Read Ntcham Genèse 13 Bible Online

Genèse 13 - Ntcham bible

Genèse 13

¹Niinee ní Abram yíkì Eejipiti tiŋkin ki túĺ Neegeeb watil pú, ki kpáaǹ u-nimpuu nì tin kɔkɔ u nìn pée cááyee, ní Looti nóó-u.

²Abram nìn sá ugaajakpaan ní. U nìn cáá tiwaŋkuti tikpil ki cáá animbil nì sindaariya.

³Ní u yíkì Neegeeb ki còom̄ ki kàal̀ ntimu ntimu ki nìkì, ní ki tin bàn̄ Beeteel, mpaan ŋun pu u nìn péé péé ki gāā u-tantiu Beeteel nì Aayi kansikinee.

⁴Niin ní u nìn máń nsaraafan mpeekaam. Niin ní u jáam̀ ti-Dindaan.

⁵Looti un nìn dī-uee mun nìn cáá u-ba nì u-piii nì u-ŋoobui nì u-naai, ní ki cáá u-ba nì u-tantiu ki kóò.

⁶Kitiŋ kin poon bi nìn bée kaa nìn náaǹ bí kpāfì kí nīn kā dicilpu, kun puee bi nìn cáá tiwaŋkuti tikpil.

⁷Bi bí niinee ní kujaau kɔ́ Abram pikpaaliibi nì Looti yab kansikin. An yuntiŋuee, Kanaan yab nì Peeriisi yab di nìn kóò kitiŋ gbantin.

⁸Niinee ní Abram bí Looti yii: «Kujaau kaa máaǹ kí nīn bí man nì sii kansikin, kaa máaǹ kí nīn bí man pikpaaliibi nì sii yab kansikin, kun puee ti pēē mmaal ní.

⁹Kpèè, kitiŋ di kaa dɔ̄ a-nimbiin pàaa neeee? Tí yàkatī tɔbin. Á lēē laakin pú a lèe kí nīn cá. Sii yaa lēē ŋgan púɔɔɔ, man ń túĺ ŋgiil pú. Sii yaa tí lēē ŋgiil púɔɔɔ, man ń túĺ ŋgan pú.»

¹⁰Niinee ní Looti fātìi kpēē kitiŋ kin dɔ̄ Jɔɔdan buŋŋu watil púee ki ká timool nín pée sɔ̀mìń niin pú fílfil ki tin sāā Soowaar tiŋkee. An nìn sɔ̀m̀ kii ti-Dindaan kpaabuee, ki nìn sɔ̀m̀ kii Eejipiti tiŋkee. An yuntiŋuee, ti-Dindaan kaa nìn dá láá kúntì Soodoom nì Goomoora timmu.

¹¹Niinee ní Looti lēē kitiŋ kin dɔ̄ Jɔɔdan buŋŋu watil púee kɔkɔ, ní ki búntì ŋwìiń nyalaŋki pú. Bi-yàkatitam nín jítì miŋyee dee.

¹²Di sá Abram gbíntì Kanaan tiŋkin, ní Looti úǹ cūtì ki kɔ́ ntimu mun bí Jɔɔdan tantakalinee, ní ki gāā u-tantib Soodoom tiŋki caŋin.

¹³Ama Soodoom tiŋki gbanti nib nìn sá binikpitib ní ki nìn ŋáań tin kaa pée ŋān̄ ti-Dindaan ceeyee.

¹⁴Looti nì Abram nín yākatì tɔbin Looti búntèe, ní ti-Dindaan bí Abram yii: «Laakin a yú nee, fàtī kí kpèè ŋgiil pú nì ŋgan pú, kí kpèè ŋwìiń nyalaŋki pú nì ŋwìiń jeetilaŋki pú.

¹⁵Kitiŋ kin kɔkɔ a wāĺ nee, m làá dū-kì kí tīī sii nì a-niboolii ní, ní nīn yì kí nīn pée cáa cá jaanjaan[33].

¹⁶M làá yàntī a-niboolii ń bùtī kii dibulee ní. Un yaa láa ŋúń ki kàan̄ dibulee di dāa ŋūǹ kí kàaǹ a-niboolii.

¹⁷Yīkì kí còom̀ kí màntīí tū kitiŋ nee, kun puee sii ní m làá dū-kì kí tīī.»

¹⁸Ní Abram yíkì niin ki cūtìi gāā u-tantib Mamiree sufii in bí Eebrɔn tiŋki caŋinee ki kóò, ní ki máń ti-Dindaan nsaraafan niin.