Read Ntcham Genèse 1 Bible Online

Genèse 1 - Ntcham bible

Genèse 1

¹Unimbɔti nín kíĺ ki náań kutagbɔŋu nì kitiŋee,

²kitiŋ kaa nìn cáá dikíl ní tiba nì tiba kaa nìn bí ki-pu ní dibɔmbɔndi nìn bīī inyiŋfi pu. Kitiŋ nìn sá nnyim ŋma ní, ní Unimbɔti Fam nìn dàn̄ nnyimee pu.

³Ní Unimbɔti bí yii: «Ŋwalifi ń nyā!» Ní ŋwalifi nyáń[1].

⁴Ní Unimbɔti ká yii ŋwalifi ŋān̄, ní u cúú ŋwalifi nì dibɔmbɔndi ki yākatì tɔbin.

⁵Ní Unimbɔti yíiń ŋwalifi yii ŋwiimpu ní ki yíiń dibɔmbɔndi yii kunyeeu. Ní kunyeeu mɔ́ ní kutaa dūu wúntì, ŋwimpeepeekaa dal dee[2].

⁶Ní Unimbɔti bí yii: «Kugbɔŋu kubɔ ń nyā kí dàntī kí yàkatī inyiŋfi mili!»

⁷Ní an ŋá míǹ. Míǹ ní Unimbɔti yāntì kugbɔŋuee nyáń ki dāntì ki cúú inyiŋfi in bí taapuee nì in bí yilpuee ki yākatì.

⁸Ní Unimbɔti yíiń kugbɔŋuee yii kutagbɔŋu. Ní kunyeeu mɔ́ ní kutaa dūu wúntì, ŋwinliliiti dal dee.

⁹Ní Unimbɔti bí yii: «Nnyim min dɔ̄ taapuee ń kóoǹ kí kpāfì dijandi diba, dijandi din kíǹee ń nīn sá ŋkulimmi!» Ní an ŋá míǹ.

¹⁰Ní u yíiń dijandi din kūńee yii kitiŋ, ní ki yíiń nnyim min kóoǹ ki kpáfèe yii tiŋku. Ní u ká yii míǹ ŋān̄.

¹¹Unimbɔti bí yii: «Kumɔsɔŋu ń nyā kitiŋ pu, kumoou kamaa ń lòoǹ ku-boolii ní isufi mun ń nyā, busubu kamaa ń lòoǹ bu-boolii!» Ní an ŋá míǹ.

¹²Ní kumɔsɔŋu nyáń kitiŋ pu, ní timool tin làá lòoǹ ibee lòon̄ tì nín sá dimɔcil diŋyee boolii, ní busubu kamaa mun lòon̄ bu nín sá disucil diŋyee boolii. Ní Unimbɔti ká yii míǹ ŋān̄.

¹³Ní kunyeeu mɔ́ ní kutaa dūu wúntì, ŋwintataati dal dee.

¹⁴Ní Unimbɔti bí yii: «Iwalfi ń nyā kí nīn bí kutagbɔŋu pu kí yàkatī ŋwiimpu nì kunyeeu, bí nīn cáa dāantí iyunti, kí nīn cáa kàaǹ iwiin nì abin nì iwiŋkpaan,

¹⁵iwalfi gbantee ń nīn bí kutagbɔŋu pu ki ŋmíntí kitiŋ pu.» Ní an ŋá míǹ.

¹⁶Míǹ ní Unimbɔti ŋá iwalfikpaan ili: ŋkpaŋkpaan di sá ŋwìiń, kutaa yaa wúntèe, ŋú nīn bí ki ŋmíntí. Kiwaai di sá uŋmal, kunyeeuee, ú nīn bí ki ŋmíntí, ní ki ŋá iŋmalbijaa mun.

¹⁷Ní Unimbɔti dū i-kɔkɔ ki kāaǹ kutagbɔŋu pu í nīn ŋmíntí kitiŋ pu,

¹⁸ŋubɔ ń nīn bí ki ŋmíntí ŋwiimpu, ŋun kíǹee ń nīn bí ki ŋmíntí kunyeeu. Unimbɔti ká yii míǹ ŋān̄.

¹⁹Ní kunyeeu mɔ́ ní kutaa dūu wúntì, ŋwinnanaati dal dee.

²⁰Ní Unimbɔti bí yii: «Tiwan tin cáá kufoouee ń kpátí kí gbí nnyim poon dàaa, inoon mun ń nīn bí kutaa pu ki ŋàaǹ.»

²¹Ní Unimbɔti náań tiwambilindi tin kóò nnyiminee nì tin kɔkɔ cáá kufoou ki kpátìi gbí nnyim poonee nì ti-buluku ti-buluku. U náań inoon kɔkɔ nì i-buluku i-buluku. Unimbɔti ká yii míǹ ŋān̄.

²²Ní Unimbɔti bīiǹ ti-boon ki bí-tì yii: «Ní bùtī kí gbí tiŋku, inoon mun ń bùtī kí gbí kitiŋ!»

²³Ní kunyeeu mɔ́ ní kutaa dūu wúntì, ŋwiŋŋmooŋmooti dal dee.

²⁴Ní Unimbɔti bí yii: «Tiwan tin fòotēe kɔkɔ kubuluu kubuluu ń nyā kí nīn bí kitiŋ pu, an dàkà yii tiwaŋkuti nì tin fù ti-biŋŋi puee nì ipeel ń nyā!» Ní an ŋá míǹ.

²⁵Ní Unimbɔti nyántì kumooun peelii kɔkɔ kubuluu kubuluu nì tiwaŋkuti kɔkɔ kubuluu kubuluu nì tin kɔkɔ fù ti-biŋŋi puee kubuluu kubuluu. Ní Unimbɔti ká yii míǹ ŋān̄.

²⁶Ní Unimbɔti bí yii: «Tí náań unil kí nántíǹ ti-ba, ú nīn náań nì ti, kí nīn cáá mpɔn ijɔm nì inoon pu, kí nīn cáá mpɔn tiwaŋkuti nì ipeel kɔkɔ nì tin kɔkɔ fù ti-biŋŋi pu ki bí kitiŋ puee pu!»

²⁷Ní Unimbɔti náań unil ki nántiǹ u-ba, u náań-u ki nántiǹ úǹ Unimbɔti u-ba ní. U nìn náań uninja nì unimpu ní[3].

²⁸Ní Unimbɔti bīiǹ bi-boon ki bí-bi yii: «Ní màal̀ kí bùtī, binib ń gbí kitiŋ. Ní nīn cáá mpɔn kitiŋ pu nì ijɔm nì inoon nì tin kɔkɔ pée fù ti-biŋŋi pu ki bí kitiŋ puee pu!»

²⁹Ní Unimbɔti kútì yii: «M dū tin kɔkɔ lòoǹ ibi ki yú kitiŋ jaŋŋi kɔkɔ puee nì isufi in lòoǹ asubilee ki tīī-ni, án nīn sá ni-jinti.

³⁰Míǹ mbaantiim, m dū timool ki tīī tiwaŋkuti tin bí kitiŋ puee kɔkɔ nì inoon kɔkɔ nì tin kɔkɔ pée fù ti-biŋŋi pu, ki bí kitiŋ pu ki cáá kufoouee án nīn sá tì-jinti.» Ní an ŋá míǹ.

³¹Unimbɔti ká yii tin kɔkɔ u ŋée ŋān̄ tikpil. Ní kunyeeu mɔ́ ní kutaa dūu wúntì, ŋwinluluuti dal dee.