Read Ntcham Genèse 29 Bible Online

Genèse 29 - Ntcham bible

Genèse 29

¹Ní Jaakɔb yíkì ki nìkī u-saŋŋu ki túĺ ntimu mun bí ŋwìiń nyalaŋki púee.

²U kpēēyee, lɔkɔ ubɔ dɔ̄ akpaanni tipicaŋkpun tita dɔ̄ ki kɔ́ĺ. Niin ní bipikpaaliibi nìn lúù nnyim ki nyùntī ipii. Ditaŋkpakpaandi diba nìn pīī lɔkɔee nyɔkɔpu.

³Míǹ puee bi nìn cīití ipii kɔkɔ yaa kpáfì ki dóòyee ní bí nín bíntí ditaŋkpalee lɔkɔ nyɔkɔ ní kí nyùntī i-kɔkɔ. I yaa nyùn̄ ki dóòyee ní bí fàtīí bíntí ditaŋkpalee kí pìin̄ lɔkɔee nyɔkɔ.

⁴Ní Jaakɔb bālifì bipikpaaliibee yii: «M-nabiyaamu, ni sá la ní?» Ní bi kíí-u yii: «Ti sá Kaaran yab ní.»

⁵Ní u bālifì-bi yii: «Ni nyí Laaban, Naakɔɔr naantiiuaaa?» Ni bi kíí-u yii: «Iiin, ti nyí-u.»

⁶Ní u bālifì-bi yii: «U pɔ̄ɔ̄ tiŋanaaa?» Ní bi kíí-u yii: «Alaafiya bí-u. Kpèè, u-bisal Raseel di dòoń nì ipii nee.»

⁷Ni u bí-bi yii: «Ŋwìiń dáá bí, an kaa láá ŋmāntì ŋyunti ŋun bi kpáfí ipiiyee. Míǹ puee ní lúń nnyim kí nyùntī-i, ni yaa nyūntì-iee ní gíiǹ-i kupikpaaun.»

⁸Ní bi kíí-u yii: «Taa ŋūǹ ki ŋá míǹ, asee ipii kɔkɔ yaa bāań ki kpáfì. Niinee ní tí nín cúú ditaŋkpal kí bíntí ní kí nyùntī-i.»

⁹Bi yú ki sòoǹ míǹ ní Raseel dūu bāań nì u-baa piii, di sá Raseel nìn sá upikpaal ní.

¹⁰Jaakɔb nín ká u-wee Laaban bisal Raseel péetiń u-baa piiiyee, ní u dɔ́miń ki cúú ditaŋkpalee ki bíntì ní ki nyūntì-i.

¹¹Ní Jaakɔb kpàl̄ Raseel ní ki bíi sūǹ nì dipɔɔpindi.

¹²Ní ki bí Raseel yii: «M sá a-baa niisal Reebeeka jipɔɔn ní.» Ní Raseel sáǹ ki cūtì ki tùkū u-baa.

¹³Laaban nín gbìl̄ yii u-niisal jipɔɔn bāańee, ní u sáǹ ki túŋkì-u. U bàn̄ee, ní ki kpàl̄-u ki nákáǹ u-ba, ní ki cáá-u ki cūnnì mmɔŋki. Ní Jaakɔb máafì-u tin jítèe kɔkɔ.

¹⁴Ní Laaban bí Jaakɔb yii: «Tiŋman, a baasii sá m-niliu ní kiŋkiŋ.» Jaakɔb nìn kāl̀ Laaban cee ki sāā uŋmal ubɔ.

¹⁵Dalbee ní Laaban bí Jaakɔb yii: «A nín sá m-niliuee puee, á nīn tūǹ ditundi míǹ faalaa ki tìì-maaa? An puee tùkù-mi kun a là ḿ dāá pà-see.»

¹⁶Laaban nìn cáá bisapɔmbi bili, bi yíì ukpil yii Leeya ní ki yíì uwaal yii Raseel.

¹⁷Leeya kaa nìn cáá kunyaaŋŋu, ama ní Raseel úǹ nìn bí gbàlgbal ki ŋān̄ tikpil.

¹⁸Jaakɔb nìn néeń Raseel, ní ki bí u-wee yii: «M làá tɔ̄ ditundi kí tīī-si abin aluli á dū a-bisal uwaal Raseel kí tīī-mi.»

