Read Ntcham Genèse 27 Bible Online

Genèse 27 - Ntcham bible

Genèse 27

¹Isaaki nìn púĺ ní u-nimbiliŋ pēefì waa ti wāĺ. Dalbee ní u yíiń u-jipɔŋkpiliu Eesayuu ní ki bí-u yii: «M-jipɔɔn bí laa!» Ní u kíí-u yii: «M-baa, m sèé.»

²Ní Isaaki bí-u yii: «M púĺ ní nee, maa nyí m-kúm dal.

³Míǹ puee, yòon̄ a-tɔbu nì a-baatandi nì a-kpáŋwanti kí cù kukpɔŋu kí kpɔ̀ń-mi upeel.

⁴A yaa kūū ki bāańee, á ŋá tijin tin m pée néeń ki jīǹee kí cáań-mi ḿ jī. M yaa jíńee, ḿ mèè kí bìin̄ a-boon kí wàatī kí nín kpú.»

⁵Ŋyunti ŋun ní Isaaki nìn bíi sòoǹ nì u-jipɔɔn Eesayuu mimmee, Reebeeka nìn bí ki pílifí. Eesayuu búntì kupeekpɔŋuee,

⁶ní Reebeeka bí Jaakɔb yii: «M gbìl̄ a-baa bíi tùkù a-maan yii:

⁷<Cù kukpɔŋu kí cáań tipeenan kí ŋá tijin tin m pée néeń ki jīǹee, ḿ jī ní kí mèè kí bìin̄ a-boon ti-Dindaan nimbiin kí wàatī kí nín kpú.>

⁸An puee, m-jipɔɔn, pīlifì m nín làá tùkù-si puee kí ŋá míǹ.

⁹Á cù kuŋɔcaŋkpuŋun kí lēeń iŋɔpɔɔn ili kí cáań-mi ḿ ŋá tijin tin a-baa néeńee

¹⁰á cáá tīī-u ú jī, ní kí mèè kí bìin̄ a-boon kí wàatī kí nín kpú.»

¹¹Ní Jaakɔb kíí u-na yii: «Kpèè, m-maan Eesayuu úǹ cáá tikuti ní man kaa cáá.

¹²An yaa yíì m-baa làá máań m-wunti kí kpèè. U yaa béè yii an sá mamee, m kpántì uŋmatinli dee u-cee. Mimmee m mēē mbusu ki tɔ́ m-ba pu dee, an kaa ti sá dibiindi.»

¹³Ní u-na bí-u yii: «Sii dee pīlifì man nín lī puee kí cùú cáań tin m bí yii á cáańee. Án yaa láa kpántì mbusuaaa, án gítí man pu.»

¹⁴Niinee ní Jaakɔb cūtìi cáań iŋoobuee ki tīī u-na, ní u-na dūu ŋá tijin tin u-baa néeń ki jīǹee.

¹⁵Reebeeka ŋá tijin ki dóòyee ní ki dū u-jipɔŋkpiliu Eesayuu bɔkutimɔntiŋ ŋin bí u-cee kudiinee ki dūu pēeǹ u-jipɔɔn uwaal Jaakɔb.

¹⁶Ní ki dū ŋŋɔgban ki fìn̄ u-ŋalii nì u-sil laakin dɔ̄ fámee.

¹⁷Ní ki dū tijin tin u ŋée nì kpɔnɔb bin u púĺee ki dūu ŋúbiǹ Jaakɔb ú cáá tīī u-baa.

¹⁸Jaakɔb bàn̄ee ní ki yíiń u-baa yii: «M-baa!» ní u-baa kíí-u yii: «M sèé. An sá sii m-jipɔɔn ŋma?»

¹⁹Ní Jaakɔb kíí-u yii: «An sá man a-jipɔŋkpiliu Eesayuu. Min a bālifì yii ḿ ŋá kí cáań-see ní m ŋá ki cáań. M gbāam̀-si, yīkìí kàl̄ kí jī tipeenan tin m cáańee jinti kí mèè kí bìin̄ m-boon.»

²⁰Ní Isaaki bālifì u-jipɔɔn yii: «A ŋá mana ki ŋúń ki ká upeel malaa ki kūū míǹ?» Ní u kíí-u yii: «An sá ti-Dindaan a-Nimbɔtiu di yāntì m ká upeel malaa ki kūū.»

²¹Ní Isaaki bí-u yii: «M-jipɔɔn, sútiń kí pìl̄-mi yéè ḿ máań-si kí kpèè yii a lafun sá m-jipɔɔn Eesayuu tiŋmanaaa?»

²²Ní u sútì ki pìl̄ u-baa ní u-baa máfì máfì-u, ní ki bí yii: «Nneen sá Jaakɔb neen, ama ní iŋal sá Eesayuu ŋalii.»

²³Waa nìn ŋúń ki béè-u, kun puee u-ŋalii nìn cáá tikuti kii u-maan Eesayuu yayee, ní u mēē ki bīiǹ u-boon.

²⁴Ní ki bālifì-u yii: «Kéè an sá sii m-jipɔɔn Eesayuu naa?» Ní Jaakɔb kíí-u yii: «Iiin.»

²⁵Ní u bí yii: «Too, m-jipɔɔn, cáań-mi upeel un a kūūyee jinti ḿ jī kí mèè kí bìin̄ a-boon.» Ní Jaakɔb cáań tijin ki yóoǹ-u u jíń, ní ki cáań-u ndaam u nyùn̄.

²⁶U jíń ki dóòyee ní ki bí Jaakɔb yii: «M-jipɔɔn, sútiń kí dāá kpàl̄-mi.»

