Read Ntcham Genèse 41 Bible Online

Genèse 41 - Ntcham bible

Genèse 41

¹Abin ali boonee ní Faaroo dámintì kudamintiiu kubɔ, yii u yú dimɔɔl din bi yíì Niilee[96] caŋin.

²U yú mimmee ní ki ká inasal iluli, i bí màlmal ki ŋān̄, ki nyánní dimɔɔlee poon ki yú digbándi ki ŋmóò timool.

³Boonee ní nnagɔŋgɔmu ŋkpiimu mululi mun nyánní dimɔɔl gbantin ki páaǹní in béeyee boon ki dɔ́miń ki yú ki kɔ́ĺ-i dimɔɔgbandi.

⁴Ní nnagɔŋgɔmu ŋkpiimuee dū inasal in bí màlmal ki ŋān̄ee ki nátì. Niinee ní Faaroo cúu fīntì.

⁵Boonee ní Faaroo fātìi gèen̄ ní ki gíti tí dámintì yii idifin iluli in nyìm̀ ki ŋān̄ee túuń dikakabaantiil pu.

⁶U kpēēyee ní ki ká ndifiŋkpiimu mululi mun ugbuŋkoon fáá mu fáaḿee nyáń ki kútì idifin in béeyee pu.

⁷Ní ndifiŋkpiimu mun fáaḿee dū idifin in nyìm̀ ki ŋān̄ee ki nátì. Niinee ní Faaroo tí cúu fīntì ní ki ká yii an sá kudamintiiu.

⁸Kutaa wúntèe ubɔti pɔbil bíil̀, ní u tú bi yíiń Eejipiti tiŋki poon bibɔɔbi nì biciŋfitiibi kɔkɔ. Bi bāańee ní ubɔti kàan̄ u nín dámintì puee ki tùkū-bi, ama bi-kansikin báà ubɔ kaa ŋúń ki lēē taapu ki tùkū-u[97].

⁹Niinee ní bin bàtī ndaam ki tìì Faarooyee kpiliu bí ubɔti yii: «Ti-baa, diyìntil din m yīntèe, m làá bìitī di-pu díǹ.

¹⁰Di sá dalbee, a nìn fōō timbi a-tɔntɔnliibi pu diŋuul ki cáá man nì bin pūul̀-si kpɔnɔbee kpiliu ki tɔ́ sarkan ujanjakpil un kpèé a-sarkadambee dumpu.

¹¹Man nì u nìn dámintì kunyabaantiiu poon ní báà ŋma nì u-damintiiku nì ku-taapu.

¹²Ti nì ueebrunaacimpɔɔn ubɔ nìn bí sarkan niin, u sá ujanjakpil yumbuu. Úǹ ní ti nìn kàan̄ ti-damintiiti ki tùkū ní u lēē báà ŋma damintiiku taapu nín sá puee ki tùkū-u.

¹³U nín tùkū-ti ti-damintiiti taapu puee, míǹ ní an jítì. A fātìi gíiǹ ditundi din m nìn pée tūǹee ki ŋúbiǹ-mi, ní ki yāntì bi lúntì bin pūul̀ a-kpɔnɔbee kpiliu ndɔ pu.»

¹⁴Niinee ní Faaroo tú bi yíiń Jooseefi. Ní bi nyántì-u kusarkadiin malaa, ní u kōol̀ ki kpántì u-wampeeŋkaati ní ki nín cá ubɔti nimbiin.

¹⁵U bàn̄ Faaroo ceeyee ní Faaroo bí-u yii: «M dámintì kudamintiiu kubɔ ní báà ubɔ kaa ŋúń ki tùkū-mi ku-taapu. Ama m gbìl̄ yii bi yaa kàan̄ kudamintiiu ki tùkū-see, a ŋūǹ kí lēē ku-taapu.»

¹⁶Ní Jooseefi kíí Faaroo yii: «An kaa sá man di ŋūǹ kí ŋá tiba, Unimbɔti di làá tùkù-si a-damintiiku taapu ní án sɔ̀ŋkì a-pɔbil.»

¹⁷Ní Faaroo bí Jooseefi yii: «M dámintì yii m yú dimɔɔgbandi ní.

¹⁸M yúee ní ki ká inasal iluli, i bí màlmal ki ŋān̄, ki nyánní dimɔɔlin ki dɔ́miń ki yú digbándi ki ŋmóò timool.

¹⁹Boonee ní nnagɔŋgɔmu ŋkpiimu mululi páaǹní. Doooo nee, maa láá pée ká nnakpiimu míǹ Eejipiti tiŋki kɔkɔ poon ki ká.

