Read Ntcham Genèse 39 Bible Online

Genèse 39 - Ntcham bible

Genèse 39

¹Isimaayeel yab cáá Jooseefi ki cūnnì Eejipitee ní Faaroo janjakpiliu Pootifaar, ueejipitija dá-u bi-cee. Pootifaar gbanti di nìn sá bin cí Faaroo cindee kpiliu.

²Ti-Dindaan nìn yú Jooseefi boon[95] ní tin kɔkɔ u ŋáańee nìn còom̄-u tiŋan. U nìn kóò u-kpiliu ueejipitijee dumpu ní.

³Jooseefi kpiliu nìn dáań ki ká yii ti-Dindaan yú u-boon, ki yàntī tin kɔkɔ u ŋáańee cá nyɔkɔpu.

⁴An puee Jooseefi nìn ká diyimɔɔl u-kpiliu cee u dū-u ki kpántì úǹ u-ba tɔntɔnliu, ní ki dū-u ki ŋá ukpil ú nīn kpèé u-cindi poon tuuŋŋi nì tin kɔkɔ u cááyee.

⁵Kí yòon̄ ŋyunti ŋun Pootifaar dū Jooseefi ki kāaǹ tikpiti ú nīn kpèé u-cindi nì u-wanti kɔkɔee, ní Jooseefi puee, ti-Dindaan bīiǹ ueejipitijee dicaŋku pu, ní ki bīiǹ ki kpáaǹ tin kɔkɔ u nìn cáá u-cindi nì u-satinee pu.

⁶U ká mimmee ní ki dū tikɔkɔ nì tikɔkɔ ki ŋá Jooseefi ŋaan kaa ti pée kpèé báà tiba, asee tijin tin u làá jēe baba pu ní u dàkafī. Jooseefi nìn yáà unil ní ki nìn ŋān̄ unaacimpɔɔn an kaa cáá bí lì.

⁷An dāa bāań ŋyunti ŋubɔee ní u-kpiliu nimpuu dū u-nimbiliŋ ki mántì u-pu ní ki bí-u yii: «Dāan̄ kí dòon̄ nì mi.»

⁸Ní u yíì, ní ki bí u-kpiliu nimpuu yii: «Kpèè, man ní m-kpiliu dū dicindi tundi kɔkɔ ki ŋúbiǹ. U cáá m-pu dimákal, an puee waa ti kpèé tiba dicindi poon.

⁹Ubɔ kaa jítiǹ-mi dicindi nee poon. U pú-mi nsan ḿ ŋá tikɔkɔ, asee sii baba ní maa máaǹ kí gbēē, kun puee a sá u-nimpuu. An puee maa ŋūǹ kí ŋá ikpitikpaan gbanti kí yìntīǹ Unimbɔti.»

¹⁰Baabadal unimpuee pée páb̀ Jooseefi ní yii ú dòon̄ nì u, ama ní úǹ kaa pílifíǹ-u.

¹¹Dalbee Jooseefi kɔ́ kudii poon ki bíi tūǹ ditundi báà ubɔ nì ubɔ kpá.

¹²Niinee ní unimpuee cúú Jooseefi bɔkutil ní ki bí-u yii: «Dòon̄ nì mi!» Ní Jooseefi sáǹ ki nyáń mmɔŋki ki yāntì u-bɔkutil unimpuee ŋaan.

¹³Unimpuee nín ká yii dibɔkutil gbíntì u-ŋaan Jooseefi sáǹ ki nyáńee,

¹⁴ní u yíiń dicindin nib, ní ki bí-bi yii: «Dāá kpèèmaan! Bi cáań-ti ueebruja ú nīn cáá-ti ki gbíilíǹ ní! U dɔ́miń kí bàà dòon̄ nì man dee ní m fáá mbiil.

¹⁵U nín gbìl̄ m fáá mbiilee ní u sáǹ ki nín nyēē ki fá u-bɔkutil.»

¹⁶Ní u dū Jooseefi bɔkutilee ki bíl̀ ki kɔ́ĺ u-ba u-cal ń bàń.

¹⁷U-cal Pootifaar dāa bāańee ní u gíiǹ ki téeǹ míǹ mbaantiim yii: «Ueebruja uyumbu un a cáań-tee dɔ́miń kí dòon̄ nì mi.

¹⁸Ŋyunti ŋun m fáá mbiilee ní u sáǹ ki fá u-bɔkutil m-cee.»

¹⁹Jooseefi kpiliu nín gbìl̄ u-nimpuu sòon̄ ki lī yii: «Kpèè a-yumbuuee nín ŋá-mi puee!» ní u fōō diŋuul tikpil.

²⁰Ní u yāntì bi cúú Jooseefi ki cáa tɔ́ sarka laakin ubɔti nìn pìintí bin yīntiǹ-uee. Jooseefi kpántì usarkadaan.

²¹Ama ti-Dindaan nìn yú Jooseefi boon sarkan, ki dàkā-u u-ŋanti ní ki yāntì u ká diyimɔɔl ujanjakpil un kpèé bisarkadambee cee.

²²Ujanjakpilee nìn dū bisarkadambi kɔkɔ ní ki ŋúbiǹ Jooseefi. Úǹ di nìn kpèé atuun ŋin kɔkɔ bi nìn tūǹee.

²³Ujanjakpilee kaa nìn gíti kpèé atuun ŋin u nìn dūu ŋúbiǹ Jooseefee, kun puee ti-Dindaan nìn yú Jooseefi boon ní ki yàntī u-tuuŋŋi kɔkɔ còom̄-u tiŋan.