Read Ntcham Genèse 15 Bible Online

Genèse 15 - Ntcham bible

Genèse 15

¹Míǹ jítì boonee, ní ti-Dindaan lēē u-ba ki dàkā Abram ki bí-u yii: «Abram, taa fàŋkì tiba, man di wúń a-pu. Tiŋan tin m làá ŋá-see làá nīn wīikí tikpil.»

²Ní Abram kíí yii: «Ti-Dindaan Unimbɔti, ba ní a làá tīī-mi ní? Man dee, maa cáá kibiki, ní Eeliyeeseer udamaasja di làá dāá jī m-fakal.»

³Ní Abram gíti bí yii: «Man dee, aa tīī-mi kibiki, ní uyumbu un bi màl̄ m-cindinee di làá jī m-fakal.»

⁴Niinee ní ti-Dindaan bí-u yii: «An kaa sá Eeliyeeseer di làá jī a-fakal, sisi a-ba poon biki di làá jī a-fakal.»

⁵Ti-Dindaan lī-u mimmee ní ki nyántì-u mmɔŋki, ní ki bí-u yii: «Wáaǹ kí kpèè yilpu a yaa ŋūǹ kí kàaǹ iŋmalbijaa nee.» Ní ki kútì-u yii: «Míǹ ní a-biyaamu làá dāá nīn wīikí[35].»

⁶Niinee ní Abram fōō ti-Dindaan nín lī puee ki kíí. Míǹ pu ní ti-Dindaan yíiń-u deedeedaan[36].

⁷Ní ti-Dindaan bí-u yii: «Man di sá a-Dindaan un nyántìń-si Uur, Kaaldee tiŋkin kí dū kitiŋ kin poon a bí nee kí tīī-si á nīn kíǹ ki yèe.»

⁸Ní Abram bí yii: «Ti-Dindaan Unimbɔti, m làá ŋá mana kí béé yii man di làá nīn lafun yì kitiŋ gbanti?»

⁹Ní ti-Dindaan bí-u yii: «Cúú unasal un cáá abin atee nì uŋɔsal un cáá abin atee, nì upìja un cáá abin atee, nì kinanjilii nì dibeenanjipɔmbil kí cáań.»

¹⁰Ní Abram nyàabìń an waŋkutee ní ki cúú-tì ki gífì ki nābitì mili mili, ní ki dū aginee ki bíl̀ ki túĺ tɔb. See kinanjilii nì dibeenanjipɔmbil ní waa gífì ki nābitì mili.

¹¹Ní ikaabu kpákatìń kí jī an nanti ní Abram jìn̄-i.

¹²Ŋwìiń cá kí jēetée ní ŋgeem miba dɔ́miń ki cúú Abram. Niinee ní tifaandi kɔ́-u ní dibɔmbɔŋkpaandi diba jéetì u-pu[37].

¹³Ní ti-Dindaan bí Abram yii: «Á nīn nyí tiŋan yii a-naantiibi làá dāá nīn kóò kitincaŋ kiba poon ní. Bi làá dāá dū-bi kí kpántí iyumbu kí sàaǹ-bi áli abin alaataa anaa[38].

¹⁴Ama m làá dāá dáaĺ ditimbundi din làá dāá cúú a-naantiibi kuyuŋuee tafal, ní boonee bí dāá nyā kitiŋ gbantin nì tigaajakpaandi[39].

¹⁵Siiyee, a làá bà a-naanjab nì nsɔŋfi poon ní. A làá púĺ kí bà titikpiti laŋki nì dipɔɔsɔŋkil ní bí nín síb́-si.

¹⁶A-naantitɔntɔkɔŋ dinanaatiil di làá dāá fàtīí gítiń doo, di sá yii kí dāá sāā ŋyunti gbanti ní Amɔɔr yab kpitii làá wíiǹ kí bà i-nyɔkɔm.»

¹⁷Ŋwìiń jéetì kunyeeu mɔ́ee ní ŋfan ŋubɔ nì ŋŋminyiim nì ŋŋminaapool[40] dɔ́miń ki jítì tinan tin Abram gífì ki bíl̀ee kansikin.

¹⁸Ŋwiin gbanti dal ní ti-Dindaan pūtì ki pōoǹ Abram ki bí-u yii: «A-naantiibi ní m làá dū kitiŋ nee kí tīī[41], kí yòon̄ Eejipiti mɔɔl kí tin cáá sāā Eefiraati mɔɔkpaandi.

¹⁹An dàkà yii kitiŋ kin pu Keeni yab nì Keeniisi yab nì Kadimoon yab

²⁰nì Eeti yab nì Peeriisi yab nì Reefa yab

²¹nì Amɔɔr yab nì Kanaan yab nì Giirgaasi yab nì Jeebusi yab kóòyee.»