Read Ntcham Genèse 22 Bible Online

Genèse 22 - Ntcham bible

Genèse 22

¹Míǹ boonee, Unimbɔti cɔ́ŋkì Abraam. U nìn yíiń-u yii: «Abraam!» Ní Abraam kíí yii: «M sèé!»

²Ní Unimbɔti bí-u yii: «Yòon̄ a-jipɔmbaabil Isaaki un a néeńee kí nīn cá Mooriya tiŋkin. A yaa bàn̄ niinee, á dū-u kí ŋá saraawɔkaa[62]. M làá dàkà-si dijool din pu a làá ŋá-mi saraa gbantee.»

³Abraam yíkì kutaafaau pɔ̀lpɔlee ki kpàl̄ u-maŋki ní ki yōoǹ u-tɔntɔnliibi bili ki kútì u-jipɔɔn Isaaki pu, ní ki látì idɔ in bi làá tin dūú ŋá saraawɔkaayee. Bi bɔ́ntì míǹ ki dóòyee ní ki búntì laakin Unimbɔti bí yii bí cùee.

⁴Bi búntì míǹ, winta dalee, Abraam kpēē u-nyɔkɔpuee, ní ki wál̀ laakin Unimbɔti bí yii bí cùee pánní ndan.

⁵Ní u bí u-tɔntɔnliibi bilee yii: «Nimbi ń gbíntí doo nì kimaŋ, man nì m-jipɔɔn ń càatī lapu doo kí jāam̀ Unimbɔti kí fàtīń.»

⁶Niinee Abraam fōō idɔ in u làá tin dūú kpāā kí ŋá saraawɔkaayee u-tɔntɔnliibi cee, ki dūu túǹ u-jipɔɔn Isaaki, ní ki ŋúb́ u-ba ŋŋmi nì kijiki, ní bi-liitil nóó ki nín cá.

⁷Bi cée ní Isaaki bí u-baa yii: «M-baa!» Ní u-baa kíí-u yii: «M-biki, m sèé.» Ní u bí-u yii: «Kpèè, ŋŋmi sɔ̀ɔ, idɔ mun sɔ̀ɔ! Kin dipibil din ti làá tin dūú ŋá saraawɔkaa gbantee díǹ bí la?»

⁸Ní u-baa kíí-u yii: «M-biki, Unimbɔti u-ba di làá tin tīī-ti dipibil din ti làá dūú ŋá saraawɔkaayee.» Ní bi nín nìkì bi-saŋŋu.

⁹Bi bàn̄ laakin Unimbɔti dàkā-bi bí cùee, ní Abraam máń niin nsaraafan, ki kɔ́fì idɔ ki páaǹ ní ki bóob́ u-jipɔɔn Isaaki ki páaǹ idɔee pu.

¹⁰Abraam ŋá míǹ ki dóòyee ní ki tāntì u-ŋal ki yōoǹ kijiki kí bàà làntì u-jipɔɔn.

¹¹Kpalaayee ní ti-Dindaan tuuŋŋu téenní yilpu ní ki bí yii: «Abraam! Abraam!» Ní u kíí yii: «M sèé».

¹²Ní ntuunee bí-u yii: «Á taa dū kijiki kí gbēē kibikee ní kaa nín ŋá-kì tiba. Di sá yii kɔŋkɔnnee m béè yii a fàŋkí Unimbɔti, kaa yíì kí dū a-jipɔmbaabil kí ŋá saraawɔkaa kí tīī-u.»

¹³Ntuun sòon̄ míǹ ki dóò, Abraam fātèe, upìja di yú u-yiŋyi lɔ̀kɔ̄ kisugbooyee, ní u cūtìi cúuń ki cáań ki kūū ki ŋá saraa ki téeǹ u-jipɔɔn yil pu.

¹⁴Ní ki pú mpaan gbanti diyindi yii: «Ti-Dindaan di tìì.» An pu ní díǹ pu nee, bi lì yii: «Ti-Dindaan jool yilpu ní u tìì-ti kun lóò-tee.»

¹⁵Ní ti-Dindaan tuuŋŋu tí yíinní Abraam yilpu nliliitiim

¹⁶ki bí yii: «Ti-Dindaan nín lī pu ki síiǹee sèé: <Kii a nín kaa yíì ki bàà làá dū a-jipɔmbaabil kí ŋá saraa kii m nín bí yii á ŋá puee, m pūtì nì m-ba yii

¹⁷m làá bìin̄ a-boon tikpil. M làá bùtī a-maaliŋu ŋú nīn wīikí kii iŋmalbijaa nín kpátì kutaa pu puee, kí nīn wīikí kii tiŋku gbandi bulee. A-naantiibi di làá nīn pée pɔ̄ɔǹ bi-nannanliibi[63].

¹⁸A-maaliŋu pu ní m làá dāá dī kí bìin̄ kitiŋ pu timbuŋŋi kɔkɔ nib boon, kun puee a pílifì m-nyɔkɔ.>»

¹⁹Míǹ boonee ní Abraam fātì ki nín gítiń u-tɔntɔnliibi cee. U bāań-bee ní bi-kɔkɔ nín fàtīń Beerseeba tiŋkin. Beerseeba tiŋki gbantin ní Abraam nìn kóò.

²⁰Tíǹ jítì boonee ní bi tùkū Abraam yii Miilka mun màl̄ u-naal Naakɔɔr mbininjabiyaamu.

²¹Usi di sá ujipɔŋkpil, ní u-naal Busi dī, ní ki páaǹ Aram baa Keemuyeel

²²nì Keeseedi nì Asoo nì Piildaasi nì Yidilafi nì Beetuweel.

²³Mbininjabiyaamu munii mun Miilka màl̄ Abraam naal Naakɔɔree dee. Beetuweel bisal di sá Reebeeka.

²⁴Naakɔɔr nìn gíti cáá ubɔnti ubɔ bi yíì-u yii Reewuma, u mun nìn màl̄-u mbininjabiyaamu. Bíǹ di sá Teeba nì Gaam nì Taasi nì Maaka.