Read Ntcham Genèse 26 Bible Online

Genèse 26 - Ntcham bible

Genèse 26

¹Abraam yuntiŋu ŋkùm nín nìn nyáń puee, boonee ŋkùm miba nìn gíti nyáń kitiŋ pu. Isaaki nìn cūtì Geeraar tiŋkin ki ká Fiiliistii yab bɔtiu Abimeeleeki.

²Ní ti-Dindaan nyántì u-ba ki dàkā Isaaki ní ki bí-u yii: «Á taa cù Eejipiti. Nín̄ kā kitiŋ kin m làá dàkà-see poon.

³Á gbíntí kitiŋee poon, m làá nīn bí a-cee ki làá bìin̄ a-boon, kun puee sii nì a-naantiibi ní m làá dū kitiŋ gbanti kɔkɔ kí tīī. M làá ŋá míǹ kí dàkà yii m nín nìn pōoǹ min ki tīī a-baa Abraamee, maa làá kpántí.

⁴M làá yàntī a-naantiibi ń bùtī kii iŋmalbijaa in bí kutaa puee ní kí dū kitiŋ nee kɔkɔ kí tīī-bi. Sii maaliŋu pu ní m làá dī kí bìin̄ duulinya nib kɔkɔ boon,

⁵kun puee Abraam pílifì m-nyɔkɔ ki nóó m nín lī puee, nì tin m kpáafì-uee ní ki ŋúb́ m-marab nì m-koobiliŋ.»

⁶An pu ní Isaaki gbíntì ki kāl̀ Geeraar tiŋkin.

⁷Ní niin yab bālifì-u un ní Reebeeka sée. Ní u kíí-bi yii: «U sá m-niisal ní.» Waa nìn là kí lì yii Reebeeka sá u-nimpuu, kun puee u nìn fàŋkí bí taa kpɔ̀-u u-nimpuu Reebeeka pu, di sá yii u nìn ŋān̄ unimpu tikpil.

⁸Isaaki kāl̀ niin an yúntì. Dalbee Fiiliistii yab bɔtiu Abimeeleeki gbóoń tɔkɔla ki kpēēyee, Isaaki di bí ki gbíilíǹ u-nimpuu Reebeekee.

⁹Ní u yíiń Isaaki ní ki bí-u yii: «Báà an ŋá pu a-nimpuu dee. Ba pu ní a tùkū-ti yii u sá a-niisal ní?» Ní Isaaki kíí-u yii: «Kun pu m lī mimmee di sá m fāŋkì yii bí taa kpɔ̀-mi u-pu ní.»

¹⁰Ní Abimeeleeki bí-u yii: «Ba pu ní a ŋá-ti míǹ? An kíǹ fiii m-nib kansikin ubɔ ń bàà dòon̄ nì a-nimpuu, ní á bàà yàntī tí kɔ́ tibɔtin.»

¹¹Niinee ní Abimeeleeki kpáafì u-samaau kɔkɔ ki lī yii: «Un yaa pée gbēē Isaaki nì u-nimpuuee, see bí kpɔ̀ udaan.»

¹²Dibindi gbantee Isaaki nìn kùn̄ tijin kitiŋ gbantin ní ki dāa cáń míǹ dilaataal pu, kun puee Unimbɔti nìn bīiǹ u-boon.

¹³U nìn kpántì ŋŋmam daan ní u-gaajati mɔ̀tīi kútí ki cá ní u dāa dūu ŋá ugaajakpaan.

¹⁴U nìn cáá tipicaŋkpun nì tiŋɔcaŋkpun nì tinacaŋkpun nì bitɔntɔnliibi kupaau. An nìn yāntì Fiiliistii yab kíǹ ki ná-u.

¹⁵Ní Fiiliistii yab dū ntam ki gbíŋkì lɔkɔb bin kɔkɔ u-baa Abraam nìn yāntì u-tɔntɔnliibi gbìn̄ ŋyunti ŋun u dáá bée.

¹⁶Ní Abimeeleeki bí Isaaki yii: «A ká mpɔn tikpil ki jítiǹ-ti, míǹ puee yīkì ti-cee.»

¹⁷Ní Isaaki yíkì niin ki cūtìi kíǹ ki kóò Geeraar tantakalin.

