Read Ntcham Genèse 37 Bible Online

Genèse 37 - Ntcham bible

Genèse 37

¹Jaakɔb nìn kóò Kanaan tiŋkin laakin u-baa nìn kāl̀ee ní.

²Jaakɔb jipɔmbi bɔti sèé. Jooseefi nìn cáá abin saalku nì ali ní u nì u-mambi kpàá ipii. Jooseefi nìn tāatí u-baa nimpoobi Biila nì Siilpa jipɔmbi ki cá kupikpaau ní ki nìn cāabìń tin bi ŋáań an kaa ŋān̄ee ki tùkù bi-baa.

³Bi-baa Isirayeel nìn néeń Jooseefi ki jítiǹ u-jipɔmbi bin kíǹee kɔkɔ, kun puee u nìn màl̄-u u-tikpiti poon ní. U nìn ŋáĺ-u dibɔkutimɔntiil diba.

⁴U-mambi nín dáań ki ká yii bi-baa néeń-u ki jítiǹ bíǹ kɔkɔee ní bi kíǹ ki ná-u kaa ti sòoǹ nì u an mɔ̄.

⁵Dalbee Jooseefi dámintì kudamintiiu kubɔ ní ki dūu máafì u-mambi. Niin ní kináŋ mɔ̄tìi nín pɔ́ɔkì.

⁶U tùkū-bi yii: «Ní pīlifìmaan kudamintiiu kun m dámintèe!

⁷M dámintì yii ti bí kusaau ki bōob̀ amɔpin, ní man yal yáatìi yúl̀, ní nimbi mɔpiŋŋi māntìi tú man mɔpindi ní ki lítì di-taapu.»

⁸Niinee ní u-mambi kíí-u yii: «Mimmee a dàkafī yii sii di làá nīn sá ti-bɔtiu deeyaaa, àá sii di làá nīn sá ti-kpiliu ní timbi ń nīn bí sii taapu ní?» U-damintiiku gbanti nì u nín sòon̄ puee yāntì bi-náŋki mɔ̄tìi wíiǹ u-pu.

⁹Boonee ní u gíti dámintì ní ki tí dūu máafì u-mambi yii: «M tí dámintì kudamintiiu kubɔ. M dámintì yii ŋwìiń nì uŋmal nì iŋmalbijaa saalaa nì ubɔ dòoń ki gbàantí m-nimbiin.»

¹⁰Ní u dūu lī u-baa nì u-mambi cee, ní u-baa bíi wòoǹ-u yii: «Ba damintiiku kúǹ dee! Mimmee man nì a-na nì a-mambi làá dāá gbàan̄ sii nimbiinaaa?»

¹¹Ní u-mambi mɔ̄tìi díkí u-pu[89], ama u-baa úǹ dū an bɔtee ki ŋá u-taalin.

¹²Dalbee ní Jooseefi mambi búntì Siikeem tiŋkin kí kpàà bi-baa piii.

¹³Ní Isirayeel bí Jooseefi yii: «Kéè a-mambi bíń Siikeem ki kpàá ipiiyaa! Dāan̄ ḿ tɔ̄-si bi-cee.» Ní u kíí u-baa yii: «Too, m sɔ̀.»

¹⁴Ní u-baa bí-u yii: «Á cù kí kpèè yii a-mambi pɔ̄ɔ̄ɔɔ, bi-waŋkuti mun bí mana, kí gítiń kí tùkù-mi.» Eebrɔn tantakalin ní bi nìn bí ní Jooseefi baa tú-u ní u yíkìi búntì Siikeem tiŋkin u-mambi cee.

¹⁵U búntèe ní ki bàn̄ ki tú ki yìiǹ tisatin ní uninja ubɔ dāa ká-u ní ki bālifì-u yii: «A nyàab̀ ba?»

¹⁶Ní u kíí-u yii: «M nyàab̀ m-mambi ní. M gbāam̀-si, a yaa nyí laakin bi bí ki kpàá bi-waŋkutee, á dàkà-mi.»

¹⁷Ní uninjee bí-u yii: «Bi yíkì doo, di sá yaadalee m nìn gbìl̄ bi bíi lì yii: <Tí yīkìmaan doo kí nīn cá Dootan.>» Ní Jooseefi nín jì bi-boon Dootan ní ki tin ká-bi niin.

¹⁸Bi nín ká-u u páaǹní ndan kaa láá bāań-bee, ní bi sòon̄ ki bɔ́ntì yii bí kpɔ̀-u.

¹⁹Bi nìn tùkù ki nàatī tɔb yii: «Kpèè tidamintiil daanee di dòońee.

