Read Ntcham Genèse 38 Bible Online

Genèse 38 - Ntcham bible

Genèse 38

¹Ŋyunti gbantee, Juuda yíkì u-nabiyaamu cee ki búntì Adulaam tiŋkin kijapaai kiba cee, bi yíì-u yii Yiira.

²Niin ní Juuda ká ukanaanja Suuwa bisal ki cáá ní u nì u kpáfì.

³Unimpuee cáá dipool ki màl̄ kibininjabiki, ní Juuda pú-kì diyindi yii Eer.

⁴Ní u gíti cáá dipool ki màl̄ kibininjabiki ní ki pú-kì diyindi yii Oonan.

⁵Ní u fātìi tí cáá dipool ki màl̄ kibininjabiki ní ki pú-kì diyindi yii Seera. Juuda nìn bí Keesiib tiŋkin ní u-nimpuu màl̄ kibiki gbanti.

⁶Juuda jipɔŋkpiliu Eer wíiǹee ní u cáá unimpu ki tīī-u. Bi yíì unimpuee yii Taamaar[93].

⁷Juuda jipɔŋkpiliu Eer nìn sá unikpiti ti-Dindaan nimbiin, an puee ní ti-Dindaan yāntì u kpíì.

⁸Ní Juuda bí Oonan yii: «Fōō a-maan nimpuu ukpiipu kii mara nín pée sá puee, kí màal̀ kí téeǹ u-yil u-dicaŋku ń taa kúntí[94].»

⁹Ama Oonan nín nyí yii u-maan nimpuu biyaamu mun u làá màal̀ee kaa dāa sá u-biyaamuee, ní ŋyunti ŋun u yaa bíi dɔ̀ nì unimpuee ní u nyāntí ki féeń kitiŋ kaa là kí màal̀ kí téeǹ u-maan yil.

¹⁰An bɔtee kaa nìn mɔ́ɔkiǹ ti-Dindaan, ní u yāntì u mun kpíì.

¹¹Ní Juuda bí u-coopu Taamaar yii: «Cù a-baabi cee kí nīn kā dikpiipool ki cí ŋyunti ŋun m-jipɔɔn Seera mun làá dāá wíiǹee.» Di sá u nìn lī u-neen yii: «Seera mun ń taa kpú kii u-mambee.» Ní Taamaar nín kùǹ u-baabi.

¹²An dāa bàn̄ ŋyunti ŋubɔee ní Juuda nimpuu Suuwa bisal kpíì. Juuda kāl̀ dikpool jítèe ní u nì u-bɔɔ Yiira uadulaanja búntì Tiimina tiŋkin, bin bíi cēē u-piii kutee cee.

¹³Ní bi tùkū Taamaar yii: «A-cooja cá Tiimina kí cā u-piii kuti.»

¹⁴Niinee ní u pēetì dikpiipool wanti tin u pēēyee ní ki dū ŋŋaabu ki bīiǹ u-nimbiin ki kpáaǹ u-wunti, ní ki cūtìi kāl̀ Eeniyayiim tiŋki sampuyakatii, laakin bi dì ki cá Tiimina tiŋkinee. Di sá u dáań ki ká yii Seera wíiǹ ní baa dɔ́miń ki yōoǹ-u ki tīī-u.

¹⁵Juuda ká Taamaar kā nsampuyakatee ní u dākafì yii an sá kinimpulaakpaai, kun puee u nìn bīī tiwan u-nimbiin.

¹⁶U ká-u nsanni niinee ní ki sútì ki pìl̄-u ní ki bí-u yii: «M làá dòon̄ nì si!» Waa nìn béè yii an sá u-coopu. Ní unimpuee bālifì-u yii: «Ba ní a làá tīī-mi ní kí nín dòon̄ nì mi?»

¹⁷Ní Juuda kíí-u yii: «M làá lēeń m-ŋɔcaŋkpuŋku poon diŋɔbil diba kí tīiń-si.» Ní unimpuee bí-u yii: «See á tīī-mi tiba ḿ yóoń m-cee toolima. A yaa láa tīiń-mi diŋɔbilee, á fōō a-wanti.»