¹⁸Ní Isaaki yāntì u-tɔntɔnliibi fātìi kɔ́tì lɔkɔb bin u-baa Abraam nìn dáá bí ki gbìn̄ kin u-kúm boon Fiiliistii yab gbíŋkèe. Ní u fātìi pú lɔkɔb gbanti ayin ŋin u-baa nìn pée yíì-bee.

¹⁹Isaaki tɔntɔnliibi bíi gbì lɔkɔ ditantakalee poonee ní ki tin nyáń nnyimmɔntiim pu.

²⁰Ní Geeraar yab pikpaaliibi táká Isaaki pikpaaliibi ki lī yii: «Timbi di yì lɔkɔ nee nyim», an pu ní Isaaki pú lɔkɔ gbanti diyindi yii Eeseeki, taapu di sá yii <Bi kpákáǹ-mi.>

²¹Ní u-tɔntɔnliibi gíti gbìn̄ lɔkɔ ubɔ ní bi tí dɔ́miń ki táká-bi, ní Isaaki pú lɔkɔ gbanti mun diyindi yii Siitina, taapu di sá yii <Bi jáń nì mi.>

²²Ní bi yíkì niin ki gíti tí cūtìi gbìn̄ laaba, ní baa ti táká-bi. Ní u pú lɔkɔ gbanti úǹ diyindi yii Reewoobooti, ki lī yii: «Ti-Dindaan yāntì ti tɔ́ ti-ba ní an bútì-ti kitiŋ nee poon.»

²³Boonee ní u yíkì niin ki búntì Beerseeba.

²⁴Kunyeeu gbantee ní ti-Dindaan nyántì u-ba ki dàkā-u ní ki bí-u yii: «Man di sá a-baa Abraam Nimbɔtiu. Á taa fàŋkì, m bí a-cee. M làá bìin̄ a-boon kí bùtī a-maaliŋu m-tɔntɔnliu Abraam pu.»

²⁵Ní Isaaki máń nsaraafan niin ki jáam̀ ti-Dindaan. Niin mun ní u gāā u-tantiu ní u-tɔntɔnliibi gbìn̄ lɔkɔ.

²⁶Isaaki bí Beerseeba niinee ní ubɔti Abimeeleeki nì u-bɔɔ Awusati nì u-janjakpiliu Piikool nyáń doooo Geeraar ki cūtì u-cee.

²⁷Ní Isaaki bí-bi yii: «Naa là m-bɔti ní ki jìn̄-mi ni-tiŋkin, ni gíti nyàab̀ ba m-cee doo?»

²⁸Ní bi kíí-u yii: «Ti dáań ki ká yii ti-Dindaan bí a-cee. An pu ní ti ká nlandɔkɔ yii an máaǹ ti nì si ń kpāfì kí pùtī kí pòon̄ tɔb, mpèé ń nīn bí ti-kansikin.

²⁹Á pùtī yii aa làá dāá ŋá-ti tikpitil tiba kii ti mun nín kaa nìn ŋá-si tikpitil tiba puee. Ti nìn ŋá-si tiŋan ní ki yāntì a yíkì ti-cee nì ŋgbansɔŋfi. Kɔŋkɔnnee ti béè yii sii di sá un boon ti-Dindaan bīiǹee.»

³⁰Niinee ní Isaaki bɔ́ntì jiŋaal ki fōō-bi kucaŋu, ní bi jíń ki nyùn̄.

³¹Ku wúntì kutaafaauee ní bi pūtì ki pōoǹ tɔb. Míǹ boonee ní Isaaki nyántì-bi nsanni, ní bi nín kùǹ nì dipɔɔsɔŋkil.

³²Ŋwiin gbanti ní Isaaki tɔntɔnliibi cáań-u lɔkɔ un bi bíi gbèe bɔti ki lī yii: «Ti gbìn̄ ki cíl̀ nnyim pu.»

³³Ní u pú lɔkɔ gbanti diyindi yii Siiba. An pu ní bi gbíntìi yíì kitiŋ gbanti díǹ pu nee yii Beerseeba, taapu di sá yii <dipùtil lɔkɔu.>

³⁴Eesayuu bàn̄ abin imuŋku ilee ní ki cáá Eeti yab sapɔmbi bili, upeepeekaa di sá Beerii bisal Judiiti, ní uliliiti sá Eelɔn bisal Basmaati.

³⁵Binimpoobi gbanti nìn yāntì Isaaki nì u-nimpuu Reebeeka nyɔmmu túŋkì.