Read Ntcham Genèse 32 Bible Online

Genèse 32 - Ntcham bible

Genèse 32

¹Kutaa wúntì an dáá bɔ̀ǹee ní Laaban yíkì ki kpàl̄ u-bisalib nì u-naantiibi ki kāaǹ-bi, ki mēē ki bīiǹ bi-pu ní ki fātìi nín kùǹ u-dumpu[80].

²Ní Jaakɔb mun nín nìkì u-saŋŋu. U cée ní Unimbɔti tuuŋyi cílìń u-pu nsanni.

³U ká-iee ní ki téeń yii: «Unimbɔti janjanaapaal sèé!» An pu ní u pú niin diyindi yii Maanayiim, taapu di sá yii: <Ajanjanaapaa ali>.

⁴Niinee ní Jaakɔb lēē binib ki tú u-maan Eesayuu cee Eedoom satin, Seeyiir tiŋki poon.

⁵U nìn kpáafì-bi ki bí yii: «Ni yaa bàn̄ee ní tùkù m-kpiliu Eesayuu yii: <Mama a-tɔntɔnliu Jaakɔb di túnní bí tùkù-si yii, doooo m nín búntì Laaban ceeyee, niin ní m kāl̀ ki dāa sāā díǹ.

⁶M cáá inaa nì mmamu nì ipii nì iŋoobu nì bitɔntɔnliibi bininjab nì binimpoobi. An pu ní m túnní bí dāá tùkù sii m-kpiliu yii á dàkà-mi a-ŋanti kí fōō-mi.>»

⁷Ní binib bin u túee fātìi gítìń u-cee ní ki tùkū-u yii: «Ti bàn̄ ki ká a-maan Eesayuu. U mun bí nsanni ki túŋkiń-si u nì binib alaataa anaa.»

⁸Niinee ní tifaandi kɔ́ Jaakɔb ní u-pɔbil bíil̀. Ní u cúú u-nib nì u-piii nì u-ŋoobui nì u-naai nì u-gutaamui ki yākatì akiti ali.

⁹Di sá u dākafì yii: «Eesayuu yaa bāań ki kūū dikitil dibee, dikitil din kíǹee ń sāǹ kí ŋmátí.»

¹⁰Míǹ boonee ní Jaakɔb mēē Unimbɔti yii: «M-naanja Abraam Nimbɔtiu, m-baa Isaaki Nimbɔtiu, m-Dindaan, sii di bí-mi yii: <Yīkì kí nīn gítí a-tiŋkin laakin bi màl̄-see, m làá ŋá-si tiŋan.>

¹¹M pátì kí fōō tiŋan tin a ŋá-mi nee nì tibulcin tin a dàkā man a-tɔntɔnliu nee, kun puee ŋkpandɔ baba ní m nìn ŋúb́ ki dūtì Jɔɔdan buŋŋu nee. Ama díǹ pu nee, m yākatì m-nib nì m-waŋkuti akiti ali ní nee.

¹²Míǹ puee m gbāam̀-si, á fīī-mi m-maan Eesayuu ŋaan. M fàŋkí ú taa láa kpɔ̀ man nì m-nimpoobi nì m-biyaamu.

¹³Di sá yii sii di líì-mi dimákal yii: <M làá bìin̄ a-boon kí yàntī a-naantiibi ń bùtī kii tiŋku gbandi bulee, bí taa ŋmā kí kàaǹ-bi.>»

¹⁴Niin ní Jaakɔb gbíntì ki dōoǹ kunyeeu gbanti. Kutaa wúntèe ní u lēē u-waŋkuti tin u cááyee poon tiba kí pɔ̄ u-maan Eesayuu.

¹⁵U nìn lēē iŋɔsal alaataa ali nì iŋɔjaa mmuŋku, ki lēē ipisal alaataa ali nì ipijaa mmuŋku,

¹⁶ki lēē igutaamu in cáá mbiyaamu ŋáaḿee nì i-biyaamu mmuŋku nì saalaa, ki lēē inasal imuŋku ili nì inajaa saalaa, ki lēē mmansalimu mmuŋku nì mmanjamu saalaa.

¹⁷U nìn yākatì tiwaŋkutee akiti akiti ki dūu tīī u-tɔntɔnliibi ní ki bí-bi yii: «Lìntīmaan kí nīn cá kí nīn pá tɔb boon ki dátiǹ tɔb.»

