Read Ntcham Genèse 43 Bible Online

Genèse 43 - Ntcham bible

Genèse 43

¹Ŋkùm nìn mɔ̄tìi bíi pɔ́ɔkí Kanaan tiŋkin.

²Bi nín jíń tijin tin bi dánní Eejipitee ki dóòyee, ní Jaakɔb bí u-jipɔmbi yii: «Ní gítímaan kí cùú dāń-ti tijin.»

³Ní Juuda kíí-u yii: «Uninjee nìn baasii kpáafì-ti ní ki lī yii: <Ni yaa kaa cáań ni-naal, m gíti kpá kí fōō-ni.>

⁴An puee a yaa kíí Beenjameen ń nóó-ti kí cùee, ti làá cùú dāń-si tijin.

⁵Ama a yaa yíì yii tí taa kpáaǹ-uee, ti mun kaa làá cù, kun puee uninjee baasii tùkū ki cántì-ti ní yii: <Ni yaa kaa cáań ni-naal, m gíti kpá kí fōō-ni.>»

⁶Ní Jaakɔb bí yii: «Nimbi di ŋá-mi míǹ. Ba pu ní ni bàà tùkū-u yii ni gíti cáá naal ubɔ ní?»

⁷Ní bi kíí-u yii: «Uninjee di páb́-ti ki bālifì ti nì ti-dicaŋku poon bɔti yii: <Ni-baa báaa? Ni gíti cáá naal ubɔɔɔ?> Tin u bālifèe ní ti kíí-u. Taa ŋūǹ kí béé yii u làá lì yii tí cáań ti-naalaa!»

⁸Ní Juuda bí-u yii: «M-baa, dū Beenjameen kí kpàan̄ man tí yīkì kí cùú cáań tijin tí jī kí ŋmátí. Tí taa nín̄ kā míǹ, timbi nì sii nì ti-biyaamu kɔkɔ ń dāá kpú ŋkùm.

⁹Tin kɔkɔ yaa láa bāań u-puee, man fōō ki ŋá m-ba, á dāá bàlifì-mi. M yaa kaa gíiǹní-u ki ŋúbiǹ-see, ḿ nīn pée sá ukpiti a-cee kí nīn cá jaanjaan.

¹⁰Ti yaa kaa bàà bíil̀ ŋyuntee, naŋkɔnampu ti bàà gítìmaan mili mili ki cáań tijin.»

¹¹Ní bi-baa kíí-bi yii: «Too, an nín sá yii míǹ ní tí pée ŋée, ni nín làá ŋá puee sɔ̀. Ní nyàab̀maan ti-tiŋki doo wammɔntiiti tiba kii talaalub nì ikpafi nì tisiil, nì asubil ŋin bi yíì piistaasi nì amandee kí cùnnì kí pɔ̄ uninja gbanti.

¹²Ní ŋúb́ animbil mili pu kí fàtīí gíiǹ ŋin bi nìn dūu ŋá ni-kutukubinee kí tīī-bi. An yaa yíì, an nìn ŋá-bi inaatuu ní.

¹³Ní yīkìmaan kí kpáaǹ ni-naal kí nīn gítí uninjee cee.

¹⁴Unimbɔti Mpɔŋkɔdaan ń yàntī uninjee ń tin sɔ̄ ni-saai kí yàntī Beenjameen nì Simeeyɔn ń nóó-ni kí fàtīń. An yaa kíǹ mamee, m làá nīn pée kā kii maa pée màl̄ ki kée ní.»

¹⁵Niinee ní bi bɔ́ntì tiwampɔkaal ní ki yōoǹ animbil mili pu, ki kpáaǹ Beenjameen ki nín cá Eejipiti ki tin bàn̄ ki kɔ́ ki yúl̀ Jooseefi nimbiin.

¹⁶Ŋyunti ŋun Jooseefi ká Beenjameen nóoń-bee ní u bí u-tɔntɔŋkpiliu yii: «Cáá binib nee kí cùnnì m-dumpu kí kpɔ̀ kuwaŋkuluu kubɔ kí ŋá tijin, di sá yii man nì bi di làá jī ŋwiimpu nee.»

¹⁷Ní uninjee cáá-bi ki cūnnì Jooseefi dumpu kii Jooseefi nín bí yii ú ŋá puee.

¹⁸Ŋyunti ŋun bi bàn̄ ki làá kɔ́ Jooseefi dumpuee ní tifaandi kɔ́-bi, ní bi bíi lì yii: «Ti nín nìn péé péé ki dɔ́miń bi gíiǹ animbil ŋin ki ŋá ti-kutukubinee, an pu ní bi cáań-ti doo kí sàaǹ-ti án bà-ti, kí fōō ti-mammu ní kí dū-ti kí ŋá iyumbu.»

