Read Ntcham Genèse 21 Bible Online

Genèse 21 - Ntcham bible

Genèse 21

¹Ŋyunti bāań ní ti-Dindaan bīiǹ Saara boon ní ki lafun ŋá min u nìn pōoǹee ki tīī-u.

²Nì min kɔkɔ Abraam nìn púĺ tikpilee, Saara cáá dipool ki màl̄-u kibininjabiki ŋyunti ŋun Unimbɔti nìn pée yóoǹ Abraamee deedee[57].

³Ní Abraam pú kibiki kin Saara màl̄-uee diyindi yii Isaaki.

⁴Kibikee ŋá iwiin iniiyee ní Abraam gíí-kì dikpancandi kii Unimbɔti nín nìn tùkū-u yii ú ŋá puee[58].

⁵Abraam nìn cáá abin dilaataal ní ki nín màl̄ u-biki Isaaki.

⁶Ní Saara bí yii: «Unimbɔti yāntì m láń! Míǹ ní bin kɔkɔ làá gbìl̄ m-bɔti neeyee mun làá lā.»

⁷Ní ki gíti bí yii: «Ŋma di nìn ŋūǹ kí lì Abraam cee yii man Saara dāa bí kí ŋmàb̄ kibiki? Ama nì míǹ kɔkɔee, m màl̄-u kibininjabiki u-puti poon!»

⁸Isaaki cíkitì, ní bi gíí-u dibiil. Ŋwiin ŋun bi gíí-u dibiilee ní Abraam yāntì bi jíń jiŋaakpaan ubɔ.

⁹Saara kpēēyee, Agaar un sá Eejipiti tiŋkinee biki kin u màl̄ Abraamee di bí ki lāā Isaakee.

¹⁰Ní Saara bí Abraam yii: «Jà uyumbu nee nì u-biki. Di sá yii u-biki nì man biki Isaaki kaa máaǹ ki kpāfì kí jī a-fakal[59].»

¹¹An bɔtee nìn wùn̄ Abraam tikpil, kun puee Isimaayeel mun nìn sá u-biki ní.

¹²Ní Unimbɔti bí-u yii: «A-jipɔɔn Isimaayeel nì u-na bɔti ń taa wà-si. Gbìl̄ kí tīiǹ Saara, kun puee an sá Isaaki di làá dāá màal̀ a-naantiibi bin làá dāá fōō a-yindee[60].

¹³Ama, m làá yàntī uyumbu bikee mun ń dāá kpántí ditimbuŋkpaandi baa, kun puee u sá a-maaliŋun ní.»

¹⁴Kutaafaau pɔ̀lpɔlee ní Abraam yíkì ki nyàab̄ kpɔnɔb, ní ki dū nnyim ki gbéeǹ kuloou ki dūu būkuǹ Agaar, ní ki nyántì u nì u-biki. Agaar búntì ki tú ki yìiǹ kuteeu pu Beerseeba[61] jandi pú.

¹⁵Nnyim dāa dóò kuloou poonee ní Agaar cáá u-biki ki bíl̀ kisubiki kiba taapu mboonni.

¹⁶Ní ki sútì ki cūtìi kāl̀ ŋkpaanceeti, kun puee u lī u-neen yii: «Maa là kí ká kibiki nee nín làá kpú puee.» An puee u kāń ndan ní ki sūǹ ki yīkintí.

¹⁷Niinee Unimbɔti gbìl̄ kibikee bíi sūǹ, ní u-tuuŋŋu kālìń yilpu ki yíiń Agaar ki bí-u yii: «Agaar, ba kpá-si ní? Taa fàŋkì tiba, kun puee laakin a-biki bí nee, ki-siim bàn̄ Unimbɔti.

¹⁸Yīkì kí cùú yòon̄ kibiki kí nīn ŋúb́-kì tiŋan, kun puee m làá yàntī kí dāá nīn sá ditimbuŋkpaandi baa ní.»

¹⁹Ní Unimbɔti yāntì u-nimbiliŋ ŋāatì ní u wál̀ dinyimbɔbil nì nnyim, ní ki cūtì ki lúń ki gbéeǹ kuloou ní ki cáań ki nyūntì u-biki.

²⁰Unimbɔti yúl̀ kibikee boon ní kì wíiǹ ki gbíntì kupɔɔun ki kóò, ní ki kpántì ukpan ki tòó ipiin.

²¹U nìn kóò kupɔɔu kun nìn bí Paaran tiŋkinee ní u-na dāa cáá unimpu Eejipiti ki tīī-u.

²²Ŋyunti gbantee ní Abimeeleeki nì u-janjakpiliu Piikool dɔ́miń Abraam cee ní Abimeeleeki bí-u yii: «Ti ká yii tin kɔkɔ a bí ki ŋáańee, Unimbɔti bí a-cee.

²³Míǹ puee pùtī nì Unimbɔti doo nee yii aa làá nyā man nì m-biyaamu nì m-naantiibi boon, ní ki làá ŋá man nì m-tiŋki kin poon a kóò nee tiŋan kii ti mun nín ŋá-si tiŋan puee.»

²⁴Ní Abraam kíí-u yii: «M pūtì yii m làá ŋá míǹ».

²⁵Ama ní Abraam dū lɔkɔ un u gbìn̄ ní Abimeeleeki tɔntɔnliibi ŋá mpɔn ki fōōyee bɔti ki bíl̀ u-nimbiin.

²⁶Ní Abimeeleeki bí-u yii: «Maa nyí un di túń an tundee. Si mun a-ba kaa lī tibɔti gbanti m-cee, maa tí gbìl̄-tì ubɔ cee dalba, see díǹ.»

²⁷Niinee Abraam cúú ipii nì iŋoobu nì inaa ki tīī Abimeeleeki, ní bi-liitil pūtì ki pōoǹ tɔb.

²⁸Ní Abraam gāntì ipisal iluli ki yóoǹ.

²⁹Abimeeleeki ká mimmee ní ki bālifì-u yii: «Ba pu ní a gāntì ipisal iluli nee?»

³⁰Ní Abraam kíí-u yii: «M gāntì-i ki síiǹ kí tīī-si án nīn sá kudaaŋŋu yii man di gbìn̄ lɔkɔ nee.»

³¹An pu ní bi yíì mpaan gbanti yii Beerseeba, kun puee niin ní bi-liitil nìn pūtì.

³²Bi nín pūtì ki pōoǹ tɔb Beerseeba niinee, ní Abimeeleeki nì u-janjakpiliu Piikool fātìi nín kùǹ bi-dumpu Fiiliistii yab tiŋkin.

³³Ní Abraam cóoǹ busubu bun bi yíì yii tamariisee Beerseeba ní ki jáam̀ ti-Dindaan Unimbɔti un pée bí kí nīn cá jaanjaanee.

³⁴Abraam nìn kāl̀ Fiiliistii yab tiŋkin ki yúntì tikpil.