Read Ntcham Genèse 23 Bible Online

Genèse 23 - Ntcham bible

Genèse 23

¹Saara ŋá abin dilaataal nì mmuŋku nì abin aluli ní ki nín kpíì.

²U kpíì Kiiriyati-Ariba, an dàkà yii Eebrɔn, Kanaan yab tiŋkin. Ní Abraam dɔ́miń ki yáliŋkì ki súń u-nimpuu Saara kpool.

³Abraam súń ki dóòyee ní ki yíkì u-nimpuu utaŋkpiil cee ki cūtì ki ká Eeti yab ki bí-bi yii:

⁴«M sá unicaan ní ki kóò ni-kansikin doo. Ní pɔ̄maan-mi kuceeu ḿ síb́ m-nimpuu[64].»

⁵Ní Eeti yab kíí-u yii:

⁶«Pīlifiǹ-ti, ukpil! A sá Unimbɔti niliu ubɔ ní ki kóò ti-kansikin. Lēē ti-taŋkpiifalii poon ŋun pée ŋān̄ a-ceeyee kí síb́ a-nimpuu. Báà ubɔ ti-kansikin kaa làá yíí yii á taa síb́ a-niliu u-taŋkpiifaliŋu poon.»

⁷Ní Abraam yíkì ki gbāaǹ Eeti tiŋki yab nimbiin,

⁸ní ki bí-bi yii: «Ni yaa lafun kíí tiŋman yii ḿ síb́ m-nimpuuee, ní gbàam̀ Soowaar jipɔɔn Eefrɔn,

⁹ú tīī-mi u-taŋkpalɔkɔŋu[65] ŋun bí Makipeelee. U-taŋkpalɔkɔŋu gbanti bí u-kpaabukuŋu. Ú dū-ŋu kí nyāfiǹ-mi ni-kɔkɔ nimbiin án kpántí mpaan ŋun m làá nīn síb̀ m-nib ni-kansikinee. M làá pà-u ŋu-nyampooku nín sá puee deedee.»

¹⁰Eefrɔn gbanti nìn kā u-nabiyaamu Eeti yab kansikin, ní ki nìn kíí Abraam, Eeti yab bin kɔkɔ nìn dɔ́miń ki kā bi-tiŋki punyɔkɔpuee nimbiin yii:

¹¹«Aayee, ukpil! Pīlifiǹ-mi, maa làá nyāfiǹ-si kusaau nì ntaŋkpalɔkɔ ŋun bí ku-poonee. M làá dūú pɔ̄-si ní m-nabiyaamu kɔkɔ nimbiin, á cù kí síb́ a-nimpuu.»

¹²Ní Abraam fātìi tí gbāaǹ binib gbanti nimbiin

¹³ní ki bí Eefrɔn, samaa kɔkɔ nimbiin yii: «M gbāam̀-si, gbìl̄ kí tīiǹ-mi. Yàntī ḿ dā kusaau gbanti kí pà-si ku-daaku nín sá puee, á fōō ḿ ŋmā kí síb́ m-nimpuu niin.»

¹⁴Ní Eefrɔn kíí Abraam yii:

¹⁵«Ukpil, kusaau gbanti nimbiŋmiiku jitɔmbi alaataa anaa kaa ŋūǹ kí nīn sá tiba man nì si kansikin, cáá a-nimpuu kí síb́.»

¹⁶Niinee ní Abraam gbìl̄ ki tīī nì Eefrɔn ní ki ŋmāntì kusaauee daaku nimbiliŋ jitɔmbi alaataa anaa, kii bi nín nìn pée kpántí puee ki tīī-u, ki nóó nì u nín nìn lī pu Eeti yab kɔkɔ nimbiinee.

¹⁷An nín dī pu ní Eefrɔn saaku kun bí Makipeela, Mamiree nyɔkɔpuee nì ntaŋkpalɔkɔ ŋun nìn bí kusaau gbanti poonee nì isufi in kɔkɔ nìn yú ku-poonee

¹⁸dūu kpántì Abraam wantee dee. Eeti yab nì bin kɔkɔ nìn kpáfì kitiŋ gbanti punyɔkɔpuee nimbiin ní tíǹ gbanti kɔkɔ nìn jítì.

¹⁹Míǹ boonee ní Abraam cáá u-nimpuu Saara ki síb́ ntaŋkpalɔkɔ gbanti poon, Makipeela saakun Mamiree caŋin, an dàkà yii Eebrɔn, Kanaan yab tiŋkin.

²⁰Ki yōoǹ yaadal wiiŋŋu ní Eeti yab dū kusaauee nì ntaŋkpalɔkɔ ŋun bí ku-poonee ki nyáfiǹ Abraam ní an kpántì u-wanti, u dūu ŋá kuceeu ki síb̀ u-yab.