Read Ntcham Genèse 19 Bible Online

Genèse 19 - Ntcham bible

Genèse 19

¹Ituun ilee dūu bàn̄ Soodoom tiŋkin kujoou. Looti nìn nyáń ki kā Soodoom tiŋki punyɔkɔpu[51]. U kēe ní ki ká bi dòoń, ní u yíkì ki túŋkì-bi. U bàn̄ bi-ceeyee ní ki gbāaǹ ki jáam̀-bi,

²ní ki bí-bi yii: «M-dindambi, m gbāam̀-ni ní, pàatīmaan man ni-tɔntɔnliu dumpu kí fíntí ni-taaŋi kí dòon̄ m-cee, ku yaa fu wúntì kutaafaau pɔ̀lpɔlee, ní fu nìkī ni-saŋŋu.» Ní bi yíì yii bi làá dòon̄ mmɔŋki laaba ní.

³Ní u páb́-bi tikpil ní bi dāa pāatì ki kɔ́ u-dumpu, ní u púĺ kpɔnɔ un baa ŋá ŋkpɔnɔnyɔkɔee ki ŋá-bi tican ní bi jíń.

⁴Bi dáá kā kaa láá kɔ́ ki dōoǹ, ní Soodoom tiŋki yab kɔkɔ dɔ́miń ki māntìi tú bi-diiku, kí yòon̄ binaacimpɔmbi kí cáá sāā bitikpilib, bininjab kɔkɔ, ugàntil kpá.

⁵Ní bi yíiń Looti ki bí-u yii: «Bininjab bin kɔ́ a-pu kunyeeu neeyee bí la? Nyāntiń-bi doo timbi ń dòon̄ nì bi.»

⁶Ní Looti nyáń ki yúl̀ kipunyɔkɔpu ki gíiǹ punuu ki pīiǹ, ní ki bí-bi yii:

⁷«M-nabiyaamu, m gbàam̄-ni, ní taa ŋámaan ikpiti gbanti.

⁸M cáá bisapɔmbi bili, baa nyí uninja. M làá cáań-bi kí tīī-ni ní ŋá-bi ni yaa là puee. Ama an yaa sá bininjab neeyee, ní taa ŋá-bi tiba, kun puee bi kɔ́ m-pu ní.»

⁹Ní bi kíí Looti yii: «Sútí niin kí wàatī timbi.» Ní ki kútì ki bí yii: «Unil nee sá unicaan ní ki kɔ́ timbi ní ki là kí nīn sá ti-bɔsoonliu. Too, ti làá ŋá-si tikpitil kí jītíǹ a-nicambi gba!» Niinee ní bi téé Looti mpɔn kí bàà cúú punuu kí wīī kí kɔ́ bininjabee pu.

¹⁰Ní bininjabee tāntì bi-ŋalii ki cúú Looti ŋal ki dáaĺ-u ki kɔ́ǹ bi-cee, ní ki dū punuu ki pīiǹ.

¹¹Ní ki dū ijɔfi[52] ki tɔ́ bin kɔkɔ nìn dɔ́miń ki yú kudii nyɔkɔpuee, ki yōoǹ binaacimpɔmbi ki tin cáa sāā bitikpilib, ní baa ti wāĺ ní ki nyàab̄ kipunyɔkɔ ki gīī.

¹²Niinee ní bininjabee bālifì Looti yii: «A gíti cáá binib biba doooo? Nyāntí a-coobi nì a-jipɔmbi nì a bisalib nì bin kɔkɔ pée sá a-dicaŋkunee kitiŋ nee poon.

¹³Di sá yii ti làá kúntí kitiŋ nee, kun puee ti-Dindaan nín gbìl̄ bi sòoǹ ki-kpitii pu miŋyee wīikí tikpil, ní u túnní-ti yii tí dāá kúntí-kì.»

¹⁴Ní Looti nyáń ki tùkū u-coobi bin làá dāá cáá u-bisalibee yii: «Yīkìmaan kí nyā kitiŋ nee poon, kun puee ti-Dindaan làá kúntí-kì.» Ama bíǹ nìn dākafì yii an sá tinaacin ní.

¹⁵Kutaa bíi wúntée ní ituun in bí Looti ceeyee bíi páb́-u ki lì yii: «Yīkì kí yòon̄ a-nimpuu nì a-bisalib liitil nee kí kpáàá nyā kí taa yàntī ditafadaaldi din làá jēetí kitiŋ nee puee ń kpáaǹ-si.»

¹⁶Ama ní Looti bí ki tàantí kaa làá nyā malaa. Ní bininjab bilee cúú u nì u-nimpuu nì u-bisalib bilee ŋalii ki dáaĺ-bi ki nyántì kitiŋ kpaanceetiŋu. Di sá yii ti-Dindaan nìn là kí fīī-u ní[53].

