Read Ntcham Genèse 46 Bible Online

Genèse 46 - Ntcham bible

Genèse 46

¹Jaakɔb yíkìi kāl̀ nsan pu ki kpáaǹ u-dicaŋku nì tin kɔkɔ u cááyee. U bàn̄ Beerseeba tiŋkinee ní ki ŋá saraabi ki tīī u-baa Isaaki Nimbɔtiu.

²Kunyeeu gbantee, ní Unimbɔti sòon̄ nì u kudamintiiun, ní ki yíiń-u yii: «Jaakɔb! Jaakɔb!» Ní u kíí yii: «M sèé.»

³Ní Unimbɔti bí-u yii: «Man di sá Unimbɔti, a-baa Nimbɔtiu. A nín cá Eejipiti nee, á taa fàŋkì, kun puee niin ní m làá yàntī á kpántí ditimbuŋkpaandi baa.

⁴Mama m-ba di làá céeǹ-si kí cùnnì Eejipiti ní kí fàtīí gíiǹní-si. A-kúm dalee, a-jipɔɔn Jooseefi di làá cúú-si ní á sìntī.»

⁵Niinee ní Jaakɔb yíkì Beerseeba. U-jipɔmbi nìn dū tɔrɔkub bin Faaroo nìn tīińee ki yōoǹ u nì bi-nimpoobi nì bi-biyaamu.

⁶Bi nìn kpáaǹ bi-waŋkuti kɔkɔ nì bi-gaajawanti tin bi ká Kanaan tiŋkinee. Ní Jaakɔb dūu bàn̄ Eejipiti[107], u nì u-dicaŋku kɔkɔ.

⁷U nìn kpáaǹ u-jipɔmbi, nì u-bisalib nì u-naantiibi kɔkɔ ní ki cūnnì Eejipiti.

⁸Jaakɔb jipɔmbi nì u-naantiibi bin nìn nóó-u ki cūtì Eejipitee yiŋŋi sèé. Jaakɔb jipɔŋkpiliu di sá Rubeen.

⁹Rubeen jipɔmbi di sá Anɔki nì Palu nì Eetisirɔn nì Kaarmii.

¹⁰Simeeyɔn jipɔmbi di sá Jeemuyeel nì Yamiini nì Oodi nì Jaakin nì Sookaar nì Saayuul, ukanaannimpu jipɔɔn.

¹¹Leefii jipɔmbi di sá Geersɔn nì Keeyaati nì Meerarii.

¹²Juuda jipɔmbi di sá Eer nì Oonan nì Seera nì Peereesi nì Seeraki. Ama Eer nì Oonan bíǹ kpíìń Kanaan tiŋkin. Peereesi jipɔmbi di sá Eetisirɔn nì Amuul.

¹³Isakaar jipɔmbi di sá Toola nì Pufa nì Yoob nì Simroon.

¹⁴Sabulɔn jipɔmbi di sá Seereedi nì Eelɔn nì Jaaleel.

¹⁵Mbininjabiyaamu mun Leeya nìn màl̄ Jaakɔb Padan-Aram tiŋkinee dee. Bi-niisal Diina mun nìn kútì. Leeya biyaamu nninjabiyaamu nì nnimpubiyaamu nì u-naantiibi kɔkɔ nìn kpáfì binib mmuŋku nì saalaa nì bita ní.

¹⁶Gaadi jipɔmbi di sá Siifiyɔn nì Aagi nì Suuni nì Eetisibɔn nì Eer nì Aroodi nì Areel.

¹⁷Aseer jipɔmbi di sá Yiimina nì Yiisifa nì Yiisifi nì Beeriya nì bi-niisal Seera. Beeriya nìn màl̄ mbininjabiyaamu muli: Eebeer nì Malkiyeel.

¹⁸Siilpa un Laaban nìn dūu tīī u-bisal Leeya ú nīn sá ubiloolee bininjabiyaamu mun u nìn màl̄ Jaakɔbee dee. Siilpa biyaamu nì u-naantiibi kɔkɔ nìn kpáfì saalku nì ubɔ ní.

¹⁹Jaakɔb nimpuu Raseel jipɔmbi di sá Jooseefi nì Beenjameen.

²⁰Jooseefi nì u-nimpuu Asinaati un sá Ooni tiŋki tandaaŋwu Pootifeera bisalee nìn màl̄ mbininjabiyaamu muli ní Eejipiti tiŋkin. Bi-yiŋŋi di sá Manasee nì Eefiraayiim.

²¹Beenjameen jipɔmbi di sá Beela nì Beekeer nì Asibeel nì Geera nì Naaman nì Ēeyi nì Roosi nì Mupiim nì Upiim nì Aaridi.

²²Jaakɔb nì u-nimpuu Raseel jipɔmbi nì bi-naantiibi kɔkɔ nìn kpáfì unil ubɔ kpá saalku ní.

²³Daani jipɔɔn di sá Usiim.

²⁴Neefitalii jipɔmbi di sá Yaatiseel nì Gunii nì Yeetiseer nì Siileem.

²⁵Biila un Laaban nìn dūu tīī u-bisal Raseel ú nīn sá ubiloolee bininjabiyaamu mun u nìn màl̄ Jaakɔbee dee. Bi-kɔkɔ nìn kpáfì binib biluli ní.

²⁶Jaakɔb cindi poon nib bin nìn nóó-u ki cūtì Eejipitee kɔkɔ nìn sá binib imuŋku ita nì biluu ní, kaa kpáaǹ u-coopoobi.

²⁷Jooseefi jipɔmbi bili bin u nìn màl̄ Eejipitee nìn kútì, ní Jaakɔb dicaŋku nib kɔkɔ dūu kpáfì binib imuŋku ita nì saalaa.

²⁸Jaakɔb nìn dū Juuda ki tú ú cùú tùkù Jooseefi yii ú dāan̄ kí ká-u Gooseen tiŋkin. Ŋyunti ŋun Jaakɔb nì u-yab nìn tóob́ kí kɔ́ Gooseen tiŋkinee,

²⁹ní Jooseefi yāntì bi kpàl̄ u-taamui in dátí tɔrɔkuee ní u búntì Gooseen kí tūŋkì u-baa Jaakɔb. U nín bàn̄ ki ká u-baayee ní u ŋàan̄ ki cìb̄-u ní u-yil pá u-baa sil pu ní u súń ki yúntì.

³⁰Ní Jaakɔb bí Jooseefi yii: «M ŋūǹ kí kpú kɔŋkɔnnee, kun puee m fātìi ká-si a gbíntìi bí dimaŋfalin.»

³¹Ní Jooseefi bí u-nabiyaamu nì u-baa dicaŋku yab yii: «M làá cùú ká Faaroo kí tùkù-u yii: <M-nabiyaamu nì m-baa dicaŋkun yab bin nìn bí Kanaan tiŋkinee dɔ́miń m-cee.

³²Binib gbanti sá bin kpàá tiwaŋkutee ní. Bi cáań bi-piii nì bi-ŋoobui nì bi-naai nì tin kɔkɔ bi pée cááyee.>

³³Faaroo yaa láa yíiń-ni ki bālifì-ni yii ba tundi ní ni tūǹee,

³⁴ní dāá kíí-u yii: <Timbi a-tɔntɔnliibi pée sá biwaŋkpaaliibi ní doooo ti-biyatin ki dāa sāā díǹ, kii ti-baabi mun nín nìn pée sá puee.> Mimmee u làá yàntī ní kàl̄ Gooseen tiŋkin, kun puee uwaŋkpaal kamaa sá Eejipiti yab cee mbusu niliu ní.»