proiecisti sermonem Domini; et proiecit te Dominus, ne sis rex super Israel".

²⁷Et conversus est Samuel, ut abiret; ille autem apprehendit summitatem pallii eius, quae et scissa est.

²⁸Et ait ad eum Samuel: "Scidit Dominus regnum Israel a te hodie et tradidit illud proximo tuo meliori te.

²⁹Porro Gloria Israel non mentitur et paenitudine non flectitur; neque enim homo est, ut agat paenitentiam".

³⁰At ille ait: "Peccavi, sed nunc honora me coram senibus populi mei et coram Israel; et revertere mecum, ut adorem Dominum Deum tuum".

³¹Reversus ergo Samuel secutus est Saulem et adoravit Saul Dominum.

³²Dixitque Samuel: "Adducite ad me Agag regem Amalec". Et oblatus est ei Agag tremens. Et dixit Agag: "Certe secessit amaritudo mortis!".

³³Et ait Samuel: "Sicut fecit absque liberis mulieres gladius tuus, sic absque liberis erit inter mulieres mater tua". Et in frusta concidit Samuel Agag coram Domino in Galgalis.

³⁴Abiit autem Samuel in Rama; Saul vero ascendit in domum suam in Gabaa Saulis.

³⁵Et non vidit Samuel ultra Saul usque ad diem mortis suae; verumtamen lugebat Samuel Saul, quoniam Dominum paenitebat quod constituisset Saul regem super Israel.