²⁰Nnagɔŋgɔmu ŋkpiimuee bāań mimmee ní ki dū inasal in ŋān̄ ki bí màlmalee ki nátì.

²¹Ní a yaa ká-iee, aa lì yii i náĺ tiba gba. I nín pée bí pu ŋgɔŋgɔmu ŋkpiimu puee, míǹ ní i gbíntìi bí. Ní m cúu fīntì.

²²Boonee ní m gíti dámintì yii didikakabaantiil di lòon̄ idifin iluli ní i nyìm̀ ki ŋān̄.

²³Ní ndifiŋkpiimu mululi mun ugbuŋkoon fáá mu fáaḿee mun nyáń ki kútì idifin ipeekaayee pu.

²⁴M yúee ní ndifiŋkpiimuee dū idifin in nyìm̀ ki ŋān̄ee ki nátì. M kàan̄ míǹ ki tùkū bibɔɔbi, ama bi-kansikin báà ubɔ kaa ŋúń ki béè taapu ki tùkū-mi!»

²⁵Ní Jooseefi bí Faaroo yii: «Ti-baa, a-damintiitee liitil pée sá kudamintibaantiiu ní. Unimbɔti di là kí dàkà ubɔti tin u là kí ŋée.

²⁶Inasal iluli in ŋān̄ee, taapu di sá abin aluli, ní idifin in ŋān̄ee mun taapu sá abin aluli. Niin sá kudamintibaantiiu ní.

²⁷Nnagɔŋgɔmu ŋkpiimu mululi mun páaǹní ipeekaayee boonee, taapu di sá abin aluli mun. Ní ndifiŋkpiimu mululi mun ugbuŋkoon fáá mu fáaḿee taapu sá ŋkùm abin aluli.

²⁸Kii m nín bàà tùkū ubɔti puee, Unimbɔti di lēē min u là kí ŋée ki dàkā-u.

²⁹Tijin làá gbí Eejipiti tiŋki kɔkɔ poon abin aluli.

³⁰Boonee ŋkùm làá nyā abin aluli. Binib dāa súntí gba yii tijin nìn gbí Eejipiti tiŋkin, kun puee ŋkùmee làá dāá nàan̄ Eejipiti tiŋki ní.

³¹Ŋkùm gbanti nín dāa pɔ̄ɔ̄ puee dāa yàntī binib kaa dāa gíti nyí yii digbíl diba nìn kɔ́ Eejipiti tiŋkin.

³²Ti-baa, a nín dámintì kudamintibaantiiu mili kɔkɔ nee dàkà yii Unimbɔti làá lafun ŋá min u bɔ́ntì kí ŋée, án kaa làá ti yúntí.

³³An puee, ti-baa Faaroo, á kpèè kí nyàab̀ unil un cáá dinyil nì iciinee kí dū-u kí kàan̄ tikpiti Eejipiti tiŋki pu.

³⁴Ti-baa, an ŋān̄ á kàan̄ bikpilib biba Eejipiti timmu poon, binib yaa kùn̄ tikpaajin digbíl biŋŋi alulee poonee, bí cúú yàkatī miŋmoo pu ní bikpilibee ń lēē diba pu kí dūú kpāafì cakalaabi poon.

³⁵Á yóoń mara yii Eejipiti tiŋki kamaa poonee, bí kóoǹ digbíl biŋŋi alulee jinti kɔkɔ kí kpāfì, kí dūú kpāafì ní tikɔkɔ ń nīn bí a-taapu.

³⁶An jintee ń nīn yú míǹ, ŋkùm biŋŋi alulee yaa láa bāańee, bí dāá dūú fīī kitiŋ pu nib ŋkùm ń taa láa kpɔ̀ kí céetí-bi.»

³⁷Tibɔti tin Jooseefi sòon̄ee mɔ́ɔkiǹ Faaroo nì u-naacimbi kɔkɔ.

³⁸Ní Faaroo bí-bi yii: «Ti ŋūǹ ki gíti ká unil ubɔ u cáá Unimbɔti Fam ki bí kii kijapaai neeee?»

³⁹Ní ubɔti bí Jooseefi yii: «Sii ní Unimbɔti dàkā tin bí nee kɔkɔ, ŋma di gíti bí ki cáá iciin ki nyí ki jítiǹ sii!

⁴⁰Sii di kíǹ ki yì man samaau. A yaa lī puee, míǹ ní m-timbundi kɔkɔ nib làá pīlifiǹ-si kí ŋá[98]. Man nín sá ubɔtee baba ní m jítiǹ-si.»