¹⁷Bi dáaĺ-bi ki nyántèe ní bi-kansikin ubɔ bí Looti yii: «Sāǹ kí fīī a-ba! A yaa bíi sáńee, á taa fàtī kí kpèè a-boon, kí taa yūĺ laaba. A yaa kaa là ŋkúmee, á nīn pée sáń ki cá ajoon watil pú.»

¹⁸Ní Looti bí yii: «Óò m-Dindaan, m gbāam̀-si!

¹⁹Tiŋman, man a-tɔntɔnliu ká diyimɔɔl a-cee. A nín fīī-mi ŋkúminee, a dàkā-mi kulaŋŋaŋfitiiu tikpil. Ama m yaa bí yii m làá nīn sáń ki cá ajoon watil púee, maa làá bà ní mbusu nee ń dāá jēetí m-pu ní ḿ kpú.

²⁰M gbāam̀-si, kpèè kitimbilii kiba di bí m-nyɔkɔpu nee, kaa dátì ḿ ŋmā kí sāǹ kí bà niin. Kitiŋ gbanti kaa náaǹaa! Yàntī ḿ sāǹ kí kɔ́ ki-ni kí ŋmátí.»

²¹Ní u kíí Looti yii: «M làá gíti pɔ̄-si diyimɔɔl. A-puee maa làá kúntí kitimbilii kin bɔti a sòoǹ nee.

²²Malaa sāǹ kí báĺ niin, kun puee a yaa kaa láá bàn̄ kitiŋ gbantin, maa ŋūǹ kí ŋá tiba.» An pu ní bi pú kitiŋ gbanti diyindi yii Soowaar[54].

²³Ŋwìiń bíi nyēēyee ní Looti bàn̄ Soowaar timbiliikin.

²⁴Niinee ní ti-Dindaan yāntì farwata nyánní yilpu ki fōō ŋŋmi ki sìtī kii utaayee Soodoom nì Goomoora timmu pu.

²⁵U nìn nāaǹ ntimu gbanti nì ditantakal din poon mu bée kɔkɔ, ki kūū ki céetì mu-nib nì isufi nì timool kɔkɔ[55].

²⁶Ní Looti nimpuu fātì ki kpēē u-boon ní ki kpántì diyataŋkpal ki yúl̀[56].

²⁷Ku wúntì kutaafaau pɔ̀lpɔlee, Abraam péé ki cūtì laakin u fu yúl̀ ti-Dindaan cee ki sòon̄ nì uee.

²⁸U kpēē Soodoom nì Goomoora timmu nì ditantakal din poon mu bée watil púee, ki ká ŋŋminyiim nyēē kitiŋ ki dùkù ki jɔ́ḿ, a lì kii kipaai nyiimee.

²⁹Ŋyunti ŋun Unimbɔti nìn kúntì ntimu mun bí ditantakal poonee, waa nìn súntì Abraam pu ní ki fīī Looti ki nyántì kitiŋ kin poon u nìn kóòyee ki wāatì ní ki nín nāaǹ-kì.

³⁰Looti nìn fàŋkí kí nīn kóò Soowaar tiŋkin, an puee ní u kpáaǹ u-bisalib liitil ki yíkì ki tin kóòń ajoon pu itaŋkpalɔkɔn.

³¹Dalbee ní ukpil bí u-naal yii: «Ti-baa púĺ, ní bininjab mun kpá doo tí mɔ̄ǹ-bi kii an nín pée sá báà ŋma mɔ́ń puee.

³²Yàntī tí nyùntī ti-baa ndaam, kí dòon̄ u-cee kí màal̀-u mbiyaamu ú ká inibool.»

³³Kujoou gbantee ní bi nyūntì bi-baa ndaam ní u gbí, ní ukpil dōoǹ u-baa cee kunyeeu gbanti. U-baa kaa nìn kpáàa béè ŋyunti ŋun u kóoń ki dōoǹee nì ŋyunti ŋun u yíkèe gba.

³⁴Kutaa wúntèe ní ukpil tùkū u-naal yii: «M fu dōoǹ ti-baa cee kunyeeu. Tí gíti nyùntī-u ndaam kunyeeu nee si mun ń cùú dòon̄ u-cee, tí ŋmā kí tīī ti-baa inibool.»

³⁵Ní bi tí nyūntì bi-baa ndaam kunyeeu gbanti, ní kiwaayee mun cūtì ki dōoǹ bi-baa cee, ní bi-baa kaa kpáàa béè ŋyunti ŋun u kóoń ki dōoǹee nì ŋyunti ŋun u yíkèe gba.

³⁶Niinee, Looti bisalib liitilee dūu cáá u-pool.

³⁷Ní ukpil màl̄ kibininjabiki ní ki pú-kì diyindi yii Moowaab. Úǹ di sá díǹ pu nee Moowaab yab naanja.

³⁸Ní u-naal mun màl̄ kibininjabiki ní ki pú-kì diyindi yii Been-Amii. Úǹ di sá díǹ pu nee Amɔn yab naanja.