Read Ntcham Genèse 11 Bible Online

Genèse 11 - Ntcham bible

Genèse 11

¹Dooooyee, kitiŋ kɔkɔ pu nib sooŋyi nìn sá ibaanti ní anyɔɔbun nìn sá abaanti ní bi sòoǹ.

²Ní bi dāa yíkì ki túĺ ŋwìiń nyalaŋki pú, ki tin bàn̄ ki ká kitiŋ kin bi yíì Siinaaree laaba tèen̄ ní bi gbíntì niin ki kāl̀.

³Niin ní bi bí ní ki lī tɔb yii: «Ti-yab, ní càmaan tí gíí brikisib kí wúb́!» Míǹ ní brikisib nìn kpántì-bi ataŋkpee, ní aŋɔ kpántì ntancookikaam.

⁴Bi nìn gíti lī yii: «Ní càmaan tí náań kitiŋ, kí mā kudifɔkɔu kubɔ. Tí ŋámaan míǹ kí nyā diyindi kí taa yàl̄ ti-ba ti-ba kitiŋ kɔkɔ pu.»

⁵Ní ti-Dindaan sīntìń kí kpèè kitiŋ nì kudifɔkɔu kun binib bí ki māāyee.

⁶Ní ki bí yii: «Kpèèmaan! Binib nee sá unibaanti ní ki sòoǹ isoombaanti. Bi nín kíĺ ditundi din nee, tiba kpá kí lìkin̄-bi bí gbèen̄ tin bi bóob́ yii bi làá ŋée.

⁷An puee tí cù kí ŋmàlim̀ bi-sooŋyi fìkil fikil ń kɔ́, bí taa ti nín̄ gbìl̀ tɔb liŋfii.»

⁸Míǹ ní ti-Dindaan ŋá ní ki yāaǹ-bi, ní bi yàl̄ ki gbí kitiŋ kɔkɔ pu, ní bi-tiŋki gbanti náantam gbíntì.

⁹An pu ní bi pú kitiŋ gbanti diyindi yii Babeel, kun puee niin ní ti-Dindaan kpántì binib sooŋyi bí taa ti nín̄ gbìliǹ tɔb, ní ki yāaǹ binib bi yàl̄ ki gbí kitiŋ kɔkɔ pu.

¹⁰Seem naantiibi bɔti sɔ̀. Nnyiŋgbeen jítì abin ali boonee, ní Seem màl̄ Aripakisaadi. Ŋyunti gbantee, u nìn cáá abin dilaataal.

¹¹Aripakisaadi màaltam boonee, Seem gíti ŋá abin alaataa aŋmoo ní. U nìn gíti màl̄ mbininjabiyaamu nì nnimpubiyaamu ki kútì.

¹²Aripakisaadi nìn cáá abin mmuŋku nì saalaa nì aŋmoo ní ki màl̄ Seera.

¹³Seera màaltam boonee, Aripakisaadi gíti ŋá abin alaataa anaa nì abin ata ní. U nìn gíti màl̄ mbininjabiyaamu nì nnimpubiyaamu ki kútì.

¹⁴Seera nìn cáá abin mmuŋku nì saalaa ní ki màl̄ Eebeer.

¹⁵Eebeer màaltam boonee, Seera gíti ŋá abin alaataa anaa nì abin ata ní. U nìn gíti màl̄ mbininjabiyaamu nì nnimpubiyaamu ki kútì.

¹⁶Eebeer nìn cáá abin mmuŋku nì saalaa nì anaa ní ki màl̄ Peeleegi.

¹⁷Peeleegi màaltam boonee, Eebeer gíti ŋá abin alaataa anaa nì abin mmuŋku nì saalaa ní. U nìn gíti màl̄ mbininjabiyaamu nì nnimpubiyaamu ki kútì.

¹⁸Peeleegi nìn cáá abin mmuŋku nì saalaa ní ki màl̄ Reewu.

¹⁹Reewu màaltam boonee, Peeleegi gíti ŋá abin alaataa ali nì abin awa ní. U nìn gíti màl̄ mbininjabiyaamu nì nnimpubiyaamu ki kútì.

²⁰Reewu nìn cáá abin mmuŋku nì saalaa nì ali ní ki màl̄ Seerugi.

²¹Seerugi màaltam boonee, Reewu gíti ŋá abin alaataa ali nì abin aluli ní. U nìn gíti màl̄ mbininjabiyaamu nì nnimpubiyaamu ki kútì.

²²Seerugi nìn cáá abin mmuŋku nì saalaa ní ki màl̄ Naakɔɔr.

²³Naakɔɔr màaltam boonee, Seerugi gíti ŋá abin alaataa ali ní. U nìn gíti màl̄ mbininjabiyaamu nì nnimpubiyaamu ki kútì.

²⁴Naakɔɔr nìn cáá abin mmuŋku nì awa ní ki màl̄ Teeraki.

²⁵Teeraki màaltam boonee, Naakɔɔr gíti ŋá abin dilaataal nì diba kpá mmuŋku ní. U nìn gíti màl̄ mbininjabiyaamu nì nnimpubiyaamu ki kútì.

²⁶Teeraki nìn cáá abin imuŋku ita nì saalaa ní ki màl̄ Abram nì Naakɔɔr nì Aran.

²⁷Teeraki biyaamu bɔti sɔ̀. Teeraki màl̄ Abram nì Naakɔɔr nì Aran, ní Aran màl̄ Looti.

²⁸Aran baa Teeraki dáá kā ní Aran kpíì Uur, Kaaldee tiŋki kin poon bi màl̄-uee.

²⁹Ní Abram nì Naakɔɔr cáá binimpoobi. Abram nimpuu ní bi yíì Saarayi, ní Naakɔɔr nimpuu sá Aran bisal Miilka. Aran biyaamu di sá Miilka nì Yisika.

³⁰Saarayi úǹ nìn sá uŋmaŋŋmanti ní, waa nìn cáá kibiki.

³¹Ní Teeraki yōoǹ u-jipɔɔn Abram nì u-naantiiu Looti, Aran jipɔɔn nì u-coopu Saarayi, Abram nimpuu. Bi-kɔkɔ yíkì Uur, Kaaldee tiŋkin ki nín cá Kanaan tiŋkin. Bi bàn̄ Kaaran tiŋkinee ní ki gbíntì niin.

³²Teeraki ŋá abin alaataa ali nì abin aŋmoo ní ki kpíì Kaaran tiŋkin.