Read Ntcham Genèse 31 Bible Online

Genèse 31 - Ntcham bible

Genèse 31

¹Jaakɔb nìn gbìl̄ Laaban jipɔmbi bí ki lì yii: «Jaakɔb fōō timbi baa wanti kɔkɔ, an wanti pu ní u kpántì ugaaja nee.»

²Jaakɔb nín kpēē Laaban nimbiinee, u dáań ki ká yii u nì u kansikin kaa ti mɔ̄ kii dooooyee an nín nìn bí puee.

³Ní ti-Dindaan bí Jaakɔb yii: «Nín̄ gítí a-naanjab tiŋkin a-dumpu, man làá nīn bí a-cee.»

⁴Niinee ní Jaakɔb tú bi yíiń u-nimpoobi Raseel nì Leeya bí dāan̄ u-cee kusaaun laakin u-waŋkuti bée.

⁵Bi bàn̄ Jaakɔb ceeyee ní u bí-bi yii: «M dáań ki ká ni-baa nimbiin yii man nì u kansikin kaa ti mɔ̄ kii dooooyee. Ama m-baa Nimbɔtiu bí m-cee.

⁶Nimbi ni-ba nyí m nín dū m-pɔŋŋu kɔkɔ ki túń ditundi ki tīī ni-baa puee.

⁷Ní an yaa bàà sá ú pà-mi puee ní ú cúú kpántí. U kpántì-mi míǹ ní áli ŋfunyɔm saalaa pu, ama Unimbɔti kaa kíí ú ŋá-mi digaŋgam.

⁸U yaa lī yii: <Tiwaŋkuti tin kɔkɔ cáá atanee di sá a-paatee>, tiwaŋkuti kɔkɔ màal̀ tin cáá atanee ní. U yaa tí lī yii: <Tiwaŋkuti tin kɔkɔ cáá iluntoonee di sá a-paatee>, tiwaŋkuti kɔkɔ tí màal̀ tin cáá iluntoonee ní.

⁹Unimbɔti di fōō ni-baa waŋkuti ki tīī-mi.

¹⁰Ŋyunti ŋun tiwaŋkuti bíi jɔ́ḿ tɔbee ní m ká kudamintiiu poon yii ijaa in bíi jɔ́ḿ isalee sá atan atan nì iluntoon iluntoon nì ŋmàtì ŋmati.

¹¹Kudamintiiuee poon ní Unimbɔti tuuŋŋu yíiń-mi yii: <Jaakɔb!> Ní m kíí yii: <M sèé.>

¹²Ní ŋu bí-mi yii: <Yáatí kí kpèè, iŋɔjaa in bí ki jɔ́ḿ isalee kɔkɔ sá atan atan nì iluntoon iluntoon nì ŋmàtì ŋmati ní. M ŋá míǹ kun puee m ká Laaban nín ŋá-si puee.

¹³Man di sá Unimbɔti un nyántì u-ba ki dàkā-si Beeteel, laakin a nìn dū ditaŋkpal ki cóoǹ ki sītì di-pu ŋkpam ní ki pūtì ki pōoǹ-mee. Kɔŋkɔnnee yīkì kí nīn gítí a-tiŋkin, laakin bi màl̄-see.>»

¹⁴Ní Raseel nì Leeya kíí-u yii: «Timbi gíti cáá tigaajawan àá difakal diba ti-baa dicaŋkun kí fōōoo?

¹⁵U dū-ti ki gíiǹ binicambi ní, kun puee u nyáfì-ti ní ki fōō animbil ki jíń.

¹⁶An puee ti-baa gaajati tin Unimbɔti fōō u-ceeyee, timbi nì ti-biyaamu di yì. Min kɔkɔ Unimbɔti yaa bí yii á ŋée, ŋá míǹ.»

¹⁷Niinee ní Jaakɔb yōoǹ u-biyaamu nì u-nimpoobi ki kāaǹ igutaamu pu kí yīkì.

¹⁸U nìn yōoǹ ki kpáaǹ u-waŋkuti nì u-gaajati tin u nìn kāl̀ Padan-Aram ki kée kɔkɔ ki cáa nín gítí u-baa Isaaki cee Kanaan tiŋkin.

¹⁹Laaban nìn búntì kí cā u-piii kuti. Ŋyunti gbanti ní Raseel yùn̄ u-baa waaŋi.

²⁰Ní Jaakɔb bál̀ Laaban uaranja ki yíkì kaa kāaǹ-u.

²¹U nìn kpáaǹ u-wanti tin u cááyee kɔkɔ ki cūtìi dūtì Eefiraati mɔɔkpaandi ní ki dū u-ba ki túĺ Galaadi jool watil pú.

