Read Ntcham Genèse 3 Bible Online

Genèse 3 - Ntcham bible

Genèse 3

¹Ukoobu di nìn nyí diŋmatindi ipeel in ti-Dindaan Unimbɔti nìn náańee kɔkɔ kansikin. Dalbee ní u dɔ́miń ki bí unimpu yii: «Tiŋman ní Unimbɔti lafun lī yii ní taa ŋmɔ́ bukpaa nee poon subiliŋaaa?»

²Ní unimpu kíí-u yii: «Ti ŋūǹ kí ŋmɔ́ isufi in yú bukpaa poonee biliŋ.

³Ama busubu bun yú bukpaa kansikinee bil ní Unimbɔti bí yii tí taa ŋmɔ́ kí taa gbēē-bu, an yaa sá fám ti làá kpú.»

⁴Niinee ní ukoobu bí unimpu yii: «Kaa sá míǹ, naa làá kpú.

⁵Di sá Unimbɔti nyí yii daliŋkin ni yaa ŋmɔ́ busubu gbanti bilee, ni-nimbiliŋ làá ŋúbití ní ní nīn kíǹ ki nyí tiŋan nì tikpitil kii úǹ Unimbɔti nín nyí puee.»

⁶Unimpu mun ká yii busubuee bil ŋān̄ ki mɔ̄ diŋmɔl, ki cáá nnimbitaataam, ki lafun máaǹ kí ŋúbití unil nimbiliŋ, ní u kītì ki ŋmɔ́. U-cal bí u-cee ní u tīī u mun ní u ŋmɔ́.

⁷Niinee ní bi-liitil nimbiliŋ cúu ŋúbitì ní bi ká yii bi bí dicancaŋgbeel, ní bi tīfì busubu bun bi yíì fiigee faati ki ŋáĺ ki dūu lōoǹ.

⁸Kujoou jóotì kubuŋu bíi jītí fílfilee ní bi gbìl̄ ti-Dindaan Unimbɔti pu u bí ki còom̄ bukpaan. Ní bi sáǹ ki bál̀-u bukpaayee sufii kansikin.

⁹Ní ti-Dindaan Unimbɔti yíiń uninja yii: «A bí la ní?»

¹⁰Ní u kíí-u yii: «M nín bí bukpaan ki gbìl̄ a-puee ní m fāŋkì, kun puee m bí dicancaŋgbeel, an pu ní m bál̀.»

¹¹Ní ti-Dindaan Unimbɔti bí-u yii: «Ŋma tùkū-si yii a bí dicancaŋgbeel? Àá a ŋmɔ́ busubu bun bil m kpáafì-si yii á taa ŋmɔ́ee ní?»

¹²Ní uninja kíí-u yii: «Unimpu un a cáań ki ŋàl̄-mee di kītì disubil gbanti ki tīī-mi ní m ŋmɔ́.»

¹³Ní ti-Dindaan Unimbɔti bí unimpu yii: «Ba di yì-tì ní a ŋá míǹ?» Ní unimpu kíí-u yii: «Ukoobu di kíil̀-mi ní m ŋmɔ́[8].»

¹⁴Ní ti-Dindaan Unimbɔti bí ukoobu yii: «An nín ŋá pu ní a ŋá mimmee, m tɔ́-si mbusu tiwaŋkuti nì ipeel kɔkɔ kansikin. A làá nīn kíǹ ki fù a-bindi pu ní. A-jinti di làá nīn kíǹ ki sá ŋkpɔŋkpɔm kí tin sāā a-kúm dal.

¹⁵M làá náań kudɔ̀ŋu kí bíĺ sii nì unimpu kansikin, kí bíĺ a-maaliŋu nì u-maaliŋu kansikin. U-maaliŋu làá dāá tāā kí mátí a-yil, ní sii ń dāá jú úǹ tagbíndi[9].»

¹⁶Ní u bí unimpu yii: «A nín ŋá miŋyee, m làá gbéeǹ-si timatíǹdi gìńdi. Nì falaa ní a làá nīn màal̀ a-biyaamu. A-cal neeliŋu làá nīn pée cáá-si, ama úǹ di làá nīn cáá sii pu mpɔn.»

¹⁷Ní ki bí uninja yii: «A nín ŋá pu ki pílifì a-nimpuu nyɔkɔ ní ki ŋmɔ́ busubu bun bil man kpáafì-si yii á taa ŋmɔ́ee, a-puee m tɔ́ kitiŋ mbusu. A làá nīn ŋáań falaa ní kí nín ká tijin kí jī. Míǹ ní án làá nīn bí-si áli kí tin sāā a-kúm dal.

¹⁸«Apɔn nì abɔjanaakun di làá nīn nyēē a-kpaabun, a-kpaajinti ní a làá nīn jīǹ[10].

¹⁹See á tɔ̄ ditundi kí káaĺ kutuntuŋu a-yigbeel pu ní kí wàatī kí nín ká tijin kí jī. Án làá nīn pée bí-si míǹ ní, áli á dāá fàtīí gítí ntam min m lēē ki máń-see poon. Kun puee a sá ŋkpɔŋkpɔm ní ki làá fàtīí gítí ŋkpɔŋkpɔm.»

²⁰Ní uninja pú u-nimpuu diyindi yii Awa, taapu di sá yii un bí dimaŋfalinee, kun puee úǹ di sá binifoobi kɔkɔ na.

²¹Ní ti-Dindaan Unimbɔti dū tigban ki lōoǹ Adam nì u-nimpuu.

²²U ŋá míǹ ki dóòyee ní ki bí yii: «Kɔŋkɔnnee, unil kpántì kii ti-kansikin ubɔ dee, ki kíǹ ki nyí tiŋan nì tikpitil. Tí taa yàntī ú ŋmɔ́ dimaŋfal subil kí nīn bí jaanjaan kaa kúù[11].»

²³Niinee ní ti-Dindaan Unimbɔti jìn̄-u Eedeen kpaabun ú cù kí nīn kù kitiŋ kin pu bi lēē ki máń-uee.

²⁴U jìn̄ unil mimmee ní ki cáań keerubimbi[12] ki yóoǹ bukpaayee nyɔkɔpu ŋwìiń nyalaŋki pú, bi ŋúb́ kitàataajiki ki fīintí an ŋmóò làka laka, ki yú dimaŋfal subu saŋŋu pu ki cí-ŋu.