⁴¹Ní Faaroo gíti bí Jooseefi yii: «M dū Eejipiti tiŋki kɔkɔ ki ŋá a-ŋaan.»

⁴²U lī mimmee ní ki fúutì u-bɔmbiki ki dūu fúuń Jooseefi ŋambiki ki pēeǹ-u dibɔkutimɔntiil ní ki léeǹ-u sindaariya léeŋkaati[99].

⁴³Ní Faaroo yāntì Jooseefi kɔ́ u-tɔrɔkuliliitiu poon, ní binib līī ki tátí yii: «Ní gbàam̄maan!» Míǹ ní Faaroo nìn kāaǹ Jooseefi ú nīn kpèé Eejipiti tiŋki kɔkɔ.

⁴⁴Ní Faaroo bí Jooseefi yii: «Man di sá Faaroo, Eejipiti bɔtikpaaŋwu. Ama sii yaa kaa pú kinyɔkɔee, báà unil kpá kí ŋá tiba nì tiba Eejipiti tiŋki kɔkɔ poon.»

⁴⁵Ní Faaroo páaǹ Jooseefi diyindi yii Safnati-Paneeya, ní ki dū Pootifeera un sá utandaan Ooni tiŋkinee bisal Asinaati ki tīī-u u cáá. Boonee, Jooseefi yìin̄ ki māntì Eejipiti tiŋki kɔkɔ poon.

⁴⁶Ŋyunti ŋun bi nìn nyántì Jooseefi sarkan ki cáá-u ki cūnnì Eejipiti bɔtiu Faaroo ceeyee, u nìn cáá abin mmuŋku nì saalaa ní. U nyáń Faaroo ceeyee ní ki yìin̄ ki māntì Eejipiti tiŋki kɔkɔ.

⁴⁷Digbíl biŋŋi alulee poonee, tijin nìn lòon̄ tikpil.

⁴⁸Ní Jooseefi kūliŋkì digbíl biŋŋi alulee poon tijin tin kɔkɔ bí Eejipitee nì ti-nyɔkɔm ki yóoǹ Eejipiti timmun. Kitiŋ kamaa poonee, u nìn kóoǹ tijin tin bi cáń tisatinee ki kpáafì.

⁴⁹Jooseefi nìn kūliŋkì tijin tikpil tikpil ki kpáafì an wīikí kii tiŋku gbandi bul nín dɔ̄ puee. Baa nìn gíti bíi ŋmàntī-tì gba, kun puee an kaa nìn bí ŋkaan.

⁵⁰Kí wàatī ŋkùm biŋŋi alulee ń bàńee, Pootifeera un nìn sá utandaan Ooni tiŋkinee bisal Asinaati nìn màl̄ Jooseefi mbininjabiyaamu muli.

⁵¹Ní Jooseefi pú kikpilii diyindi yii Manasee[100], di sá u nìn lī yii: «Unimbɔti yāntì m súntì m-gìńdi nì m-baa cindi kɔkɔ pu.»

⁵²Ní u pú kililiitii diyindi yii Eefiraayiim[101], di sá u nìn lī yii: «Unimbɔti pú-mi mmaal kitiŋ kin poon m jíń falaayee.»

⁵³Abin aluli ŋin poon digbíl kɔ́ Eejipiti tiŋkinee yuntiŋu sāā.

⁵⁴Ŋkùm biŋŋi aluli ŋin bɔti Jooseefi nìn sòon̄ee kíĺ ki bíi dòoń. Ŋkùm nìn jéetì ntimu kɔkɔn[102], ama tijin nìn bí Eejipiti tiŋki kɔkɔ poon.

⁵⁵Ŋyunti ŋun ní Eejipiti yab jinti dāa dóò ŋkùm nyáń kitiŋ puee ní bi kíǹ ki sūǹ Faaroo cee ki nyàab̀ tijin. Ní Faaroo bí-bi yii: «Ní cùú ká Jooseefi, u yaa lī puee ní ŋá míǹ.»

⁵⁶Ŋkùm nìn nyáń Eejipiti tiŋki kɔkɔ poon. Jooseefi nìn pīitì cakalaabi kɔkɔ ní ki nyáfiǹ Eejipiti yab tijin, di sá ŋkùm nìn mɔ̄tìi bíi pɔ́ɔkí ki cá Eejipiti tiŋki poon.

⁵⁷Ntimu kɔkɔ nib nìn dòoń Eejipiti ní ki dāā tijin Jooseefi cee, kun puee ŋkùm nìn pɔ̄ɔ̄ kitiŋ kɔkɔ pu.