²²Jaakɔb yíkìi sáǹ iwiin ita boon ní bi dāa nín tùkū Laaban.

²³Niinee ní Laaban yōoǹ u-nabiyaamu ní bi nín jì Jaakɔb boon. Bi cōom̀ iwiin iluli ní ki tin nín cúú-u Galaadi jool pu.

²⁴Ama kunyeeuee ní Unimbɔti nyántì u-ba ki dàkā Laaban uaranja kudamintiiu poon ní ki bí-u yii: «Á cúú a-ba kí taa lì Jaakɔb tiba nì tiba, kí taa ŋá-u tikpitil báà tiba.»

²⁵Ŋyunti ŋun Laaban dūu bàn̄ Jaakɔb ceeyee, Jaakɔb gāā u-tantiu Galaadi jool pu, ní Laaban nì u-nabiyaamu mun gāā bi-tantib Galaadi jool gbanti pu.

²⁶Ní Laaban bālifì Jaakɔb yii: «Ba ŋá ní a ŋá mimmee? Ba pu ní a kíil̀-mi ki kpáaǹ m-bisalib ki búntì kii kujaau ní a cūtì ki jáń ki cúuń-bee?

²⁷Ba pu ní a kíil̀-mi ki sáǹ dibalin míǹ kaa kāaǹ-mi? M bàà kàantí-si nì ifaal ní kí yàntī bí gāā ilan kí bɔ̀ɔ̀ ŋgaŋgamu nì tibati.

²⁸Aa yāntì m kpàl̄ m-bisalib nì m-naantiibi ki kāaǹ-bi. Min a ŋá nee sá digbaandi ní.

²⁹M bàà cáá nsan kí ŋá-ni tin kaa ŋān̄ee, ama fool kunyeeu ní a-baa Nimbɔtiu fu sòon̄ nì mi ki bí-mi yii: <Á cúú a-ba kí taa lì Jaakɔb tiba nì tiba, kí taa ŋá-u tikpitil báà tiba.>

³⁰Kɔŋkɔnnee a-landɔkɔŋu gítì a-baa cindi pu ní a yíkì ki kùǹ, kin ba pu ní a gíti yù man waaŋi?»

³¹Ní Jaakɔb kíí Laaban yii: «M fāŋkì ní ki dākafì yii m yaa kāaǹ-si, an yaa yíì a làá fōō a-bisalib.

³²Ama un cee ní a yaa ká a-waaŋee, bí kpɔ̀-u. Ti-nabiyaamu kɔkɔ di bí nee. Dāan̄ m-cee kí kpèè a yaa ká a-wanti tiba á yòon̄.» Jaakɔb kaa nìn nyí yii Raseel di yùn̄ awaa.

³³Ní Laaban nín kóò Jaakɔb tantiun ki kpēē, ní ki kɔ́ Leeya yɔun ki kpēē, ní ki kɔ́ inimpuyumbu liitil cee ki kpēē kaa ká báà tiba. U nyáń Leeya ceeyee ní ki nín kóò Raseel tantiun.

³⁴Raseel nìn yōoǹ awaayee ki dūu bál̀ ugutaamu gakal taapu ní ki kāl̀ an pu, ní Laaban kɔ́ ki kpēē u-tantiu poon kɔkɔ ní kaa ká tiba.

³⁵Ní Raseel bí u-baa yii: «M nín ká-si kaa yíkèe, án taa wà-si, di sá yii m ká m-ba ní.» Ní Laaban kpēē kaa ká awaa.

³⁶Niinee Jaakɔb fōō Laaban pu diŋuul ní ki yíkìi nyáń u-pu, ní ki bí-u yii: «Tilati ní m yīntiǹ-si? Ikpiti ilai ní m ŋá-si ní a jìǹní m-boon nì dibaatandi míǹ?

³⁷A nín kpēē m-wanti kɔkɔee, a ká a-wanti tiba bí poonaaa? A yaa ká, á nyāntiń-tì man nib nì si mun nib nimbiin bí sòoǹ kí tīī-ti.

³⁸M kāl̀ a-cee abin mmuŋku ní. Dalba dalba a-piiu àá a-ŋoobuu ubɔ kaa lātì. Maa tí dáká a-piii poon upìja ubɔ nanti mun ki ká.

³⁹Tiba di yaa cúú a-waŋkuluuku kubɔee, maa cāabìń-si diwaŋkpil, see ḿ nyàab̀ kí téeǹ kun an cúúyee yil. A-waŋkuti tin bi yù ŋwiimpuee nì tin bi yù kunyeeuee[78], a bàlifī-mi ní ḿ téeǹ-si.

