Read Ntcham Genèse 35 Bible Online

Genèse 35 - Ntcham bible

Genèse 35

¹Dalbee ní Unimbɔti bí Jaakɔb yii: «Yīkì doo kí nīn jɔ́ḿ Beeteel kí cùú nīn kóò niin. Á mā nsaraafan laakin m nìn nyántì m-ba ki dàkā-si ŋyunti ŋun a nìn sáń a-maan Eesayuuyee.»

²Ní Jaakɔb bí u-dicaŋku yab nì bin kɔkɔ bí u-ceeyee yii: «Nyāntímaan awaa ŋin bí ni-ceeyee, kí ŋá ni-ba circir kí kpántí ni-wampeeŋkaati.

³Tí yīkìmaan kí cù Beeteel. Ti yaa bàn̄ niinee, m làá mā nsaraafan kí tīī Unimbɔti un un fōō m-wimmeem ŋyunti ŋun m nìn bí dinimbinaamandi poon ní ki céeǹ-mi m-saŋkiŋŋi kɔkɔ poonee.»

⁴Niinee ní bi nyántì awaa ŋin bí bi-ceeyee, ki túutì bi-falfatib ki tīī Jaakɔb ní u cáa gbìn̄ ki síb́ teereebinti[86] subu bun yú ki pìlīǹ Siikeem tiŋkee taapu.

⁵Bi yíkèe ní Unimbɔti yāntì dinyoondi kɔ́ ntimu mun kɔkɔ māntì ki tú-bee, ní báà ubɔ kaa mākaǹ kí jà bi-boon.

⁶Ní Jaakɔb nì u-nipaaku dūu bàn̄ Luusi, an dàkà yii Beeteel, Kanaan tiŋkin.

⁷Ní u máń nsaraafan ní ki pú niin diyindi yii Eel-Beeteel, taapu di sá yii: <Beeteel Nimbɔtiu>, kun puee niin ní Unimbɔti nìn nyántì u-ba ki dàkā-u ŋyunti ŋun u nìn sáń u-maan Eesayuuyee.

⁸Niin ní Deeboora un nìn lōō Reebeekee kpíì ní bi síb́-u seeni[87] subu bun yú ki pìlīǹ Beeteelee taapu. Ní Jaakɔb pú busubu gbanti diyindi yii <Nsiim subu.>

⁹Jaakɔb nín nyáń Padan-Aram ki bàn̄ Beeteelee, Unimbɔti nìn gíti nyántì u-ba ki dàkā-u ní ki bīiǹ u-boon.

¹⁰Ní Unimbɔti bí-u yii: «Bi yíì-si Jaakɔb ní, ama baa làá nīn gíti yíì-si míǹ. Bi làá nīn kíǹ ki yíì-si yii Isirayeel ní.» Di sá Unimbɔti pú-u diyindi yii Isirayeel.

¹¹Ní Unimbɔti gíti bí-u yii: «Man di sá Unimbɔti Mpɔŋkɔdaan. M làá bùtī a-maaliŋu tikpil tikpil. Sii maaliŋu poon ní atimbun làá nyā. A-maaliŋu poon ní bibɔtiibi làá nyā.

¹²Kitiŋ kin m nìn tīī Abraam nì Isaakee, m làá dū-kì kí tīī sii nì a-naantiibi bin làá páanní boonee.»

¹³Unimbɔti sòon̄ nì u míǹ ki dóòyee ní ki yíkì niin ki nín jɔ́ḿ.

¹⁴Ní Jaakɔb dū ditaŋkpal ki cóoǹ laakin Unimbɔti sòon̄ nì uee, ní ki dū ndamam nì ŋkpam ki fá di-pu án nīn sá kudaaŋŋu.

¹⁵Ní Jaakɔb pú mpaan ŋun pu Unimbɔti nìn sòon̄ nì uee yii Beeteel.

¹⁶Jaakɔb nì u-dicaŋku yíkì Beeteel. Bi cá ki tóob́ Eefiraata tiŋkee ní Raseel màl̄. U-maaliŋu gbanti nìn pɔ́ɔkì tikpil.

¹⁷Ŋyunti ŋun u bíi yáliŋkí imatiŋween ki làá màal̀ee ní umatimmaanli bí-u yii: «Pɔ́ɔǹ a-ba, kibininjabiki ní a làá gíti màal̀.»

¹⁸Ŋyunti ŋun u bíi dátí u-ba kí sìntēe ní u pú kibiki kin u màl̄ee diyindi yii Been-Oonii, taapu di sá yii: <M-falaau biki.> Ama ní ki-baa yíiń-kì yii Beenjameen, taapu di sá yii: <M-ŋaŋgiil pu biki[88].>

¹⁹Raseel kpíìyee ní bi síb́-u Eefiraata dandi kpaanceetiŋu. Kitiŋ gbanti ní bi gíti yíì yii Beetileem.

²⁰Ní Jaakɔb dū ditaŋkpal ki cóoǹ dikaakul pu án nīn sá Raseel kaakul daaŋku. Di bí ki dāa sāā díǹ.

²¹Isirayeel yíkì niinee ní ki cūtìi gāā u-tantib Miigidaal-Eedeer tiŋki nyɔkɔpu.

²²Ŋyunti ŋun Isirayeel nìn kóò kitiŋ gbantinee ní u-jipɔɔn Rubeen dōoǹ nì u-nimpuwaaki Biila, ní u-baa gbìl̄. Jaakɔb jipɔmbi nìn sá saalaa nì bili ní.

²³Leeya jipɔmbi di sá Rubeen un sá Jaakɔb jipɔŋkpiliuee, nì Simeeyɔn nì Leefii nì Juuda nì Isakaar nì Sabulɔn.

²⁴Ní Raseel jipɔmbi sá Jooseefi nì Beenjameen.

²⁵Raseel yumbusapɔɔŋwu Biila jipɔmbi di sá Daani nì Neefitalii.

²⁶Ní Leeya yumbusapɔɔŋwu Siilpa jipɔmbi sá Gaadi nì Aseer. Jaakɔb jipɔmbi bin u nìn màl̄ Padan-Aram tiŋkinee dee.

²⁷Jaakɔb nìn bàn̄ u-baa Isaaki cee Mamiree, Kiiriyati-Ariba tiŋkin. Niin ní bi gíti yíì yii Eebrɔn. Abraam nì Isaaki nìn kāl̀ kitiŋ gbantin.

²⁸Isaaki biŋŋi ŋin u ŋá ki nín kpíìyee sá abin dilaataal nì imuŋku inaa.

²⁹U nìn púĺ ki kāl̀ ki bál̀ ní ki nín kpíì ki cūtìi ŋàl̄ u-naanjab. Ní u-jipɔmbi Eesayuu nì Jaakɔb síb́-u.