¹⁹Bi làá kɔ́ee, ní ki sútì ki pìl̄ Jooseefi tɔntɔŋkpiliuee kipunyɔkɔpu ki sòon̄ nì u.

²⁰Bi nìn lī yii: «Ti gbāam̀-si, ukpil! Ti nìn pée dɔ́miń doo ki dá tijin.

²¹Ti nìn fàtīi kùǹ ki bàn̄ laaba kunyeeu mɔ́ ti làá dòon̄ ki gútì ti-kutukubee, báà ŋma nimbiliŋ nì ŋi-nyɔkɔm kā u-kutukuun. An puee ti fātìi gíiǹní animbil gbanti.

²²Ti gíti ŋúbiń animbil aba mun kí dā tijin. Di sá taa nyí un di yaa nìn dū ti-nimbiliŋ ki gíiǹ ki ŋá ti-kutukubinee.»

²³Ní utɔntɔŋkpilee kíí-bi yii: «Yàntīmaan ni-pɔbiliŋ ń nīn sɔ̀m̀, ní taa fàŋkì tiba. An sá ni-Nimbɔtiu, ni-baa Nimbɔtiu di dū tigaajati ki ŋá ni-kutukubin. Ni-nimbiliŋee nìn kɔ́ m-ŋaan.» U sòon̄ nì bi míǹ ki dóòyee ní ki cūtìi nyántìń Simeeyɔn ki tīī-bi.

²⁴Ní utɔntɔŋkpilee cáá-bi ki kɔ́ǹ Jooseefi dumpu, ki tīī-bi nnyim bi fíntì bi-taaŋi, ní ki tīī bi-mammu timool.

²⁵Ní bi bɔ́ntì tiwampɔkaal tin bi cáań kí pɔ̄ Jooseefee ki yóoǹ kí wàatī ú nín bàń kuwiŋkuluu, kun puee bi nìn gbìl̄ yii niin ní bi làá jī tijin.

²⁶Ŋyunti ŋun Jooseefi bāań mmɔŋkee, ní bi yōoǹní bi-wampɔkaati ki cūtì u-cee ki gbāaǹ u-nimbiin ní ki dūu tīī-u.

²⁷Ní Jooseefi jáam̀-bi ki bālifì bi-gbampɔŋŋu pu, ní ki bí-bi yii: «Ni-baa utikpil un bɔti ni nìn sòon̄ m-ceeyee pɔ̄ɔ̄ tiŋanaaa? U gbíntìi dáá bí dimaŋfalinaaa?»

²⁸Ní bi kíí-u yii: «Iiin, a-tɔntɔnliu ti-baa pée pɔ̄ɔ̄ ní. U dáá gbíntìi bí dimaŋfalin.» Bi lī mimmee ní ki fātìi tí gbāaǹ u-nimbiin.

²⁹Jooseefi yáatì ki ká Beenjameen, u-naal u nì un pēē dinabiilee ní ki bí yii: «Ni-naal ujoolkaa un bɔti ni nìn sòon̄ nì mee sɔ̀ɔɔ?» Ní ki gíti kútì ki lī yii: «Unaacimpɔɔn, Unimbɔti ń bìin̄ a-boon.»

³⁰Jooseefi nín ká u-naal mimmee, ní an kɔ́-u tikpil ní waa ti ŋūǹ kí cúú u-ba nnyinnyim ń taa nyā, ní u ŋá malaa ki kɔ́ u-diikun ki súń.

³¹U súń ki dóò ki fíntì u-nimbiin ki nyánnée, ní ki cúú u-ba ní ki bí yii bí yóoń-bi tijin.

³²Ní bi gāntì Jooseefi sambil di-ba ní ki gāntì u-nabiyaamu bi-ba ní ki gāntì Eejipiti yab bin dɔ́miń kí jēe mun bi-ba. Di sá yii Eejipiti yab kaa nìn ŋūǹ bi nì Eebru yab ń kpāfìí jī disambibaantiilin. An nìn sá Eejipiti yab cee dikoobil ní.

³³Ní bi kāaǹ Jooseefi nabiyaamu u-nimbiin ki túĺ-u, bi kā ki dī tɔb ki nóó nì bi nín kpíǹ tɔb puee, ki kíĺ ujipɔŋkpil ki tin kátì un jóol̀ dibiil puee, ní bi kā ki kpèé tɔb, ní an ŋá-bi bitii.

³⁴Ní Jooseefi yāntì bi lēē tijin tin bi ŋá ki tɔ́kɔǹ u-nimbiinee ki yākatì-bi. Bi nín yākatì báà ŋma tijin miŋyee, u yāntì bi tīī Beenjameen míǹ miŋmoo pu ní. Ní bi nì Jooseefi jíń ki nyùn̄ ndaam ki bál̀ ní an nyāatì-bi.