¹⁹Ní Laaban bí-u yii: «An mɔ̄ǹ-mi ḿ dū m-bisal kí tīī sii ki jítiǹ ḿ dū-u kí tīī uniyaŋyan. Nín̄ kā m-cee.»

²⁰Ní Jaakɔb túń ditundi abin aluli Raseel pu ní an kaa kpáàa súŋkì u-cee, kun puee u nìn néeń-u tikpil.

²¹Niinee ní Jaakɔb bí Laaban yii: «M túń ditundi ki sāā m-yuntiŋu, an puee dū m-nimpuu ki tīī-mi ḿ cáá.»

²²Ní Laaban kóoǹ niin yab kɔkɔ ki kpáfì ní bi jíń tinimpucan jiŋaaliu.

²³Kunyeeuee ní Laaban yōoǹ u-biseebiki Leeya ki cáa kɔ́ǹ Jaakɔb cee ní u nì Jaakɔb kpáfì.

²⁴Ní Laaban dū u-yumbusapɔɔŋwu Siilpa ki tīī u-bisal Leeya ú nīn bí u-cee ki tūǹ ditundi ki tìì-u.

²⁵Kutaa wúntèe, Jaakɔb kpēēyee Leeya dee, ní an ŋá-u bitii. Ní u bālifì u-wee Laaban yii: «Ba ŋá ní a ŋá-mi mimmee? An kaa sá Raseel pu ní m kāl̀ a-cee ki túń ditundi ki tīī-saaa? Ba pu ní a kíil̀-mi ki dū Leeya ki tīī-mi?»

²⁶Ní Laaban kíí-u yii: «Timbi cee dooyee, an sá-ti dikoobil ní, uwaal kaa pēentí ukpil kí mɔ̄ǹ.

²⁷Míǹ puee púntí sii nì un bí nee nimpucanti kinyɔŋ nee, kin dāa bíńee, ḿ dū Raseel mun kí tīī-si, á tí kàl̄ abin aluli kí tɔ̄ ditundi kí tīī-mi.»

²⁸Ní Jaakɔb lafun ŋá míǹ. U púntì Leeya nimpucanti kinyɔŋ gbantee, ní Laaban dū u-bisal uwaal Raseel ki kútì-u.

²⁹U nìn dū u-yumbusapɔɔŋwu Biila ki tīī Raseel ú nīn bí u-cee ki tūǹ ditundi ki tìì-u.

³⁰Ní Jaakɔb nì Raseel mun kpáfì. Jaakɔb nìn néeń Raseel ki jítiǹ Leeya, ní ki nìn gíti kāl̀ abin aluli ki túń ditundi ki tīī Laaban.

³¹Ti-Dindaan nín ká yii Jaakɔb kaa néeń Leeyayee, ní u pú-u mmaal, ní Raseel úǹ sá uŋmaŋŋmanti.

³²Leeya nìn dūu cáá dipool ki màl̄ kibininjabiki, ní ki pú-kì diyindi yii Rubeen. Di sá yii un nìn lī yii: «Ti-Dindaan ká m-falaau, kɔŋkɔnnee m-cal làá nīn kíǹ ki néeń-mi.»

³³Ní u gíti cáá dipool ki màl̄ kibininjabiki, ní ki bí yii: «Ti-Dindaan nín ká yii m-cal kaa néeń-mee ní u gíti pú-mi kibininjabiki kiba.» Ní u pú-kì diyindi yii Simeeyɔn, taapu di sá yii: <Ti-Dindaan gbìl̄.>

³⁴Ní u fātìi tí cáá dipool ki màl̄ kibininjabiki, ní ki bí yii: «Kɔŋkɔnnee m-cal làá dū u-ba kí nákáǹ-mi, kun puee m màl̄-u bininjab bita.» An pu ní u pú-kì diyindi yii Leefii, taapu di sá yii: <M-cal làá dāá dū u-ba kí nákáǹ-mi.>

³⁵Ní u fātìi tí cáá dipool ki màl̄ kibininjabiki, ní ki bí yii: «Kɔŋkɔnnee m làá nyɔ̄ŋkì ti-Dindaan ní.» An pu ní u pú-kì diyindi yii Juuda, taapu di sá yii: <M làá nyɔ̄ŋkì m-Dindaan.> Niinee ní u gbēeǹ mmaal.