Read Ntcham Genèse 44 Bible Online

Genèse 44 - Ntcham bible

Genèse 44

¹Míǹ boonee ní Jooseefi pú u-tɔntɔŋkpiliu un kpèé u-cindi poon tuuŋŋi kɔkɔee kinyɔkɔ yii: «Lēē tijin kí fúuń binib nee kutukubin min nyɔkɔm bi ŋūǹ kí túńee, kí gíiǹ báà ŋma nimbiliŋ kí páań u-jinti pu, u-kutukuu poon.

²Á dū m-sambinyɔkaaki kin sá animbil kútee kí kūtì bi-waakee nimbiliŋ ŋin u bàà cáań kí dā tijinee pu kí ŋá u-kutukuun.» Ní utɔntɔnlee ŋá kii Jooseefi nín tùkū-u puee.

³Kutaa wúntì kutaafaauee ní Jooseefi pú-bi nsan bí nīn kùǹ, bi nì bi-mammu.

⁴Bi yíkì ki cōom̀ ki jítì kitiŋ pu kaa láá kɔ́ ndan ní Jooseefi bí u-tɔntɔŋkpiliuee yii: «Yīkìí jà binibee boon, a yaa tin ká-bee, á bàlifì-bi yii: <Ba pu ní ni dū ikpiti ki pàn̄ tiŋan?

⁵Ba pu ní ni yùn̄ m-kpiliu sambinyɔkaaki kin poon u nyù ní ki cáa màkà ki béetí tin bí ki dòońee? Ni nín ŋá miŋyee kaa ŋān̄.>»

⁶Utɔntɔŋkpilee jìn̄ ki cúú-bee ní ki dū an bɔtee ki lī bi-cee.

⁷Ní bi kíí-u yii: «Ukpil, ba pu ní a sòoǹ-ti mimmee? Timbi a-tɔntɔnliibi kaa pée ŋūǹ kí ŋá míǹ jaanjaan.

⁸Kpèè, animbil ŋin nìn kā ti-kutukubin ti kpáàa búntì Kanaan tiŋkinee, taa fātìi gíiǹní-si an nimbiliŋaaa? Kin mana ní ti gíti ŋūǹ kí yɔ̀ animbil àá sindaariya a-kpiliu dumpu?

⁹Ukpil, ti-kansikin un kutukuun ní bi yaa ká kisambinyɔkaai gbantee, bí kpɔ̀ udaan, ní timbi bin kíǹee ń kpántí a-yumbui.»

¹⁰Ní utɔntɔŋkpilee kíí-bi yii: «Toooo! Ni nín lī puee m kíí míǹ. Ama un cee ní m yaa lafun ká kisambinyɔkaai gbantee, udaan baba di làá kpántí m-yumbuu ní nimbi bin kíǹee ń nyā tibɔtin.»

¹¹Dicilpu niinee ní bi-kɔkɔ túutì bi-waŋguliŋ mmamu pu ki síiǹ kitiŋ ní báà ŋma cúú u-waŋgul ki gútì.

¹²Ní utɔntɔŋkpilee kíĺ ujipɔŋkpil cee ki kpèé ki tin cáa sāā ujoolkaa cee, ní ki tin ká kisambinyɔkaayee Beenjameen kutukuun.

¹³Niinee bi-pɔbiliŋ bíil̀, ní bi cúú tiwan tin bi pēēyee ki cátì, ní báà ŋma gíiǹ u-waŋgul ki túǹ u-maŋki ní bi-kɔkɔ fātìi nín gítí kitiŋin.

¹⁴Juuda nì u-nabiyaamu fātìi bàn̄ Jooseefi dumpuee, u dáá bí, ní bi lítì u-nimbiin ki dɔ̄ kitiŋ.

¹⁵Ní Jooseefi bí-bi yii: «Ba ní ni ŋée! Naa nyí yii unil kii man nee cáá dinimbil kí wāl̀ tin bíi jītéeee?»

¹⁶Ní Juuda kíí-u yii: «Ukpil, tilati ní ti gíti cáá kí lì a-cee ní? Ti làá gíti sòoǹ yii ba? Mana ní ti ŋūǹ kí dàkà ti-baamɔŋyi? Unimbɔti di nyántì ti-kpitii ki páaǹ. Kɔŋkɔnnee ti kpántì a-yumbui dee, timbi nì un cee bi ká kisambinyɔkaayee.»