¹⁸Ní u kpáafì un līīyee yii: «M-maan Eesayuu yaa tú-si nsanni ní ki yaa bālifì-si yii: <A-kpiliu sá ŋma ní a cá la? Ŋma di yì tiwaŋkuti tin līī a-nyɔkɔpu nee?>,

¹⁹á kíí-u yii: <An sá a-tɔntɔnliu Jaakɔb di yì. U túnní-mi ḿ cáań kí tīī u-kpiliu Eesayuu ní. Úǹ u-ba páń boon ki dòoń.>»

²⁰Míǹ mbaantiim ní u tùkū u-tɔntɔnliu uliliiti nì utataati nì u-tɔntɔnliibi bin kɔkɔ u lēē tiwaŋkuti ki tīī bí lìntī u-nyɔkɔpuee, ní ki bí-bi yii: «Ni yaa tú Eesayuu nsannee, min ní ni làá lèe dee.

²¹Ní ní kūtì kí lì yii: <A-tɔntɔnliu Jaakɔb u-ba páń boon ki dòoń.>» Di sá u lī u-neen yii: «M làá dū tiwaŋkuti nee kí pɔ̄-u kí sɔ̀ŋkì u-pɔbil, boonee ní kí dāá nín ká-u. An yaa yíì u táá sɔ̄ m-saai kí fōō-mi.»

²²Ní bitɔntɔnliibi kpáaǹ tiwan tin u lēē kí pɔ̄ Eesayuuyee ki búntì ní úǹ u-ba gbíntì dinaapaal pu niin ki dōoǹ.

²³Kunyeeu gbanti ní Jaakɔb yōoǹ u-nimpoobi liitil nì inimpuyumbu liitil ki kpáaǹ u-biyaamu saalaa nì kibee ki dūtì Yaabɔki buŋŋu laakin pú kaa nyóòyee.

²⁴U cáá u-yab kɔkɔ ki dūtì mbun ki kpáaǹ tin kɔkɔ u cááyee.

²⁵Jaakɔb cáá-bi ki dūtì míǹ ki dóò, ki kíǹ u-babee ní unaaciin ubɔ dɔ́miń kunyeeu ki cìb̄-u dimool ní bi mɔ̀n̄ áli ntaafaabɔmbɔm.

²⁶Unaaciinee[81] kpēē yii waa làá ŋmā kí líí Jaakɔbee ní u fáá u-nantaŋkpal ní u-kpìiŋŋu yɔ̄tì, ama ní u nì Jaakɔb gbíntìi bíi mɔ̀.

²⁷Boonee ní unaaciinee bí Jaakɔb yii: «Kutaa bíi wúntí, gíiǹ-mi kí líí.» Ní Jaakɔb bí-u yii: «A yaa kaa bīiǹ m-boon, m kpá kí gíiǹ-si kí líí.»

²⁸Ní unaaciinee bālifì-u yii: «Bi yíì-si yii ba ní?» Ní u kíí-u yii: «Bi yíì-mi yii Jaakɔb ní.»

²⁹Ní unaaciinee bí-u yii: «Baa làá ti yíiń-si Jaakɔb, bi làá nīn kíǹ ki yíì-si yii Isirayeel[82] ní. Di sá yii si nì Unimbɔti mɔ̀n̄ ní si nì binib mun mɔ̀n̄, ní a pɔ́ɔkiǹ bi-kɔkɔ.»

³⁰Ní Jaakɔb bí-u yii: «M gbāam̀-si, tùkù-mi a-yindi.» Ní u bí-u yii: «Ba pu ní a là kí béé m-yindi[83]?» Niin niin ní u bīiǹ Jaakɔb boon.

³¹Ní Jaakɔb pú niin diyindi yii Peeniyeel, taapu di sá yii: <Unimbɔti nimbiin>, di sá u lī yii: «M ká Unimbɔti yéè kpìrrr ama ní kaa kpíì.»

³²Kutaa wúntì ŋwìiń nyáń ní Jaakɔb yíkì Peeniyeel. U-kpìiŋŋu puee, u nìn dúlifí ní.

³³An pu ní áli nì díǹ, Isirayeel yab kaa ŋmóò dinantaŋkpal nanti. Di sá bi nìn fáá Jaakɔb nantaŋkpal ní u-kpìiŋŋu yɔ̄tì.