²⁰Tí cúúmaan-u kí kpɔ̀ kí dūú tɔ̄ dilɔkɔgindi diba poon ní kí lì yii upeecuncuti ubɔ di cúú-u ki ŋmɔ́. Ti yaa ŋá mimmee, tí kpèè u-damintiitee nín làá kúntí nì miŋyee.»

²¹Rubeen gbìl̄ míǹ ki là kí fīī-u bi-ŋaanee ní ki lī yii: «Tí taa lēē u-maŋfal.»

²²U nìn bí-bi yii: «Ní taa kpɔ̀maan-u, ní dū-u kí tɔ̄ dilɔkɔgindi din bí kuteeun nee poon kí taa ŋá-u tiba.» U lī míǹ ki là yii bi yaa dū-u ki tɔ́ dilɔkɔgindinee, boonee úǹ ń dāá ŋá soooo kí nyāntí-u kí cáá-u kí kpìnnì kí tin tīī u-baa.

²³Ŋyunti ŋun Jooseefi bāań bi-ceeyee ní bi pēetì-u u-bɔkutimɔntiil din u pēēyee.

²⁴Bi nìn cúú-u ki dūu tɔ́ dilɔkɔgindin. Dilɔkɔgindi gbanti nìn kūń ní, nnyim nìn kpá di-poon.

²⁵Bi ŋá mimmee ní ki cūtìi kāl̀ ki bíi jīǹ tijin. Bi dāa kpēēyee, Isimaayeel naakookun yab di páń tɔb pu ki nyánní Galaadi tiŋkinee. Bi-gutaamui nìn tú ikpafi nì talaalub ní bi nìn cáa cáǹ Eejipiti kí nyāfì.

²⁶Ní Juuda bí u-nabiyaamu yii: «Ti yaa bál̀ ki kūū ti-naalee, ba ní ti páatì poon?

²⁷Tí dū-u kí nyāfiǹ Isimaayeel yab kí taa kpɔ̀-u, kun puee u sá ti-nabiki, ní ti sá fatikubaanti.» Ní u-nabiyaamu gbìl̄ ki tīī nì u.

²⁸Madiyan nyampoobi jītée ní bi nyántìń Jooseefi dilɔkɔgindi poon ní ki dū-u ki nyáfiǹ Isimaayeel yab[90]. Bi nìn nyáfì-u animbil jitɔmbi mmuŋku ní, ní bíǹ cáá-u ki búntì Eejipiti.

²⁹Ŋyunti ŋun Rubeen dāa cūtì kí nyāntí Jooseefi dilɔkɔgindinee, u bàn̄ee u kpá, ní an wùn̄-u tikpil ní u dáaĺ tiwan tin u pēēyee ki cátì.

³⁰Ní u nín fàtī u-naalib cee ní ki bí-bi yii: «Jooseefi gíti kpá dilɔkɔgindin! Kin man làá ŋá m-ba la?»

³¹Niinee ní bi kūū uŋɔja ní ki dū Jooseefi bɔkutil ki tɔ́ fatikun.

³²Bi nìn dū dibɔkutimɔntiilee ki nākaǹ bí cáá tīī bi-baa kí lì yii: «Kpèè kun ti píińee, kpèè tiŋan yii an sá a-jipɔɔn bɔkutilaaa, an kaa sá?»

³³Bi-baa fōō ki kpēē ki béè dibɔkutilee ní ki fáá mbiil yii: «M-biki Jooseefi bɔkutil dee! Upeecuncuti ubɔ cúú m-biki ki ŋmɔ́, Jooseefi ní an lafun cúú ki tɔ̄ntì!»

³⁴Niinee ní Jaakɔb dáaĺ tiwan tin u pēēyee ki cátì ki dū kutuku ki gbìn̄ u-caŋ[91], ní ki dū iwiin kupaau ki súń u-biki kpool.

³⁵U-jipɔmbi nì u-bisalib kɔkɔ nìn pɔ́ɔǹ kí ŋméeǹ-u, ama ní waa kíí bí ŋméeǹ-u, ní ki lì yii: «M làá nīn pée sūǹ m-jipɔɔn kpool míǹ ní kí dāá kpú kí bà-u ditaŋkpiilin.» Míǹ ní Jooseefi baa lafun súń u-pu.

³⁶Ŋyunti gbantee Madiyan yab bíǹ dūu bàn̄ Eejipiti ní ki mun nìkī Jooseefi ki nyáfiǹ Pootifaar, ujanjakpil un cí Faaroo[92] cindee.