²⁷Ní Jaakɔb sútì ki pìl̄ Isaaki ki kpàl̄-u, ní Isaaki núuń u-bɔkutil sɔnsɔfiŋu ní ki mēē ki bīiǹ u-boon ki lī yii[73]: «Tiŋman, m-jipɔɔn sɔnsɔfiŋu bí kii kusaau kun pu ti-Dindaan bīiǹee ní.

²⁸<Unimbɔti ń tīī a-kpaatanti nsɔŋfi ŋun nyēeń yilpuee, kí yàntī a-tiŋki ń nīn gàm̀ kí lòoǹ tiŋan, tikpaajin nì ndamam ń gbóotí a-cee.

²⁹Anibul tikpil ń nīn sá a-tɔntɔnliibi, atimbun nib ń nīn gbàantí a-nimbiin. Á nīn sá a-nabiyaamu bɔtiu, a-naalib ń nīn gbàantí a-nimbiin! Un yaa mēē mbusu ki tɔ́ a-puee, án gítí udaan pu! Un yaa ŋá-si tiŋanee, udaan mun ń ká tiŋan!>»

³⁰Isaaki mēē ki bīiǹ Jaakɔb boon u nyáń kpalaayee, u-maan Eesayuu mun nyánní kukpɔŋu ki bāań dee.

³¹U mun bāańee ní ki ŋá tijin ki cáa cūnnì u-baa ní ki bí-u yii: «M-baa, yīkì kí jī tipeenan jinti tin ní man a-jipɔɔn ŋá ki cáań-see. A yaa jíńee, á mèè kí bìin̄ m-boon.»

³²Ní u-baa bālifì-u yii: «An sá sii ŋma ní?» Ní u kíí yii: «An sá man a-jipɔŋkpiliu Eesayuu.»

³³Niinee ní Isaaki wunti fáá dijinjikil ŋkpitim pu, ní u bí yii: «Kin ŋma di cūtì kukpɔŋu ki kūuń upeel ki ŋá tijin ki cáań-mi ní? M dáá pée jíń ki dóò ki mēē ki bīiǹ u-boon kpalaa ní sii mun dūu bāań nee. M nín mēē ki bīiǹ u-boon miŋyee, míǹ ní an làá ŋá kí tīī-u.»

³⁴Eesayuu nín gbìl̄ tin u-baa sòon̄ee ní u fáá mbiil mpɔn nì dipɔɔbiildi ní ki bí u-baa yii: «Abàa m-baa, pée mèè kí bìin̄ ma mun boon!»

³⁵Ní u bí-u yii: «A-naal dɔ́miń ki kíil̀-mi ki fōō a-biindi.»

³⁶Ní Eesayuu bí yii: «Bi nín yíì-u yii Jaakɔb <Uŋmatinlee> pu ní u líbitì-mi míǹ mili kɔkɔɔɔ? U nìn fōō m-kpiti[74], ní kɔŋkɔnnee u tí fōō m-biindi. Mimmee, m-baa, aa kíǹ-mi dibiindi dibaaa?»

³⁷Ní u-baa fātìi kíí-u yii: «Kpèè, úǹ ní m dūu ŋá a-kpiliu, ní ki dū u-nabiyaamu kɔkɔ ki ŋá u-tɔntɔnliibi, ní ki bí yii ú nīn cáá tikpaajin nì ndamam tikpil, kin ba di gíti bí m ŋūǹ kí ŋá kí tīī-si, m-jipɔɔn!»

³⁸Ní Eesayuu bí u-baa yii: «Mimmee dibiindi nee baba di pée bí a-ceeee, m-baa? Bìin̄ ma mun pu, m-baa!» U lī mimmee ní ki bíi sūǹ mpɔn[75].

³⁹Ní u-baa bí yii: «Too, kpèè laakin sii làá nīn kóòyee, tijin làá nīn kpá niin. Kitiŋ kaa làá nīn cáá nsɔŋfi ŋun nyēeń yilpuee.

⁴⁰Sii baatandi pu ní a làá nīn jīǹ. A làá nīn bí a-naal taapu ní. Ama a yaa láa pɔ́ɔǹ ki fōō a-bee ní a dāa léetí a-neen kpancikiliu.»

⁴¹Niinee Eesayuu kíǹ ki ná Jaakɔb dibiindi din u fōō bi-baa ceeyee pu, ní ki lì u-neen yii: «M-baa kúm kaa ti dátì. U yaa kpíìyee, see ḿ kpɔ̀ m-naal Jaakɔb.»

⁴²Ní bi dɔ́miń ki tùkū Reebeeka tin u-jipɔŋkpiliu Eesayuu bí ki lì yii u làá ŋée. Niinee ní u yíiń u-jipɔɔn uwaal Jaakɔb ní ki bí-u yii: «Kpèè, a-maan Eesayuu là kí kpɔ̀-si kí tɔ̀ ipɔntoon.

⁴³An puee m-biki, á pīlifì m nín làá sāŋkì-si puee! Yīkìí sāǹ kí nīn cá m-niija Laaban cee, Kaaran tiŋkin.

⁴⁴Á nīn bí niin kí dāá sāā ŋyunti ŋun a-maan ŋuul làá dāá sɔ̀ŋkèe.

⁴⁵U yaa láa súntì tin a ŋá-u u-ŋuul sɔ̄ŋkèe, m làá dāá tɔ̄ bí yíiń-si á gítiń doo. M yaa kaa ŋá míǹ, m làá dāá lóó ni-liitil nee ŋwimbaanti ní.»

⁴⁶Ní Reebeeka bí Isaaki yii: «M-naŋki nyáń nì m-ba Eeti yab nimpubiyaamu nee pu. Jaakɔb mun yaa gíti cáá kitiŋ nee poon unimpu kii bin bí neeyee, man yaa pūtì kpíì an sɔ́!»