¹⁷Ní Jooseefi bí yii: «M kpá kí ŋá míǹ! Un cee bi ká kisambinyɔkaayee baba di làá kpántí m-yumbuu, nimbi bin kíǹee ń nīn gítí ni-baa cee nì ŋgbansɔŋfi.»

¹⁸Niinee Juuda sútì ki pìl̄ Jooseefi ní ki bí-u yii: «M-dindaan, m gbāam̀-si á pɔ̄-mi diyimɔɔl ḿ sòoǹ nì si, á taa fōō m-pu diŋuul, di sá yii sii nì Faaroo ŋmà ní.

¹⁹Ti nín nìn péé péé ki dɔ́mińee, a nìn bālifì-ti yii: <Ni-baa dáá báaa? Ni gíti cáá naal ubɔɔɔ?>

²⁰Ní ti nìn kíí-si yii: <Ti-baa dáá bí ki púĺ. Ti gíti cáá naal ubɔ, úǹ di jóol̀ dibiil pu. Ti-baa màl̄-u u-tikpiti poon ní. U-maan kpíì, u kíǹ u-baba ní bi-na maaliŋun. An pu ní u-baa néeń-u tikpil.>

²¹Ní a bí timbi a-tɔntɔnliibi yii: <Cùú cáaḿmaan-u m-cee doo, m là kí ká-u.>

²²Ní ti kíí sii m-dindaan yii: <Kibikee kaa ŋūǹ kí yīkìí fá ki-baa, kì yaa yíkìi fá ki-baa, u làá kpú ní.>

²³Ní a bí timbi a-tɔntɔnliibi yii: <Ni yaa kaa cáań ni-naal gbanti, m gíti kpá kí fōō-ni.>

²⁴Ti nín fātìi gítì ti-baa a-tɔntɔnliu ceeyee ní ti tùkū-u a nín lī puee.

²⁵Boonee ní ti-baa bí yii: <Ní gítí kí cùú dāń-ti tijin.>

²⁶Ní ti kíí-u yii: <Ti yaa làá cùee, see tí kpáaǹ ti-naal, taa ŋūǹ kí cù ti-ŋmaniŋma. Di sá gɔmina un bí niinee baasii kpáafì-ti ní yii: <Ni yaa kaa cáań ni-naal, m gíti kpá kí fōō-ni.>

²⁷Ní ti-baa bí-ti yii: <Kéè ni nyí yii m-nimpuu Raseel màl̄-mi mbininjabiyaamu muli ja naa!

²⁸Bi-kansikin ubɔ wáŋkì, ní m dākafì yii báà an ŋá pu, upeecuncuti ubɔ di cúú-u ki tɔ̄ntì, kun puee maa ti ká-u ki dāa sāā díǹ.

²⁹Ni nín là kí púntí un kíǹ nee mun kí cùnnì nee, tiba yaa tin ŋá-uee, nì kunimbaau ní m làá kpáaǹ m-yikpipinti nee kí kpú.>

³⁰«Kɔŋkɔnnee mana ní m làá fàtīí nīn gítí m-baa a-tɔntɔnliu cee, ní kibiki kin pu waa mɔ̄ nee ń taa nín̄ nóó-ti?

³¹U yaa tin ká yii kibiki nee kaa nóó-tee, see ú kpú. Niinee timbi a-tɔntɔnliibi di yāntì u náĺ u-fam ki kpáaǹ u-yikpipinti ki kpíì kunimbaaun.

³²Kí wàatēe, man a-tɔntɔnliu di dū m-ba ki yóoǹ kibikee yil pu m-baa cee ki yōoǹní-kì, ní ki bí m-baa yii: <M yaa kaa gíiǹní-kì ki ŋúbiǹ-see, ḿ nīn pée sá unikpiti a-cee kí nīn cá jaanjaan.>

³³An puee m gbāam̀-si, á yàntī man a-tɔntɔnliu ń fōō kibiki nee yil kí kpántí a-yumbuu ní kì nì ki-mambi ń nīn gítí mmɔŋki.

³⁴Di sá maa ŋūǹ kí gítí ti-baa cee kibiki nee kaa nóó-mi. Maa tin ŋūǹ kí kpèè inimɔɔn in poon m-baa làá nīn bée.»