Read Ntcham Genèse 4 Bible Online

Genèse 4 - Ntcham bible

Genèse 4

¹Adam béè u-nimpuu Awa ní u cáá dipool ki màl̄ Kaayeen, ní ki bí yii: «Ti-Dindaan tútúǹ-mi m màl̄ kibininjabiki.»

²Míǹ boonee ní u gíti cáá dipool ki màl̄ Kaayeen naal Abeel. Abeel wíiǹee ní ki bíi kpàá tiwaŋkuti, ní u-maan Kaayeen úǹ kù tikpaal.

³An dāa bāań ŋyunti ŋubɔee ní Kaayeen lēeń u-kpaajinti ki cáań ki ŋá ti-Dindaan saraa.

⁴Ní Abeel mun lēeń apibil ŋin u-piii iba péé ki màl̄ee ní ki dū ŋi-nanti tin cáá ŋkpamee ki ŋá ti-Dindaan saraa. Ní ti-Dindaan fōō Abeel nì u-saraau[13],

⁵ama ní ki fātì u-boon ki tīī Kaayeen nì u-saraau. An puee ní Kaayeen fōō diŋuul tikpil, u-nimbiin cúu bíil̀.

⁶Ní ti-Dindaan bí Kaayeen yii: «Ba ŋá ní a fōō diŋuul, a-nimbiin cúu bíil̀ mimmee?

⁷A yaa bàà ŋá tin ŋān̄ee, a-yil bàà gáań ní. A yaa kaa ŋá tin ŋān̄ee, ikpiti kpátì ki dɔ̄ a-punyɔkɔpu ki nyàab̀-si, ama sii pɔ̄ɔkiǹ-i.»

⁸Niinee ní Kaayeen sòon̄ nì u-naal Abeel[14]. Ŋyunti ŋun bi bí kusaaunee ní Kaayeen cúú u-naal Abeel ki kūū.

⁹Ní ti-Dindaan bālifì Kaayeen yii: «A-naal Abeel bí la?» Ní u kíí-u yii: «Maa nyí. Man di cí m-naalaaa?»

¹⁰Ní ti-Dindaan bí-u yii: «Ba ní a ŋée! A-naal fatikuu di gbáàń ibiil taapu ki dāa bāań man nee[15].

¹¹Kɔŋkɔnnee a nín kūū a-naal kitiŋ nyùn̄ u-fatikuuee, m tɔ́-si mbusu.

¹²A yaa ti kùn̄ee, kitiŋ kaa làá ti lòoǹ. A làá nīn kíǹ ki tú ki yìiǹ an kɔkɔ ní kitiŋ pu.»

¹³Ní Kaayeen bí ti-Dindaan yii: «Óo, m-yìntitam gìńdi nyìmiǹ-mi maa ŋūǹ kí túń.

¹⁴A yaa jìn̄-mi díǹ nee kitiŋ pu an sá yii ḿ nīn cá ndandati kí taa nín̄ pìlīǹ-si, kí nīn tú ki yìiǹee, ubɔ yaa ká-mee, see ú kpɔ̀-mi.»

¹⁵Ní ti-Dindaan bí-u yii: «Aayee! Un di yaa kūū Kaayeeŋyee, bi làá téeǹ udaan min min u ŋée miluli pu ní.» Ní ti-Dindaan ŋá u-pu kudaaŋŋu kubɔ yii ubɔ yaa ká-uee, ú taa kpɔ̀-u.

¹⁶Ní Kaayeen búntì ndandati kaa ti pìl̄ ti-Dindaan, ki tin kóòń kitiŋ kin bi yíì Noodee. A yaa bí Eedeenee, kì bí ŋwìiń nyalaŋki pú ní.

¹⁷Kaayeen cáá unimpu, ní u cáá dipool ki màl̄ Eenɔki. Boonee ní u máń adiin ní an dūu kpántì kitiŋ, ní u dū u-jipɔɔn yindi Eenɔki ki pú-kì.

¹⁸Ní Eenɔki màl̄ Yiraadi, ní Yiraadi màl̄ Meewujayeel, ní Meewujayeel màl̄ Meetukayeel, ní Meetukayeel màl̄ Leemeeki.

¹⁹Ní Leemeeki cáá binimpoobi bili, bi yíì upeekaa yii Ada, ki yíì uliliiti yii Siila.

²⁰Ní Ada màl̄ Yabaal, úǹ di sá bin kɔkɔ kóò tantib poon ki yìiǹ ki kpàá inaayee naanja.

²¹U-naal ní bi nìn yíì Yubaal. Úǹ di sá bin bɔ̀ɔ́ tibati ki búǹ awulee naanja.

²²Ní Siila mun màl̄ Tubaal-Kaayeen. Úǹ di nìn sá ucaa ki cáá tikúti nì tasab ki mɔ́ɔ̀ tiwan nì titɔntɔŋwan kɔkɔ. Naama di nìn sá Tubaal-Kaayeen niisal.

²³Ní Leemeeki bí u-nimpoobi yii: «Ada nì Siila, pīlifìmaan-mi! M-nimpoobi, kpòom̄maan ni-tafaliŋ kí pīlifì tin m làá sòoǹee! Bi ŋá-mi tiweendi ní m kūū unil. Tiweendi tin bi ŋá-mee puee, m kūū kibiki.

²⁴Bi làá tɔ̀ Kaayeen pɔntooŋyi ŋfunyɔm miluli pu, ní kí tɔ̀ man Leemeeki pɔntooŋyi ŋfunyɔm mita kpá imuŋku inaa pu.»

²⁵Adam nì u-nimpuu gíti kpáfì ní u-nimpuu cáá dipool ki màl̄ kibininjabiki ní ki pú-kì diyindi yii Seeti, ki bí yii: «Unimbɔti gíti tīī-mi kibininjabiki ki téeǹ Abeel un Kaayeen kūūyee yil pu.»

²⁶Ní Seeti mun màl̄ kibininjabiki ní ki pú-kì diyindi yii Eenɔsi. Ŋyunti gbanti ní binib kíĺ ki kíǹ ki yíì Unimbɔti yii ti-Dindaan.