Read Nova_Vulgata DC I Samuelis 23 Bible Online

I Samuelis 23 - Nova_Vulgata DC bible

I Samuelis 23

¹Et nuntiaverunt David di centes: "Ecce Philisthim op pugnant Ceila et diripiunt areas".

²Consuluit igitur David Dominum dicens: "Num vadam et percutiam Philisthaeos istos?". Et ait Dominus ad David: "Vade et percuties Philisthaeos et salvabis Ceila".

³Et dixerunt viri, qui erant cum David, ad eum: "Ecce nos hic in Iuda consistentes timemus; quanto magis si ierimus in Ceila adversum agmina Philisthinorum?".

⁴Rursum ergo David consuluit Dominum, qui respondens ei ait: "Surge et vade in Ceila; ego enim tradam Philisthaeos in manu tua".

⁵Abiit ergo David et viri eius in Ceila et pugnavit adversum Philisthaeos et abegit iumenta eorum et percussit eos plaga magna: et salvavit David habitatores Ceilae.

⁶Porro cum fugisset Abiathar filius Achimelcch ad David, et ipse cum David in Ceila ephod secum habens descenderat.

⁷Nuntiatum est autem Saul quod venisset David in Ceila, et ait Saul: "Tradidit eum Deus in manus meas; conclususque est introgressus urbem, in qua portae et serae sunt".

⁸Et convocavit Saul omnem populum, ut ad pugnam descenderet in Ceila et obsideret David et viros eius.

⁹Quod cum rescisset David quia praepararet ei Saul clam malum, dixit ad Abiathar sacerdotem: "Applica ephod".

¹⁰Et ait David: "Domine, Deus Israel, audivit famam servus tuus quod disponat Saul venire ad Ceila, ut evertat urbem propter me.

¹¹Si tradent me viri Ceilae in manus eius? Et si descendet Saul, sicut audivit servus tuus? Domine, Deus Israel, indica servo tuo". Et ait Dominus: "Descendet".

¹²Dixitque David: "Si tradent viri Ceilae me et viros, qui sunt mecum, in manu Saul?". Et dixit Dominus: "Tradent".

¹³Surrexit ergo David et viri eius quasi sescenti et egressi de Ceila huc atque illuc vagabantur incerti. Nuntiatumque est Saul quod fugisset David de Ceila, quam ob rem destitit exire.

¹⁴Morabatur autem David in deserto in locis firmissimis mansitque in monte, in deserto Ziph; et quaerebat eum Saul cunctis diebus, sed non tradidit eum Deus in manus eius.

¹⁵Et cognovit David quod egressus esset Saul, ut quaereret animam eius; porro David erat in deserto Ziph in Horesa.

¹⁶Et surrexit Ionathan filius Saul et abiit ad David in Horesa; et confortavit manus eius in Deo dixitque ei:

¹⁷" Ne timeas, neque enim inveniet te manus Saul patris mei; et tu regnabis super Israel, et ego ero tibi secundus; sed et Saul pater meus scit hoc".

¹⁸Percussit igitur uterque foedus coram Domino; mansitque David in Horesa, Ionathan autem reversus est in domum suam.

¹⁹Ascenderunt autem Ziphaei ad Saul in Gabaa dicentes: "Nonne David latitat apud nos in locis tutissimis in Horesa, in colle Hachila, quae est ad meridiem deserti?

²⁰Nunc ergo, si desideravit anima tua, rex, ut descenderes, descende; nostrum autem erit ut tradamus eum in manus regis".

²¹Dixitque Saul: "Benedicti vos a Domino, quia doluistis vicem meam.

²²Abite, oro, et diligentius praeparate et curiosius agite; et considerate locum, ubi sit pes eius, vel quis viderit eum ibi; dictum est enim ad me quod callidus sit valde.

²³Considerate et videte omnia latibula eius, in quibus absconditur, et revertimini ad me ad certum locum, ut vadam vobiscum; quodsi fuerit in regione, perscrutabor eum in cunctis regionibus Iudae".

²⁴At illi surgentes abierunt in Ziph ante Saul.David autem et viri eius erant in deserto Maon, in Araba ad meridiem deserti.

²⁵Ivit ergo Saul et socii eius ad quaerendum eum, et nuntiatum est David; descenditque ad petram et versabatur in deserto Maon. Quod cum audisset Saul, persecutus est David in deserto Maon.

²⁶Et ibat Saul ad latus montis ex parte una, David autem et viri eius erant in latere montis ex parte altera; porro David praeceps fugiebat a facie Saul. Itaque Saul et viri eius in modum coronae cingebant David et viros eius, ut caperent eos.

²⁷Et nuntius venit ad Saul dicens: "Festina et veni, quoniam infuderunt se Philisthim super terram".

²⁸Reversus est ergo Saul desistens persequi David; et perrexit in occursum Philisthinorum. Propter hoc vocaverunt locum illum: "Petram dividentem".