⁴⁰Ŋwiimpuee, ŋwìiń ŋmóò-mi ní kí kpɔ̀, ní kunyeeuee, tiwool ń kɔ́ kí dóó-mi ní ŋgeem ń wāŋkì m-nimbiliŋin.

⁴¹Abin ŋin m ŋá a-ceeyee kpáfì mmuŋku dee. M túń a-bisalib liitil pu ditundi dibindi diba kpá saalku ní ki tīī-si, ní ki dū abin aluu ki kpāā a-waŋkuti. Ŋfunyɔm saalaa pu ní a mūul̀-mi ki kpántì m-paati.

⁴²An yaa kaa sá m-baa Isaaki nì m-naanja Abraam Nimbɔtiu, Unimbɔti un m-baa Isaaki jáaḿ ki fàŋkée pu, a bàà làá yàntī ḿ nīn fàtīi gítí nì iŋaŋkulim ní. Ama Unimbɔti ká m-falaau nì m-tundi din m túńee. An pu ní fool nyeekuee, u fu sòon̄ ki kpáafì-si.»

⁴³Ní Laaban kíí Jaakɔb yii: «Binimpoobi nee sá man bisalib ní, ní bi-biyaamu sá man biyaamu. Ipii nee sá man piii ní, tin kɔkɔ a pée wāĺ nee sá man wanti ní. Díǹ pu nee, ba ní m làá ŋá kí tīī m-bisalib nì bi-biyaamu mun bi màl̄ee?

⁴⁴An ŋmāntì man nì si tí sòoǹ kí bóob́ kí pòon̄ tɔb, án nīn sá kudaaŋŋu man nì si kansikin.»

⁴⁵Niinee ní Jaakɔb píí ditaŋkpal ki cóoǹ án nīn sá-bi kudaaŋŋu.

⁴⁶Ní ki bí u-nabiyaamu yii bí tòò ataŋkpee kí bíĺ dikpúkul. Bi tōō ki bíl̀ee ní bi-kɔkɔ kāl̀ di-pu ki jíń tijin.

⁴⁷Ní Laaban pú ditaŋkpakpukulee diyindi u-sooŋyi poon yii Yeegar-Saaduta, ní Jaakɔb mun yíiń-dì u-sooŋyi poon yii Galeedi.

⁴⁸Ní Laaban bí yii: «Ditaŋkpakpukul nee di sá dipoondi din dōoǹ man nì si kansikinee daaŋku.» An pu ní bi pú mpaan gbanti diyindi yii Galeedi, taapu di sá yii: <Kudaaŋŋu taŋkpakpukul>.

⁴⁹Bi gíti pú niin diyindi yii Miisipa, taapu di sá yii: <Unimbɔti ń nīn bí ki wāĺ-ti.> Di sá Laaban nìn bí yii: «Unimbɔti ń nīn bí ki wāĺ man nì si kansikin ti yaa kaa dāa gíti bí ki wāĺ tɔbee.

⁵⁰A yaa láa cáá binimpoobi ki kútì ní ki ŋúb́ man bisalib ki sàantée, báà ubɔ yaa kaa dāa bí ki wāĺ tin a bí ki ŋáańeeyaaa, á nīn nyí yii Unimbɔti bí ki wāĺ tin bí ki jītí man nì sii kansikinee.»

⁵¹Ní Laaban gíti bí Jaakɔb yii: «Kpèè ditaŋkpakpukul nee, kí kpèè ditaŋkpal din m cóoǹ án nīn sá man nì si kansikin kudaaŋŋu nee.

⁵²Ditaŋkpakpukul nee nì ditaŋkpal din cɔ́ nee di sá-ti kudaaŋŋu yii man kaa làá lákatí ditaŋkpakpukul nee pu kí póotí a-pu, si mun ń taa lákatí ditaŋkpakpukul nee nì ditaŋkpacooŋkaal nee pu kí póotí man pu kí ŋá tikpitil.

⁵³Abraam nì Naakɔɔr Nimbɔtiu un sá bi-baa Nimbɔtiuee ń dāá sòoǹ man nì sii kansikin bɔti[79].» Ní Jaakɔb pūtì Unimbɔti un u-baa Isaaki nìn jáaḿ ki fàŋkée.

⁵⁴Boonee ní Jaakɔb ŋá saraa ubɔ dijool pu niin ní ki yíiń u-nabiyaamu bi kpáfìi jíń tijin ní ki gbíntì dijool pu niin ki dōoǹ.