Read Ntcham Genèse 17 Bible Online

Genèse 17 - Ntcham bible

Genèse 17

¹Ŋyunti ŋun Abram nìn cáá abin diba kpá dilaataalee, ti-Dindaan nìn nyántì u-ba ki dàkā-u ní ki bí-u yii: «Man di sá Unimbɔti Mpɔŋkɔdaan. Á nīn ŋáań min fáatì-mee kí nīn bí deedee.

²M làá lafun ŋá tin m pōoǹ yii m làá ŋá kí tīī-see, kí bùtī a-maaliŋu tikpil tikpil.»

³Ní Abram tātìi dōoǹ dicincibil, ní Unimbɔti bí-u yii:

⁴«Kpèè, dipoondi din man pōoǹ-see sɔ̀. A làá dāá kpántí anibul kupaau baa ní.

⁵Baa làá nīn gíti yíì-si Abram[43]. A-yindi di làá nīn kíǹ ki sá Abraam, kun puee m dū-si ki kpántì atimbun kupaau baa.

⁶M làá bùtī a-maaliŋu tikpil tikpil. A-maaliŋu gbanti poon ní m làá yàntī atimbun nì bibɔtiibi ń nyā.

⁷Dipoondi din m pōoǹ-si nee, dì sá ki tīī sii nì a-maaliŋu kɔkɔ ní kí nīn cáa cá jaanjaan, dì kpá kí gbíntí. Di-pu ní m làá nīn sá a-Nimbɔtiu nì a-naantitɔntɔkɔŋ Nimbɔtiu[44].

⁸M làá dū Kanaan tiŋki kin poon a bí kunicaŋu nee kɔkɔ kí tīī sii nì a-naantiibi bin làá páanní a-boonee, kí nīn cá jaanjaan. Ní man di làá nīn pée sá bi-Nimbɔtiu[45].»

⁹Ní Unimbɔti nìkī ki bí Abraam yii: «Siiyee, á nīn ŋúb́ m-poondi, kí nīn ŋáań min m lèe, sii nì a-naantiibi bin dáá bíń boon ki dòońee kɔkɔ.

¹⁰Ni nín máaǹ kí nīn ŋúb́ dipoondi din m pōoǹ sii nì a-naantiibi bin dáá bíń boon ki dòońee puee di sá bin kɔkɔ pée sá bininjab ni-kansikinee ń gíí dikpancandi[46].

¹¹Digiil gbanti di sá dipoondi din m pōoǹ-nee daaŋku man nì ni kansikin.

¹²A-maaliŋu poon kí nīn pée cáa cá a-naantiibee, bi yaa màl̄ kibininjabikee, bí gíí-kì dikpancandi iwiin inii dal. Ki kpáaǹ iyumbu nín màl̄ bin ni-ciŋŋinee, nì bin ni dáal̀ binicambi ceeyee, báà udaan yaa pée nyánní laakin kaa sá a-maaliŋunee, á gíí-u.

¹³Uyumbu nín màl̄ un a-cindinee, nì un a dū a-nimbiliŋ ki dée, bi máaǹ kí gíí-bi, m-poondi daaŋku gbanti ń nīn bí ni-wunti pu míǹ kí nīn cá jaanjaan.

¹⁴Uninja un kaa gíí dikpancandee, ní nyāntí-u ni-nibul kansikin, kun puee udaan kpītì m-poondi.»

¹⁵Ní Unimbɔti gíti bí Abraam yii: «Á taa ti yíiń a-nimpuu yii Saarayi, á nīn kíǹ ki yíì-u yii Saara[47].

¹⁶M làá bìin̄ u-boon kí yàntī ú màal̀-si kibininjabiki, kí bìin̄ u-boon ú kpántí anibul kupaau na. U-maaliŋu poon ní atimbun tikpil bɔtiibi làá nyā.»

¹⁷Niinee ní Abraam tātìi dōoǹ dicincibil ki bíi lāā ní ki lī u-neen yii: «Unil un cáá abin dilaataalee gíti ŋūǹ kí màal̀ kibikaaa? Àá Saarayi un ŋá abin imuŋku inaa nì saalaayee di gíti ŋūǹ kí màal̀ kibiki ní?»

¹⁸Ní Abraam bí Unimbɔti yii: «Too, á pɔ̄ Isimaayeel mmaŋfafɔkɔn!»

¹⁹Ní Unimbɔti bí-u yii: «M gbìl̄, ama an kaa sá Isimaayeel bɔti ní m bíi sòoǹ, an sá a-nimpuu Saara di làá màal̀-si kibininjabiki. Á dāá pɔ̄-kì diyindi yii Isaaki[48]. Úǹ nì u-naantiibi bin làá páanní boonee di làá fōō dipoondi din m pōoǹ dí nīn bí kí nīn cá jaanjaanee.

²⁰A nín mēē-mi Isimaayeel pu miŋyee, m gbìl̄. M làá bìin̄ u-boon kí yàntī ú màal̀ ki bùtī tikpil tikpil. U làá dāá màal̀ bibɔtiibi saalaa nì bili, ní u-maaliŋu ń dāá nīn sá ditimbuŋkpaandi.

²¹Ama an yaa kíǹ m-poondee, dì sá ki tīī Isaaki un Saara làá dāá màal̀ jiil naŋkɔnampuee ní.»

²²Unimbɔti sòon̄ nì Abraam ki dóòyee, ní ki yíkì u-cee ki nín jɔ́ḿ.

²³Daliŋkin Unimbɔti sòon̄ nì Abraamee, yaadal gbanti ní u yíiń u-jipɔɔn Isimaayeel nì iyumbu nín màl̄ bininjab bin u-cindinee nì bin u dáal̀ee, nì bin pée sá bininjab ki bí u-cindinee kɔkɔ, ní ki gífì-bi akpancan kii Unimbɔti nín bí yii u ŋá puee.

²⁴Abraam nìn cáá dibindi diba kpá dilaataal ní ki gíí dikpancandi.

²⁵U-jipɔɔn Isimaayeel nìn cáá abin saalaa nì ata ní ki gíí dikpancandi.

²⁶Ŋwimbaanti ní Abraam nì u-jipɔɔn Isimaayeel kpáfì ki gíí dikpancandi.

²⁷Ŋwimbaanti gbanti ní u gíí ki kpáaǹ bin kɔkɔ pée sá bininjab ki bí u-cindinee, iyumbu nín màl̄ biŋyee nì bin u dáal̀ binicambi ceeyee.