Read Ntcham Genèse 2 Bible Online

Genèse 2 - Ntcham bible

Genèse 2

¹Míǹ ní Unimbɔti náań kutagbɔŋu nì tin kɔkɔ bí ku-puee, ní ki náań kitiŋ nì tin kɔkɔ bí ki-puee ki dóò.

²Unimbɔti túń u-tuuŋŋi ki dóò, ní ŋwinluluútee, u kāl̀ ki ŋūŋfì atuun ŋin kɔkɔ u ŋée pu.

³Míǹ puee Unimbɔti bīiǹ ŋwinluluútee pu ní ki gāntì-ŋu ki síiǹ u-ba, kun puee ŋwiin gbanti ní u kāl̀ ki ŋūŋfì atuun ŋin kɔkɔ u ŋáaǹee pu[4].

⁴Kutagbɔŋu nì kitiŋ náantam nín kíĺ puee dee. Ŋyunti ŋun ti-Dindaan Unimbɔti nyántì kitiŋ nì kutagbɔŋuee,

⁵kisubiki báà kiba kaa nìn dáá nyáń kitiŋ pu, ní kumoou báà kubɔ mun kaa nìn dáá nyáń, kun puee ti-Dindaan Unimbɔti kaa nìn dáá yāntì utaa nìn̄. Unil mun nìn kpá kí kpɔ̀ tikpaal kitiŋ pu.

⁶Ama kitiŋ taapu ní nnyim nìn nyēeń ki sɔ̀ŋkī an kɔkɔ.

⁷Ti-Dindaan Unimbɔti dū ntam ní ki máń unil, ní ki púfì ŋfam ki ŋá u-maŋfataabuŋyin, ní u kpántì unifoo[5].

⁸Ní ti-Dindaan Unimbɔti náań isufi kpaabu Eedeen tiŋki poon, bu bí ŋwìiń nyalaŋki pú, ní ki dū unil un u máńee ki kāaǹ bukpaayee poon.

⁹Ti-Dindaan Unimbɔti yāntì isufi in biliŋ ŋān̄ ŋkpèé nì diŋmɔlee nyáń ki bí i-ba i-ba, ní busubu bun tìì dimaŋfalee nì bun yàntī bi béetí tiŋan nì tikpitilee yú bukpaayee kansikin[6].

¹⁰Ní mbun ŋubɔ nyēeń Eedeen tiŋkin ki sɔ̀ŋkī bukpaayee. Bukpaayee poon ní mbunee cúu yākatì abuntaa anaa.

¹¹Dibuntaapeekaal ní bi yíì Piisɔn. Díǹ di māntìi tú Afiila tiŋki kin poon ní sindaariya bée.

¹²Kitiŋ gbanti sindaariyau sá umɔnti ní, ní talaalu un bi yíì bideeliyoomee nì ataŋkpamɔnti ŋin bi yíì soowamee bí niin.

¹³Dibuntaaliliitiilee ní bi yíì Giiyɔn. Díǹ di māntìi tú Kusa tiŋki kɔkɔ.

¹⁴Bi nìn yíì dibuntaatataatiilee yii Tiiga. Díǹ di pùubìń Asuur tiŋkin, ŋwìiń nyalaŋki pú. Dibuntaananaatiil ní bi yíì Eefiraati.

¹⁵Ní ti-Dindaan Unimbɔti dū unil ki kāaǹ Eedeen kpaabun ú nīn kù-bu kí nīn kpèé-bu.

¹⁶Ní ti-Dindaan Unimbɔti síiǹ unil mara nee yii: «A ŋūǹ kí ŋmɔ́ isufi in yú bukpaanee kɔkɔ biliŋ,

¹⁷ama busubu bun bil a yaa ŋmɔ́ a làá béé tiŋan nì tikpitilee ní á taa ŋmɔ́. Daliŋkin a yaa ŋmɔ́ busubu gbanti bilee, a làá kpú ní.»

¹⁸Ní ti-Dindaan Unimbɔti bí yii: «An kaa ŋān̄ unil ń nīn bí u-baba míǹ. M làá náań un làá nīn tútúǹ-uee kí ŋàl̄-u.»

¹⁹Ní u dū ntam ki máń ipeel nì inoon kɔkɔ ní ki cáań-i unil cee kí kpèè u nín làá pɔ̄-i ayin puee, án nín làá ŋá pu ní ipeel kɔkɔ ń nīn cáá ayin ŋin unil pú-iee.

²⁰Míǹ ní unil pú tiwaŋkuti kɔkɔ nì inoon nì ipeel kɔkɔ ayin. Ama unil u-ba kaa ká un làá nīn bí ki kɔ́ĺ-u kí nīn tútúǹ-uee.

²¹Ní ti-Dindaan Unimbɔti yāntì ŋgeembiim miba dɔ́miń ki cúú unil ní u gèen̄. Ŋyunti ŋun u bíi gèeǹee ní ti-Dindaan lēē u-takakalkpabil diba ní ki fātìi dūu bīiǹ.

²²Ti-Dindaan Unimbɔti dū ditakakalkpabil din u lēē unilinee ki máń unimpu ní ki cáań-u unil cee.

²³Ní unil bí yii: «Kpèè min bí nee, m-kpabiŋ kpabil sèé, m-wunnanti nanti sèé. Un bí nee ní bi làá nīn yíì unimpu. Kun puee uninjan ní bi lēeń-u.»

²⁴An pu ní uninja dāa nyēē u-ba kaa ti bí u-baa nì u-na cee ní u nì u-nimpuu ń kɔ́ tɔbin, ní kí kpántí ŋwuŋgbambaanti[7].

²⁵Uninja nì unimpu nìn pée bí dicancaŋgbeel ní kaa nìn cáá tɔb pu icoo.