Read Ntcham Genèse 45 Bible Online

Genèse 45 - Ntcham bible

Genèse 45

¹Niinee Jooseefi kaa nìn gíti ŋūǹ kí cúú u-ba bin kɔkɔ nìn bí u-ceeyee nimbiin. Ní u téeń yii: «Nyāntímaan binib kɔkɔ m-cee doo.» An kíǹ u nì u-nabiyaamu ŋmaniŋmee ní u yāntì bi béè yii an sá úǹ Jooseefi[106].

²Ní u bíi sūǹ mpɔn ní Eejipiti yab bin u nyántèe gbìl̄ ní an gbītì ki bàn̄ Faaroo cindi.

³Ní Jooseefi bí u-nabiyaamu yii: «Man Jooseefi dee! M-baa gbíntìi dáá bí dimaŋfalinaaa?» Ama u-nabiyaamu wunti nìn kpíì u-nimbiin ní baa ŋúń ki kíí-u.

⁴Ní u bí-bi yii: «Ní sútiń kí pìl̄-maa!» Ní bi sútì ki pìl̄-u. Ní u bí-bi yii: «An sá man Jooseefi, ni-nabiki kin ni nìn dūu nyáfì bi cáá-mi ki cūnnì Eejipitee.

⁵Ama kɔŋkɔnnee, ni-pɔbiliŋ ń taa bīil̀, án taa wà-ni mun yii ni dū-mi ki nyáfì bi cáań-mi doo. An sá Unimbɔti di dū-mi ki péé ki līntìń ḿ dāá nīn bí doo kí ŋmā kí fīī-ni ní taa kpú.

⁶Di sá yii ŋkùm nín nyáń kitiŋ pu nee, abin ali sèé. Abin aŋmoo ŋin mun dòoń nee, ubɔ kaa làá kpɔ̀ tikpaalaaa, kaa làá cā tijin mun.

⁷Unimbɔti di túnní-mi ḿ lìntīń ni-nyɔkɔpu, án nín làá ŋá pu ní taa kúntí kitiŋ pu, ama ú dū u-pɔŋkpaaŋŋu kí fīī-ni ní ŋmátée.

⁸Míǹ puee an kaa sá nimbi di yāntì ní m dɔ́miń doo, Unimbɔti di cáań-mi. Úǹ di kāaǹ-mi ḿ nīn sá kii Faaroo kpambal ki kpòotī-u, kí nīn sá u-dicaŋkun ukpil, ní kí nīn sá Eejipiti tiŋki kɔkɔ gɔminau.

⁹An puee ní gítí m-baa cee malaa kí tùkù-u yii u-jipɔɔn Jooseefi nín tú bí tùkù-u puee sèé: <Unimbɔti dū-mi ki kāaǹ Eejipiti tiŋki kɔkɔ kpiliu. Míǹ puee dāan̄ m-cee malaa, á taa tàan̄ní.

¹⁰A làá nīn kóò Gooseen tiŋgbaŋkin ní ki pìlīǹ-mi, sii nì a-biyaamu nì a-naantiibi nì a-piii nì a-naai nì tin kɔkɔ a pée cááyee.

¹¹M làá nīn kpèé-si niin, sii nì a-dicaŋku nì a-waŋkuti kɔkɔ, án nín làá ŋá pu tiba nì tiba ń taa lóó-see, kun puee an gíti kíǹ abin aŋmoo ní ŋkùm ń jītí.>»

¹²Ní Jooseefi kútì ki lī yii: «Kéè nimbi ni-ba ká nì ni-nimbiliŋ, m-naal Beenjameen mun ká nì u-nimbiliŋ yii an baasii sá man di bíi sòoǹ nì naa!

¹³Ní māafì m-baa tinyool paaŋŋu ŋun poon m bí Eejipiti tiŋkin nee nì tin kɔkɔ ni kée, kí ŋá malaa kí cáań-u m-cee doo.»

¹⁴U sòon̄ míǹ ki dóòyee ní ki bìb̄ u-naal Beenjameen ní bi-silii pá tɔb gbigbipati pu ní bi-liitil bíi sūǹ.

¹⁵Ní u bìb̄ u-nabiyaamu mun kíǹee mun ki súń. Míǹ boonee ní u-nabiyaamu nín ŋúń ki sòon̄ nì u.

¹⁶Ní an gbītì ki bàn̄ Faaroo cindin yii Jooseefi nabiyaamu bāań, ní an mɔ́ɔkiǹ Faaroo nì u-naacimbi.

¹⁷Ní Faaroo bí Jooseefi yii: «Tùkù a-nabiyaamu yii bí túń bi-mammu tijin kí nīn gítí Kanaan tiŋkin.

¹⁸Bi yaa bàn̄ee, bí yòon̄ní bi-baa nì bi-dicaŋŋi kí cáań m-cee doo, ḿ lēē Eejipiti tiŋki dijandi din pée ŋān̄ee kí tīī-bi, ní bí nīn jīǹ tijimmɔntiil tin kitiŋ gbanti lòoǹee.

¹⁹Yàntī a-nabiyaamu ń yòon̄ tɔrɔkub Eejipiti doo kí cùú yòon̄ní bi-nimpoobi nì bi-biyaamu nì bi-baa kí cáań doo.

²⁰Bí taa yāliŋkì tin bi làá yīkìí fáń lapuee pu, kun puee Eejipiti tiŋgbaŋki kin cáá tikɔkɔ nì tikɔkɔee poon ní bi làá nīn bí.»

²¹Ní Jaakɔb jipɔmbi ŋá kii bi nín sáŋkì-bi puee. Ní Jooseefi tīī-bi tɔrɔkub kii Faaroo nín bí yii ú ŋá puee, ní ki tīī-bi tijin tin bi làá nīn jīǹ nsannee.

²²U pú u-nabiyaamu kɔkɔ dibɔkutipɔndi diba diba, ní ki tīī Beenjameen úǹ animbil jitɔmbi alaataa ata nì abɔkutipɔɔn aŋmoo.

²³U dū tiwammɔntiil tin bí Eejipitee tiba ki túǹ mmanjamu saalaa, ní mmansalimu saalaa mun tú tijin bí cáá tīī u-baa ú nīn jīǹ ki dòoń.

²⁴Ní u kpáafì u-nabiyaamu yii: «Ní taa tin já nsanni.» Ní ki pú-bi nsan bí nīn kùǹ.

²⁵Niinee bi yíkì Eejipiti ki nín cá, ki tin bàn̄ Kanaan tiŋkin bi-baa Jaakɔb cee.

²⁶Bi bàn̄ee ní ki tùkū-u yii: «Jooseefi gbíntìi dáá bí dimaŋfalin, úǹ di sá gɔmina Eejipiti tiŋkin.» Ama an kaa nìn kɔ́ Jaakɔb pɔbilin, di sá yii waa nìn fōō tin bi lēe ki kíí.

²⁷Bi nín máafì Jaakɔb tibɔti tin kɔkɔ Jooseefi sòon̄ nì bee, nì u nín ká tɔrɔkub bin Jooseefi tīiń bí dāan̄ kí yòon̄-uee, ní u nín fīntì ŋgeem pu.

²⁸Ní Jaakɔb bí yii: «M-biki Jooseefi gbíntìi bí dimaŋfalinaa! An ŋmāntì, maa ti pée là tiba kí kūtì. M làá cùú ká-u ní kí nín kpú.»