¹⁸Ní Juuda bālifì-u yii: «Ba ní a là ḿ tīī-si á yóoń a-cee toolima?» Ní unimpuee bí-u yii: «Tīī-mi a-jaliiki kin a cáa nyìitēe nì ki-ŋmiiŋu nì ŋkpandɔ ŋun a ŋúb́ee». Ní Juuda tīī-u an wanti gbanti kɔkɔ ní ki dōoǹ nì u ní dipool kɔ́.

¹⁹Ní unimpuee fātìi nín kùǹ u-dumpu ní ki lēē ŋŋaabu ŋun u nìn dūu bīiǹee ní ki gíiǹ dikpiipool wanti ki pēeǹ.

²⁰Ní Juuda dū diŋɔbil ki tú u-bɔɔ uadulaanja ú cáá tīī unimpuee kí fōoń u-wanti tin u dūu yóoǹ u-cee toolimee. U-bɔɔ bàn̄ee ní kaa ká unimpuee.

²¹Ní u bālifì binib bin bí niinee yii: «Kinimpulaakpaai kin kàal̀ Eeniyayiim tiŋkin doo, nsan caŋinee bí la?» Ní bi kíí-u yii: «Kinimpulaakpaai kiba pée kpá doo.»

²²Ní Juuda bɔɔ gítì ki tùkū-u yii: «Maa ká-u, ní niin yab mun bí-mi yii: <Kinimpulaakpaai kiba pée kpá doo.>»

²³Ní Juuda bí u-bɔɔ yii: «Yàntī ú nīn cáa cá. Tí taa dī tiwan gbanti boon icoo ń dāá cúú-ti. Kéè man tīī-si diŋɔbil á cáá tīī-u ní a cūnnì kaa ká-ueeee!»

²⁴Iŋmal ita boonee ní bi dɔ́miń ki tùkū Juuda yii: «A-coopu Taamaar ŋá tilaakpaal ki cáá dipool.» Ní Juuda bí yii: «Bí nyāntí-u kí cáá-u kí wà ŋŋmi.»

²⁵Ŋyunti ŋun bi nyántì-u ki cáǹ kí wà ŋŋmee ní u tú bí tùkù u-cooja yii: «Tiwan tin m ŋúb́ nee, uninja un tīī-mi dipoolee di yì tiwan gbanti. M gbāam̀-si, kpèè kijalii kin bi cáa nyìitī tiwanee nì ki-ŋmiiŋu nì ŋkpandɔ nee, a nyí un yì tiwan gbanteeee?»

²⁶Juuda béè tiwanee ní ki bí yii: «U cáá ibaamɔn ki jítiǹ man. An bàà sá ḿ dū-u kí tīī m-jipɔɔn Seera, ní maa ŋá míǹ». Ní Juuda kaa ti pée gbēē-u.

²⁷Daliŋkin u làá màal̀ee ní bi béè yii jaasib pool ní u cáá.

²⁸Ŋyunti ŋun u bíi màal̀ee ní jaasibee kansikin ubɔ nyántìń u-ŋal, ní umatimmaanli dū gulfaman ki kúĺ, ní ki bí yii: «Un bí nee di péé ki nyáń.»

²⁹Ní kibikee fātìi gíiǹ ki-ŋal ki kɔ́ǹ, ní ki-nabiki nyánní, ní umatimmaanli bí yii: «A ŋá mpɔn ki tùl̄ ki nyánnáa!» Ní bi pú-kì diyindi yii Peereesi, taapu di sá yii: <U tùl̄ ki nyáń.>

³⁰Boonee ní u-nabiki kin ŋal bi bàà dū gulfaman ki kúĺee mun nyánní. Ní bi pú-kì diyindi yii Seera, taapu di sá yii: <Un jìl̀ee.>